1 Do dāwri a chimpo, abaw āri do Israel. As do dāwri pa a chimpo, siraw tawotawo no trībo no Dan, maychichwas sa so tana a pinakabinglay da a pagyanan da. Ta manda do dawri, ari da pad nasākop pinakabinglay daw a tana a yapo do nakapagbibinglay daw so tana dan trībo no Israel.*18:1 Jos. 19:40-48 2 Dawa, tinoboy dan Danita saw dadimaw a matotored a mahahakay a pinakainawan no trībo daw a yapo do idiidi a Sora kan Estaol tan magwanawan kan mangispya sa so tana. Do nakawara daw do katokotokonan no Epraim, nangay sa do bahay ni Mikah, as minisan sa daw. 3 Do kasngen daranaw do bahay ni Mikah, nailāsin daw āyogaw no baro a Lebita. Dawa, yangay da inyahes dya a kon da, “Sino nangyangay dyimo dya? Āngo chabalay mo dya? Āngo ta myan ka dya?”

4 Inbahey na dyira an āngo pinarinaw dya ni Mikah, as nakabata na sya a kāna, “Tinangdanan naw yaken, kan yaken pādi na.”

5 Binata da dya a kon da, “Iyahes mo pa do Dyos an magballīginchiw byahi namenaya.”

6 Initbay no pādiyaw a kāna, “Mayam kamo na a sitatalna. Iyaw byahi nyowaya, ki siaaywan si ĀPO.”

7 Dawa, nayam saw dadimaw a mahahakay, as nakangay da do idi a Lais.†18:7 Lais, ki do atngeh no Tokon Hermon do kaaam-myananaw a tana no Israel. Nadongso da a siraw tawotawowaw a omyan daw, ki matalnaw kabibiyay da a akmas siras Sidonyo. Maybibyay sa a abo kapaydidiman da, makasāray sa, abo pagkorāngan da, as kan myan dyiraw kinabaknang da. Omyan pa sa a mateng dyirad Sidonyo, as kan machibyang saba dyirad matarek a tawotawo. 8 Do nakapakasabat daranaw no dadimaw a mahahakay do Sora kan Estaol, inyahes dan tawotawowaw dyira an āngo nadongso da. 9 Initbay da a kon da, “Yangay ta na sa raoten! Naboya namenaw a taywara a maganay tanaw. Ditā nyo pawri dya abos parinen? Maybabalay kamo paba. Yangay nyo na asdepen a sakōpen iyaw tanaw. 10 Anchan makarapit kamo daw, maboya nyonchi a siraw tawotawowaw, ki makasāray sa. Marahawaw tanaw, kan abaw pagkorāngan na. Inparawat dana no Dyos dyinyo.”

11 Dawa, anem a gasot a mahahakay a siaarmas a yapo do trībo no Dan, komnaro sa yapo do Sora kan Estaol. 12 Somnonget sa, as nagkampo sa do Kiryat-jearim‡18:12 Dadwa poho kan anem a kilomitro kabawa na yapo do Sora kan Estaol. do Joda. Maynamot do dyaya, iyaw nya logar a lāoden no Kiryat-jearim, ki matawagan pa so Mahaneh-dan§18:12 No chakey na batahen, ki “kampo no Dan”. a mandas changori. 13 Yapo do dawri, tinongtong da a kinelsat katokotokonan no Epraim, as nakarapit sa do bahay ni Mikah.

14 Do dāwri, binata dan dadimaw a nagispya so tanaw do omdibonaw no Lais dyirad rārayay da saw a kon da, “Chapatak nyori a do asa dyirad nya saya bahay, myan laylay no matohosaw a pādi a epod, bolto saw a para bahay, nakitikitan a didyosen kan iyaw nachīpo a didysoen? Chapatak nyo na an anghen nyo.” 15 Dawa, somniwal sa a nangay do bahayaw ni Mikah a yanan Lebitaw a baro, as kinomosta daw kayayan na. 16 Siraw anemaw a gasot a Danita a siaarmas, naytēnek sa do asdepanaw do rowangan. 17 As siraw dadimaw a nagispya so tanaw, nagtaros sa a somindep a nanghap so nakitikitan a didyosen, no laylay no matohosaw a pādi a epod, bolto saw a para bahay, kan iyaw nachīpo a didyosen. As iyaw pādyaw, naytēnek do rowanganaw kontodo saw anemaw a gasot a siaarmas a mahahakay.

18 Ki do nakasdep daw no mahahakayaw do bahay ni Mikah, kan iyaw nakahap daw so nakitikitan a didyosen, no laylay no matohos a pādi, bolto saw a para bahay, kan iyaw nachīpo a didyosen, inyahes no pādyaw dyira a kāna, “Aysa, āngo pariparinen nyowaya?”

19 Binata da dya a kon da, “Tagari! Maylilyak kaba. Machangay ka dyamen tan mayparin a mamagbaga kan pādi namen. Maganaganay abawri a magpādi ka do asa trībo kan partīdos no Israel kan iyaw asaw a kapamilya no asa tawo?” 20 Chinasoyot no pādyaw. Dawa, inhap naw laylayaw no motohos a pādi a epod, didyosen saw a para bahay, iyaw nakitikitan a didyosen, kan iyaw nachīpo a didyosen, as kan nachangay dyirad tawotawo saw.

21 Do dāwri, tinongtong dan Danitaw saw nayam, as pinanma da saw adedekey saw, animal, kan siraw warawara daw. 22 Do nakapakateng daranaw so dēkey do bahay ni Mikah, tinawagan sa ni Mikah siraw mahahakayaw a karoba na a manglakat siras Danitaw, as kan nadas da sa. 23 Do nakangēngey daw siras Danitaw, minidit sa, as nakabata da sya di Mikah a kon da, “Āngo? Aryoriw problima, ta dawa kinayrayay mo saw bonggoy mwaya manglakat dyamen?”

24 Initbay ni Mikah a kāna, “Namna! Inhap nyo sayaw dyos a pinarin ko kan iyaw pādi kwaw, as tod kamo a komnaro. Asyo, natokos dyaken? Maypāngo a iyahes nyo dyaken a ‘Aryoriw problima?’ Pakawanem!”

25 Inatbay dan Danita a kon da, “Na, agayan mo aba yamen! Āngwan siraw masosolihenaya a mahahakay, daropen daymo, as kan madiman ka kontodo kapamilyaan mo.” 26 Do dāwri, tinongtong dan Danitaw nayam. Do nakaboyaw sya ni Mikah a mayīyit sa adayo, naybidi sa somnabat.

27 Do nakahap dan Danitaw so pinarin saw ni Mikah kan pādyaw a nagsīrbi dya, nangay sa do Lais dyirad tawotawaw a matalna so kabibyay kan makasāray. Rinaot da sa, as inispāda da sa a diniman tawotawaw daw, as kan sinosohan daw idi daw. 28 Abaw nangisalākan dyira, ta mateng sa do Sidon, as kan nachibyang saba dyirad matarek saw a tawotawo. Nawri a idi, ki do payahosongan a masngen do Bet-rehob.

Somnarono, minirwa a pinatnek dan Danitaw idyaw, as minyan sa daw. 29 Iyaw idyaw, pinangaranan das Dan a ngaran kapoonan daw a naiyanak di Israel. Iyaw sīgod a ngaran no idi, ki Lais.*18:29 Jos. 19:47; Ok. 18:7 30 Sinpangan na, pinatnek dan Danitaw nakitikitan saw a didyosen a pagdaydāyawan da. Si Jonatan a pōtot ni Gersom a pōtot ni Moses kan siraw kapotōtan naw a mahakay, nayparin sa a pādi do trībo no Dan a manda do nakaakaw daw no tawotawo. 31 Nāw da a nagdaydāyaw do nakitikitanaw a didyosen a inpaparin ni Mikah do kadama naw a myan pagdaydayāwan so Dyos do Silo.