No Libro A Joel
No Pakatonngan so Paytābwan no Nya Libro
Dēkey lang makapatak so maynamot di propīta Joel, kan masyirto aba an kāngo nakabyay na. Ki mapatapata a naitolas nya a libro do maikadadima mana maikapat a gasot a katawen sakbay no nakaiyanak ni Āpo Jeso-Kristo do chimpo no kapagtoray no Persya.
Iladāwan ni Joel iyaw asa makaam-amak a naparin do nakadahepdep no asa kapangenan a kabaga do tana dan Israelita, kan iyaw taywara tīkag daw. Do dya saya naparin, naboya ni Joel iyaw pangilasīnan so kangay no arawaw ni ĀPO, iyaw araw a kapangdōsa na siras mangkontra so chakey na.
Ipakatoneng no propītaya iyaw kapanawag ni ĀPO siras tawotawo a magbabāwi, kan iyaw kari na a mapabidi kan mangbindisyon sira a mirwa.
No asa a masisīta a ibahey na, ki inkari no Dyos a akneben nanchi so Ispirito naw tabo tawotawo, mahahakay kan mababakes, adedekey kan mangalkem (2:28-29). Natongpal nyaya do kapaybidi ni Āpo Jesos do hanyit (Ara. 2:16).
No Naychakarwan no Nya Libro
No kapangpisti dan kabaga (1:1-2:17)
No kari ni ĀPO a mirwa dana sa mabindisyonan (2:18-27)
No arawaw ni ĀPO (2:28-3:21)
Joel
1
1 Nyaw minsāhi a inpakatoneng ni ĀPO di Joel a pōtot ni Petwel.
No Kadahepdep Dan Kabaga
2 Mangadngey kamo, inyo a panglakayen.
Adngeyen nyo tabo a omyan do tana a Joda.
Aryoriw naparin a komwan a yapo do kabibyay nyo
mana do chimpo da no aāmang nyo?
3 Ibahey nyo nyaya dyirad anak nyo,
kan ipaibahey da panchi dyirad anak da,
as ibahey danchi met do somarono a kapotōtan da.
4 No habas dan manggetgeteb a kabaga,
ki kinan da no pinangen dan kabaga.
No panda no pinangen dan kabaga,
ki pinatawos da san homokhokso saw a kabaga.
As no tinokos dan homokhokso saw a kabaga,
kinan dan mangrārayaw saw a kabaga.
5 Mayokay kamo a bartikīro, kan itanyis nyo kapagbabāwi nyo.
Magdongdong-aw kamo, inyo a mabobōken so palek,
ta siraw ōbas a pakayapwan bayo a palek,
ki ināgaw da, kan nabo dana do bibi nyo.
6 Myan nasyon a nangraot so tana ko.
Mabīleg kan mabidang saba.
Maynyeynyepen a akmay lion.
Maysōng a akmay mabinayi a lion.
7 Rinarāyaw na saw kaobāsan ko,
kan sinisyat na saw kayo a igos ko.
Hinathatan na saw kodit daw a inpoha.
Nakainonolay na so sangasanga da saw a nanyidak.
8 Magdongdong-aw kamo akmay birhin a nakalaylay so makersang
do nakadiman no nobyo naw a īto a pachikabahayan na.
9 Siraw dāton a irek kan dāton sa a palek,
ki ināgaw da, kan apabaw a maidāton do bahay ni ĀPO.
Magdongdong-aw saw papādi
a siraw mangsirsīrbyaw di ĀPO.
10 Nakalbo dana saw kataltalonan.
Magladladingit iyaw tana,
ta narārayaw dana saw dāwa,
kominbet dana saw asi a paypalek.
Masaw dyirad parinen saw a lana.
11 Chaliday nyo, inyo a maymohamoha.
Idongdong-aw nyo, inyo a mangay-aywan siras kaobāsan.
Chaladingit nyo iyaw maynamot do trīgo kan sebāda,
ta tabo no maāpit, ki narārayaw dana sa.
12 Nakolay dana saw ōbas,
kan no kayokayo a igos, ki nahayo.
Tabo kayo a may-asi, ki nahoto kan nadiman.
Malpay kasoyotan dan tawotawo.
No Tawag a Kapagbabāwi
13 Maylaylay kamos makersang, inyo a papādi.
Magdongdong-aw kamo, inyo a magsirsīrbi do altar.
Ngay, maychararakan kamo a nakalaylay so makersang,
inyo a magsirsīrbi do Dyos ko,
ta arabaw dāton a irek kan dāton a inomen
a maidāton do timplo no Dyos nyo.
14 Mangikeddeng kamo so mapasnek a kapagayonar.
Manawag kamo so madyosan a kapaychichipeh!
Akpehen nyo tabo a panglakayen
kan siraw tabo a omyan do Joda
do irahem no timplo ni ĀPO a Dyos nyo,
kan tomanyis kamo a mangdaw so kāsi di ĀPO.
15 Aysa, kapakamwamomo panchi no nawri a araw!
Ta no arawaw a kangay ni ĀPO,* 1:15 Amo. 5:18 ki masngen dana,
kan īto danaw karārayaw a yangay no Manakabalin do Tābo.
16 Nabo abawriw mākan a chichiban ta,
magrāman ragsak kan kasoyot ta do timplo no Dyos ta?
17 Kominbet dana saw botobotoh do maychalkalka a tana.
Nainonolay dana saw bodīga a abos mimyan.† 1:17 Siraw bodīga, ki pangapyan das palek kan lana.
Rinakrak darana saw ag-agāmang,
ta siraw trīgo nyo, ki nahoto dana sa.
18 Maymāma dana saw bāka do tōok da,
Maypaypaktas dana saw animal do kapaychaychawaw da,
ta apabaw pagarāban da.
Aran siraw karniro, ki maymīmi dana sa do kapteng da.
19 Dyimo mo ĀPO, tomanyis ako.
Ta pinatawos no apoy saw tametamek do pasto,
kan hinanyib no apoy tabo kayokayo.
20 Aran siraw bolaw a animal, tanyisan daymo,
ta siraw dedēkey a oksong, ki nayachan,
kan kinayamkam no apoy saw pagarāban.