1 Sinpangan na, tinoboy ni Joswe a pōtot ni Non dadwaw a ispya a yapo do kampo da do Sittim,*2:1 “Sittim” mana “Akasya”, ki do ammyānan a dayāen no Nadiman a Tāw. Akasya, ki asa kīta a kayo a magsabong. Nom. 25:1; 33:49 kan inmandar na dyira a sililīmed a yangay da wanawanan an āngo myan do tana no Kanaan, naten do Jeriko. Dawa, nangay sa kan do nakasdep daw do Jeriko, nangay sa minisan do bahayaw no mabakes a maglaklāko so asi na a mayngaran so Rahab. 2 Nadāmag no āryaw no Jeriko a myan saw Israelita a nawara do dawri a mahep tan magispya do tanaw. 3 Dawa, nanoboy so nangyangay so nya minsāhi di Rahab: “Pahboten mo saw mahahakayaw a nangay dyimo, ta nangay sa magispya do intīrwaya tana ta.”

4 Ki iyaw mabakesaw, ki inhap na saw dadwaw a mahahakay as nakaitayo na sira, kan binata na a kāna, “Oyodaw a nangay saw mahahakayaw dyaken, ki chapatak kwabaya an dino nakayapwan da. 5 Do kapaysarisari naw kaychi, do kakalo naw a mangneb no rowanganaw, komnaro saw mahahakayaw. Chapatak kwabaya an dino kinwanan da. Makalisto kamo a manglakat sira, ta āngwan madas nyo sa.” 6 Ki yangay na sa intayo do atepaw no bahay na, kan tinaloban na sa so tametamek a lino†2:6 Iyaw tamek a lino, ki osaren da parinen a hobid mana tela. a tinalaytay na. 7 Dawa, linakatan da saw ispyaw do rarahanaw a lomongo do pamtangan saw do Oksong Jordan. As do nakapakatadyichokod daw no manglakat saw, ki nangneb danaw rowanganaw.

8 Sakbay no nakapakaycheh dan ispyaw, nangay si Rahab do atepaw a yanan da, 9 kan binata na dyira a kāna, “Natonngan ko na a si ĀPO, ki intoroh narana dyinyo nya a tana, kan ari dana madidiw namen taywara a kāmo namen dyinyo. As kan tabo a omyan do dya tana, ki maychinyābot dana sa do oltimo a kāmo da a maynamot dyinyo. 10 Ta nadāmag namen an maypāngo a pinayachan ni ĀPO ranomaw no Mabaya a Tāw do salapen nyo do kakaro nyo do Egipto. Nadāmag namen pa an maypāngo nakadiman nyo sa Sihon kan Og a dadwa a āri dan Amoreo do dayāen no Oksong Jordan.‡2:10 Nom. 21:21-35 11 Do nakadngey namenaw sya, naychinyābot kami do oltimo a kāmo, kan arabaw tored namen maynamot dyinyo. Ta iyaw ĀPO a Dyos nyo, ki Dyos do hanyit kan do tanaya. 12 Sichangori, pagsapata nyo do Dyos nyo a parinen nyo masingpet do pamilya ko akmas pinarin kwaya dyinyo, as kan torohan nyo pa yaken so pakasigorādwan ko a sinyal. 13 Isapata nyo dyaken a palobōsan nyo sanchi a mabyay sa āmang kan ānang ko, kakakteh ko a mahahakay kan mababakes kontodo tābo pamilya da, as kan isalākan nyo yamen yapo do kadiman.”

14 Tinbay dan mahahakay saw a kon da, “Byay namen, ki tādi no byay nyo an dyi namen a tongpalen inchirin namen. An dyi ka maybahebahey do aran sino so pariparinen namenaya, isapata namen dyimo a anchan itoroh ni ĀPO dyamen tanaya, ki parinen namen maganay a sipopodno dyinyo.”

15 Si Rahab, ki omyan do bahayaw a napatnek do partisaw no ahad§2:15 Myan maytalin a ahad a 3.5 mandad 4.5 kamitros baet da. no idi a Jeriko. Dawa, tinonton naw mahahakay saw a yapo do bintanaw no bahay na. 16 Binata na dyira a kāna, “May kamo do katokokonan saw tan dyi daynyo a machichwasan manglakat saya dyinyo a tinoboy ni āri. Tomayo kamo daw so tatdo a karaw mandad kapaybidi da. Dāwrinchi, komaro kamo na.”

17 Binata dan mahahakayaya dya a kon da, “Tongpalen namen anchiw nya a inpaisapata mo dyamen. 18 Nyaw machita parinen mo. Anchan asdepen namen a sakōpen nya tana, paytanen monchiw nya mabaya a hobid do bintanaya a pangtontonan mo dyamen. Akpehen monchi sa āmang, ānang mo, siraw kakakteh mo saw a mahahakay kontodo tābo pamilya ni āmang mo do irahemaya no nya bahay. 19 An myan mohtot do dya bahay as madiman anchi, ki gatos namen paba an dya bōkod na a gatos. Ki an myan aran sino do irahem no nya bahay a madiman, rawaten namen anchi a gatos namen. 20 Ki an ibahey mo pariparinen namen, siwayawaya kami na do dyaya a inpaisapata mo dyamen.”

21 Binata na a kāna, “Sigi. Maparin pakono a akmas binata nyo.” Sinpangan na, pinayyayo narana sa. Do nakakaro daranaw, pinaytan ni Rahab iyaw mabayaw a hobid do bintanaw.

22 Nangay saw ispyaw do katokotokonan saw, kan tomnayo sa so tatdo a karaw. Ki siraw nanglakataw sira a tinoboy ni āri, chinichichwas da sa a maganay do tabo saw a rarahan, ki somnabat saw manglakataw a aba polos nadongso da dyirad gagāra daw. 23 Do dāwri, minosok saw dadwaw a ispya a yapo do katokotokonan saw, namtang sa do oksong, as kan naybidi sa di Joswe a pōtot ni Non. Inbahey da dya tābo a napariparin. 24 Binata da di Joswe a kon da, “Sigorādohen namen a si ĀPO, ki intoroh narana dyaten intīro a tana. As kan tabo tawotawo, ki maychinyābot sa do oltimo a kāmo da maynamot dyaten.”