1 Nanokos si ĀPO so kadwan saw a nasyon a pangsōot so tabo Israelita a ari pad nakapādas so machigobat do tana a Kanaan. 2 Pinarin na lang nyaya tan inanawo naw kāda kapotōtan dan Israelita maynamot do gobat, naten dyirad dyi pa saw a nakangay a machigobat. 3 Siraw nasyonaw a nabidin do Kanaan, ki nairāman saw dadimaw a magtotoray no Pilisteo, tābo Kananeo, Sidonyo, kan siraw Hibeo a omyan do tokotokon Lebanon a yapo do Tokon a Baal-hermon a manda do Lebo-hamat. 4 Sira, ki natokos a pangsōot siras Israelitaw an magtongpal sa mana engga so bilbilin ni ĀPO a inpaitoroh na di Moyses a para dyirad kapoonan daw. 5 Dawa, siraw Israelitaw, minyan sa dyirad Kananeo, Heteo, Amoreo, Pereseo, Hibeo, kan Jeboseo. 6 Naychakabahay saw anak da saw, kan nagsīrbi sa dyirad dyos da saw.

7 Siraw Israelitaw, ki nāw da mamariparin so marahet do salapen ni ĀPO. Nawayakan da si ĀPO, kan nagsīrbi sa dyirad dyos saw a Baal kan Asera*3:7 Si Asera, ki mababakes a dyos a rārayay da Baal. Ok. 2:13 do matatarek a logar. 8 Dawa, taywara a nakasoli si ĀPO dyirad Israelitaw, kan inpalōbos naw āryaw no Mesopotamia†3:8 Mana “Aram Naharaim”. a si Kosan-risataim a mangsākop sira. Siraw Israelitaw, nagsīrbi dya so wawaho a katawen.

9 Ki do nakatanyis daw no Israelita di ĀPO, napatnek so mangisalākan dyira a si Otniel a pōtot ni Kenas a ādi ni Kaleb. 10 Pinabīleg no Ispirito ni ĀPO si Otniel, kan nayparin a okom a mangipangōlo siras Israelita. Inpangōlwan na saw Israelitaw a nanggobat so āryaw no Mesopotamia, kan intoroh ni ĀPO ballīgi di Otniel. 11 Do dāwri, myan danaw talna do tanaw so apat a poho a katawen manda do nakadiman ni Otniel a potōt ni Kenas.

12 Minirwa dana saw Israelitaw a mamarin so marahet do salapen ni ĀPO. Maynamot do dyaya a karahet da, intoroh ni ĀPO bīleg di Eglon a āri no Moab a mangābak siras Israelita. 13 Inakpeh na sa ni Eglon siraw Ammonita kan siraw Amalekitaw a nangdarop siras Israelitaw, kan sinākop daw syodad a palma.‡3:13 Ok. 1:16 14 As siraw Israelitaw, ki nagsīrbi sa di Āri Eglon no Moab so asa poho kan wawaho a katawen.

15 Ki do nakatanyis daw di ĀPO, napatnek so mangisalākan dyira a si Ehod a kaholi a tawo. Iya, ki pōtot ni Gera a yapo do trībo no Benhamin. Siraw Israelitaw, ki tinoboy da a mangyangay so pagbwis da di Eglon a āri no Moab. 16 Namarin si Ehod so kampilan a naybīt so tarem, kan godwa kamitro so kanaro. Pinabedbed na do kawanan naw a pā na do olibenaw no laylay na. 17 Inparawat naw pagbwis daw di Eglon a āri no Moab a oltimo so kataba a tawo. 18 Do nakatayoka naw a nangiparawat so pagbwis da, pinayam narana saw nayraraw so pagbwis. 19 Ki do nakapakarapitaw ni Ehod do logar daw no didyosen a nakitikitan a bato a masngen do Gilgal, naybidi a nangay di Eglon. Binata na dya a kāna, “Mo āpo āri, ariw malīmed a minsāhi ko dyimo.” Dawa, inmandar ni āri dyirad magsirsīrbyaw dya a kāna, “Magolimek kamo!” Do dāwri, pinahbot na saw magsirsīrbyaw dya.

20 Inasngenan ni Ehod āryaw do yanan naw a maydisna a maychatanyi do mamanyitwaw a kwarto a mapariir do palasyo na. Binata ni Ehod dya a kāna, “Aryaw minsāhi ko dyimo a yapo do Āpo Dyos.” Naytēnek iyaw āryaw. 21 Do dāwri, ināsot na so kaholyaw a tanoro na iyaw kampilan naw a yapo do kawananaw a pā na, as nakaibono na sya do bodekaw no āryaw. 22 Golpi a natonep kampilanaw pati polo na, as nailomlom do tabaw no bodek na. Binagot aba ni Ehod iyaw kampilanaw do bodek ni āri, kan minohtot so tachi. 23 Minohtot si Ehod a nangay do balkon. Inanban na saw pantawaw, as kan intolbek na sa.

24 Do nakakaro naw, naybidi saw magsirsīrbyaw, ki naboya da a naitolbek aneb saw no mamanyitwaw a kwarto. Iniktokto da a kon da, “Sigōro, ari a maylāpang§3:24 Do chirin Hebreo, “taloban naw kokod naw”. do mamansokel a kwarto.” 25 Dawa, nangnanaya sa a nanda do kapagparikot darana an āngo parinen da. Ki do dyi naw a iwangan so pantaw saw, inhap daw tolbekaw, as nakaywang da sya. Do dāwri, naboya daw āri daw a nayhaharag do ratagaw a nadiman.

26 Do kayan daw a mangnanaya, naglības si Ehod. Hinabasan naw logar daw no didyosen a nakitikitan a bato, kan tinongtong naw nangay do Seirah. 27 Do nakawara naw daw do katokotokonan no Epraim, nagtanggoyob dyirad Israelitaw tan may sa machigobat. Do nakapaychichipeh daw, inpangōlwan sa ni Ehod a minosok.

28 Binata ni Ehod dyira a kāna, “Monot kamo dyaken! Ta si ĀPO, inparawat narana dyinyo kabōsor nyo saw a siraw tawotawo a Moabita.” Dawa, minonot sa di Ehod a minosok, kan sinākop da saw pamtangan daw no Moabita do Oksong Jordan. Inpalōbos dabaw aran sino a mamtang. 29 Do dāwri a araw, diniman dan Israelitaw sigōro asa poho a rībo a katotoredan kan kabilbīlgan a soldādo dan Moabita. Abaw aran asa dyira nakalības. 30 Do dāwri a araw, siraw tawotawowaw no Moab, ki naābak sa dyirad Israelitaw, as myan danaw talna do tanaw so wawaho a poho a katawen.

31 No somnarono di Ehod, ki si Samgar a pōtot ni Ānat. Insalākan na pa saw Israelita do nakapangdiman naw so anem a gasot a Pilisteo do nakapangosar naw so matarem a kayo a pangābog so bāka.