1 Siraw tabo Israelita, nangay sa a yapo do Dan do ammyānan a mandad Beerseba do abagātan kan yapo do tana a Gilead do dāya, as nāsa sa a naychipeh do salapen ĀPO do Mispa. 2 Siraw pangpangōlo daw no tabo tawotawo no tabo trībo no Israel, naychipeh sa do nakakpehan daw no tawotawo no Dyos. Apat sa gasot a rībo a soldādo a nagarmas so ispāda. 3 (Ki nadāmag dan tawotawaw no trībo no Benhamin a sira tabo kadwan saw a trībo dan Israelita, ki nakpeh sa do Mispa.) Inyahes dan Israelitaw a kon da, “Ibahey mo pa dyamen, maypāngo a naparin nya marahet a kaparin?”

4 Tinbay no Lebitaw a lakay no diniman daw a mabakes a kāna, “Nangay akwaw kan binaket kwaw do idi a Gibea do sākop no trībo no Benhamin tan misan daw. 5 Do dāwri a ahep, siraw mahahakayaw no idi a Gibea, nangay sa do bahayaw a manghap dyaken, kan dinibon daw bahayaw. Inranta da yaken a dimanen, kan rinames daw binaket kwaw a mandad nakadiman na. 6 Do dāwri, inhap ko bangkayaw no binaket kwaw, inaktekteb ko, as nakaipaw-it ko so kāda kakteb do tabo a tana a sinākop no Israel, ta pinarin daw nya marahet kan makabābaba a kaparin do Israel. 7 Changori, inyo a tabo a Israelita do dya. Āngo mabata nyo? Ibahey nyo paw kapangtokto kan pamagbaga nyo maynamot dyaya.”

8 Nāsa sa tabo tawotawaw a naytēnek, as nakabata da sya a kon da, “Abaw aran asa dyaten a maybidi do tolda na mana somabat do bahay na. 9 Nyaw parinen ta dyirad tawotawaw do idi a Gibea. Magbibinōnotan ta an sino saw mangay a mangraot dyira. 10 Apagkapollo dan mahahakay do kāda trībo no Israel,*20:10 Do chirin Hebreo, ki “Hapen taw asa poho do kāda asa gasot a mahahakay a yapo do tabo trībo no Israel, as asa gasot a yapo do kāda asa ribo, kan asa rībo a yapo do kāda asa poho a ribo”. ki makatoneng sa do kanen dan soldādo. As siraw kadwan, ki yangay da bahsen siraw taga Gibea do sākop no trībo no Benhamin a maynamot do makasnesnekaya a pinarin da do Israel.” 11 Dawa, naychipeh sa tabo mahahakayaw no Israel. Asaw panggep da iyaw karaot das idyaw.

12 Nanoboy saw trībwaw no Israel so tobotoboyen da do tabo a sākop no trībo no Benhamin†20:12 Gen. 46:21 a pinangibahey da so nya a kon da, “Āngo nya oltimo so karahet a pinarin nyo? 13 Iparawat nyo dyamen marahet saw a mahahakay no idi a Gibea tan dimanen namen sa kan mapaksyat karahet do Israel.”

Ki nangadngey sabaw tawotawaw no trībo no Benhamin dyirad kapayngay da saw a Israelita. 14 Basbāli a naychipeh saw Benhaminitaw do idi a Gibea a yapo do tabo idiidi da a machigobat dyirad Israelita saw. 15 Do dāwri a araw, nakpeh dadwa a poho kan anem a rībo a nagarmas so ispāda a yapo do idiidi da, otro myan pa saw papito a gasot a napidi a mahahakay do omidi saw do Gibea. 16 Dyirad tabo soldādo saya, myan papito a gasot a napidi a kaholi a mahahakay. Kāda asa dyira, ki taywara mapolso a magpalsiit kan kāya na nahwen aran boboh no oho a dya magmintis. 17 Siraw Israelitaw, nakakpeh sas nagarmas so ispāda a apat a gasot a ribo. Nairāman saba dyaw trībo ni Benhamin.

18 Siraw Israelitaw, nangay sa do pagdaydayāwanaw do Betel, as inyahes da di Āpo Dyos a kon da, “Āngo a trībo dyamen manma a mangraot siras Benhaminita?”

Inatbay sa ni ĀPO “Iyaw trībo no Jodaw manma.”

19 Dawa, do somaronwaw a araw, naybangon saw Israelitaw, kan nangay sa a nagkampo do masngenaw do idi a Gibea. 20 Nangay saw Israelitaw do idi a Gibea a manggobat so Benhaminita. Pinagpwisto da saw soldādo daw do idyaw tan domarop sa. 21 Minohtot saw Benhaminitaw do idi a Gibea, kan diniman da saw dadwa a poho kan dadwa rībo a Israelita do dāwri a araw. 22-23 Do dāwri, nangay saw Israelitaw do pagdaydayāwanaw, as nakatanyis da do salapen ni ĀPO a nandad kamahep. Inyahes da di ĀPO a kon da, “Āngo, yangay namen pa sawri a gobaten kakabagyan namen saw a Benhaminita?”

Inatbay sa ni ĀPO a kāna, “Naon. Gobaten nyo sa.”

Naysin-aahwahok saw Israelitaw a payiten daw aktokto da, as minirwa dana sa a nangay a nagpwisto do nagpwistwan daw a dāmwaw a araw.

24 Dawa, nangay saw Israelitaw a machigobat dyirad Benhaminitaw do chadadwa naw a karaw. 25 Minohtot saw Benhaminitaw a yapo do idi a Gibea do chadadwa naw a karaw, kan nangdiman dana sas asa poho kan wawaho a rībo a Israelita a siaarmas so ispāda.

26 Do dāwri, nangay sa tabo Israelitaw do Betel, kan do dawri, naydisna sa tomanyitanyis do salapenaw ni ĀPO. Nagayonar sa a nandad kamahep, kan indāton daw dāton saw a masosohan kan dāton saw a pachikapya di ĀPO. 27 Sinpangan na, inyahes dan Israelitaw di ĀPO. (Iyaw Lakāsanaw no Tōlag no Dyos, ki myan do Betel do dāwri sa araw, 28 as si Pinehas a pōtot ni Eleasar kan apoko ni Aaron, a nagsirsīrbi a pādi do salapenaw no lakāsan a mangyahes.) Inyahes dan Israelitaw a kon da, “Āngo, yangay namen pa sawri a gobaten kakabagyan namen saw a Benhamita mana engga dana?”

Inatbay ni ĀPO a kāna, “Mangay kamo, ta an delak iparawat ko sa dyinyo.”

29 Dawa, tinoboy dan Israelitaw kadwan saw a soldādo a mangsaneb do omdibonaw no idi a Gibea. 30 Do chatatdo naranaw a karaw, somnonget saw Israelitaw do idi a Gibea a machigobat dyirad Benhaminitaw, as kan nagpwisto sa akma do nanma. 31 Minohtot dana saw Benhaminitaw a nachigobat dyirad Israelitaw, kan napalongo sa a machibawa do idyaw. Akmas sīgodaw a pinarin da, inrogi daw nangdiman siras kadwan saw a Israelita. Sigōro, nadiman tatdo a poho a Israelita do tantanapaw kan do rarahan saw. No asa a rarahan, ki mangay do Betel, kan no asa, ki mangay do idi a Gibea.

32 Binata dan Benhaminitaw a kon da, “Chiban pa! Ab-ābaken ta na saya akmas sīgodaw!”

Ki binata dan Israelitaw a kon da, “Magsonod ta, as pawnoten ta sa a machibawa do idyaya ikwan ta sa do rarahan saya.” 33 Dawa, tabo Israelita saw, ki naychatetēnek sa do yanan daw, kan nagpwisto sa do Baal-tamar.‡20:33 Baal-tamar, ki do baet no Gibea kan Betel. As siraw Israelitaw a tomnayo do laōdenaw no idyaw a Gibea, ki inalistwan daw minohtot do tinaywan daw. 34 Do dāwri, asa poho a rībo no napidi a mahahakay a yapo do tābo Israelita, dinarop da saw taga Gibea, as mapalālo danaw kapaggogobat da. Ki siraw Benhaminitaw, nadlaw daba a īto danaw karārayawan da. 35 Inpaābak ni ĀPO Benhaminita saw dyirad Israelitaw. Do dāwri a araw, diniman dan Israelitaw dadwa poho kan dadima rībo kan asa gasot a mahahakay do trībo no Benhamin, siaarmas sa tabo so ispāda. 36 Do dāwri, naboya dan Benhaminitaw a naābak dana sa.

Nagsonod saw Israelitaw maynamot ta chinasaray da saw tawowaw a pinagsaneb da. 37 Siraw Israelitaw a mangsaneb do omdibon no idi a Gibea, inalistwan daw nayyayo a lomnongo do idyaw. Naychawpit sa do intīro a idi, as inispāda da sa a diniman tabo omidi daw. 38 Myan sinyal a nagtotōlagan dan Israelitaw kan siraw mangsanebaw. An makaboya dana sas matokpoh a ahob a yapo do idyaw, 39 siraw Israelitaw, ki maybidi sa a machigobat. Ki do dāwri, inrogi daranan Benhaminitaw nangdiman so sigōro tatdo a poho a Israelita. Dawa, iniktokto da a kon da, “Sigorādo a ābaken ta na sa a akmad dāmwaw.” 40 Ki do kasiknan naranaw a maypatohos matokpoh a ahob a yapo do idyaw, minidit saw Benhaminitaw kan naboya da a nasosohan danaw intīrwaw a idi da. 41 Do dāwri, naybidi saw Israelitaw a nangdarop dyira. As siraw Benhaminitaw, natalangkyaw dana sa, ta naboya da a īto danaw karārayawan da. 42 Pinayyaywan da saw Israelitaw kan lomnongo sa do let-ang. Ki nakadichan saba, ta binayat da san Israelitaw a yapo do idyaw§20:42 Do kadwan a manyoskripto, ki “yapo do (omdibon a) idiidi”. kan diniman da sa. 43 Dinibon dan Israelitaw Benhaminita saw, as inaryan da saba a linakatan a mandad nakadas da sira do asaw a logar do dayāen no idi a Gibea. 44 Nadiman asa poho kan wawaho a rībo (18,000) a Benhaminita, tabo sa, ki matored a para gobat. 45 Nayyayo saw kadwanaw a Benhaminita a lomnongo do let-ang do Bato a Rimmon. Ki diniman dan Israelitaw dadima rībo do rarahan saw. Tinongtong dan Israelitaw a linakatan saw nabidinaw a mandad Gidom, as diniman da paw dadwa a ribo. 46 Dawa, do dāwri a araw, tabo a Benhaminita a nadiman, ki dadwa a poho kan dadima ribo. Tabo sa, ki matored a nagarmas so ispāda.

47 Ki nayyayo a nakatālaw anemaw a gasot a Benhaminita a kominwan do let-ang do Bato a Rimmon, as minyan sa daw so apat a kabohan. 48 Ki naybidi saw Israelitaw dyirad nabidin saw a tawotawo no trībo no Benhamin, as inispāda da sa a diniman tabo tawotawowaw kontodo animal saw. Sinosohan da sa tabo idiidi dan Benahminitaw a narapit da.