No Tolas Ni Santiago
No Pakatonngan so Paytābwan no Nya Tolas
Do Biblya, ki myan apat a tawo a mayngaran so Santiago. No asa, ki si Santiago a anak ni Sebedeo a kakateh ni Juan (Mt. 17:1; 27:56; Mk. 1:19; 3:17). Iya, ki diniman da do chimpon Āri Herodes (Ara. 12:2) do sakbay paw a naitolas nya tolas. No chadadwa na, ki si Santiago a anak ni Alpeo a asa dyirad apostolis saw ni Jesos (Mt. 10:3; Ara. 1:13). No chatatdo na, ki si Santiago a āmang ni Apostol Jodas (Si Jodas Iskariote aba. Lk 6:16; Ara. 1:13).
No chapat na, ki si Santiago a asa pangōlo dan nanganohedaw di Jesos do Jerosalem, as kan iyaw nangayanaw ni Pablo a nachisarsarīta do Jerosalem do kadāmo na paw a nanganohed. (Ara. 15:13-29; Gal. 1:18-19; 2:9). Iyaw nya Santiago nangitolas so nyaya a tolas.
No naytolasan na, ki siraw tabwaw a nanganohed di Jeso-Kristo, naten dana saw nanganohedaw a Jodyo a naychawpit dana do intīrwaya a lōbong (1:1). No naynamotan ni Santiago a naytolas, ki tan ahwahoken kan inanawo na dyira an maypāngo iyaw maganay saya a dadakay dan nanganohed. Binata na a machita magtōnos kapanganohed kan kaparin no manganohed di Jesos, ta no kaparin, ki mangipaneknek so oyod a kapanganohed. Mana no kaparin, ki akmay asi no kapanganohed, as kan an abo asi na, ki naibidang dana a abaw sīrbi no kapanganohedaya (2:17, 20, 26).
Āro paw innanawo ni Santiago a maynamot do kabibyay no manganohed. Siraw nya, ki maynamot do kalidyatan, kasolisog, kasoli, kapangidomdōma do kapayngay a tawo, kapangiget so rida, kasīrib, kapaydidiman, kapaykoykospag, kinabaknang, kaānos, kan kapaydasal.
No Naychakarwan no Nya Tolas
Pakatoneng 1:1
No kapanganohed kan kasolisog 1:2-18
No kapangadngey kan kaparin 1:19-27
No kapangidomdōma 2:1-13
No kapanganohed kan kaparin 2:14-26
No kapangigpet so rida 3:1-12
No kasīrib a yapo do Dyos 3:13-18
No kapangballāag kan kapangahwahok 4:1-5:6
No kaānos kan dasal 5:7-20
No Tolas ni
Santiago
1
Pakatoneng
1 Iyaw nya tolas, ki yapo dyaken a si Santiago a adīpen no Dyos kan si Āpo Jeso-Kristo, as kan mangay dyinyo a tabo a naibidang dana tawotawo no Dyos a naychawpit dana do intīrwaya a lōbong. Komosta kamo?
No Kapanganohed kan Sīrib
2 Kakakteh, ibidang nyo pakono a soyot anchan myan mapadāsan nyo a matatarek a pakasoōtan, 3 ta chapatak nyo a masōot abaw kapanganohed nyo, an dya tan patobohen naw kapagibtor nyo.* 1:3 Roma 5:2-5; Sant. 1:12; 1 Ped. 4:12-19 4 As iyaw kapagibtor, ki masisītaw nawri, ta no pagtongpalan na, ki payparinen naynyo a mahnyi do kapanganohed nyo a makahwahok kan abwa polos so pagkorāngan do salapen ni Āpo Dyos.
5 An sino dyinyo kōrang so kasīrib a makaāwat so maynamot do kalidyatan a mangay do byay na, maydasal pakono do Dyos. Ta si Āpo Dyos, masinyat aba, ta sisasagāna a manoroh dyaten so tabo a machita ta, kan paydabdab naba yaten do pagkorāngan ta. 6 Ki an maydasal kamo, machita manganohed kamo a dya magmangamanga. Ta an magmangamanga kamo, akma kamos kelsangaw a padoydoydoyen salawsaw a dyi nyo a chapatak an dino kokwanan nyo. 7 No tawowaw a komwan so dadakay, ki chahahaw naba sya a myan rawaten nad Āpo Dyos. 8 Ta iya, ki magdwadwa so kapangtokto, as kan matohatohay do tābo a kaparin na.
No Kinapobri kan Kinabaknang
9 Sichangori, inyo a kakakteh a mapopobri, masoyot kamo pakono, ta matohos saad nyo do salapen no Dyos a maynamot do kapachichasa nyo di Kristo. 10 As inyo a kakakteh a mababaknang, charagsak nyo pakono an mabo kayayan nyo a mabaknang do lōbongaya, ta ari kamo na a machichasa di Kristo. Ta no mabaknang a tawo, ki akmay tamek a magsabong a madiman anchi.† 1:10 Isa. 40:6-8; Mt. 6:19-21; 1 Ped. 1:24 11 Ta an mayegen araw, ki mahayo tamekaw do kohat.‡ 1:11 Mana “no kohat no pangaditan,” Sal. 103:15-16 Do dawri, apabanchiw kapintas no sabong naw, ta masday do tana. Komwan anchiw kadiman no mabaknang a tawo do kadama na maychichwas so kinabaknang na.
No Kasōot kan Kasolisog
12 Magāsat tawowaw a nāw na mangigpet so kapanganohed na an mangay kasōot na, ta an maibtoran naw nawri a kasōot na, rawaten nanchiw gon-gona na a iyaw byay na abos pandan a inkari no Dyos dyirad madawaw dya. 13 An myan pakasolisogan ta, batahen taba a si Āpo Dyos nangsolisog dyaten, ta masolisog aba si Āpo Dyos a mamarin so marahet, as kan solisogen naba yaten do marahet. 14 Ta no kasolisog no asa tawo, ki yapo do mismwaw a marahet a kalikāgom na, as kan nawriw omap-apan sya. 15 As an maapanan do marahetaw a kalikāgom na, ki maygatos dana. As no pagtongpalan gatos na, ki pakadimanan a abos pandan.
16 Chadaw kwa kakakteh, paallīlaw kamo aba. 17 Ta no tabo a magaganay kan kosto a rigālo, ki yapo do Dyos a Āmang ta do hanyit a nangparswa so tabo mararanyag do tohos. Ki aran mayweyweswes sa kan matatādyan ranyag daw, ki nāw na abos pandan ni Āpo Dyos kan aba polos kasari dya. 18 Ta sigon do pangeddeng na, pinayparin na yaten a anak na a maynamot do kapanganohed ta do oyod a nainanawo dyaten. Tan komwan, payparinen na yaten a kasisītaan do tabo a naparswa.
No Kapangadngey kan Kapamarin
19 Inyo a kakakteh a oyod ko a chadaw, nyaw naknakmen nyo: Sisasagāna pakono kāda asa a mangadngey, as machita maannad a maychirin kan dya malisto a makasoli, 20 ta abaw maitoroh no kasoli do malinteg a kabibyay a akmas chakeyaw no Dyos. 21 Dawa, tadyichokodan nyo sa tābo makasnesnek saya kaparin nyo kan tābo marahet saya a dadakay nyo. Sipapakombaba kamo pakono a magtongpal do chirin no Dyos a inmoha na do aktokto nyo a makaisalākan dyinyo.
22 Sichangori, masisīta a tongpalen nyo chirin no Dyos. Tod nyo aba adngeyen, an dyi nyo pa parinen, ta an tod a mandad tadyinya nyo, ki allilāwen nyo bōkod nyo a inawan. 23 Ta no mangadngey so chirin as dyi na tongpalen, ki akmas tawowaw a magispiho so rōpa na, 24 as kan aran katatayoka na pa nagispiho, ki do kakaro naw, nanyeng na nawayakan rōpa naw. 25 Ki iyaw tawowaw a nāw na mangtokto kan mangtongpal so maganayaya a linteg no Dyos a mangwayawaya so tawotawo, iyaw bindisyonan no Dyos do tābo a kaparin na, ta nawayakan nabaw nadngey naw, basbāli a parinen na.
26 Aryoriw makabata sya manganohed an sīping so rida? An komwan, allilāwen naw inawan na kan abaw sīrbin kabata naw sya mapasnek do dawri a inanohdan na. 27 Ta no oyod a kapanganohed a abos pakapilāwan do salapen no Dyos a Āmang ta, ki iyaw nyaya: no kasidong dyirad olīla kan siraw bālwaw a malidyalidyat so kabibyay, as kan iyaw nāw naw a dya namanchaan so marahet saya do lōbongaya.