1 Naiwaras no dāmag a maynamot do nakapagballīgi no Israel. On, nadāmag dan tabo saw a ar-āri do laōden no Oksong Jordan, siraw myanaw do katokotokonan saw, do paytoytokonan saw do lāod, kan do tabo myan saw do payis no Mediterranean a Tāw a manda do ammyānan do Lebanon. Siraw nya saya, ki ar-āri dyirad Heteo, Amoreo, Kananeo, Pereseo, Hibeo, kan siraw Jeboseo. 2 Nayrarapa sa a machigobat di Joswe kan siraw Israelita.

3 Ki do nakadāmag dan taga Gibeon a Hebeo a tawo so pinarinaw ni Joswe do Jeriko kan Ai, 4 iniktokto da a sikāpan da tan isalākan daw inawan da. Iyaw sīkap da, ki toboyen da saw pinakainawan da a manakey di Joswe. As siraw bahon da, inisdot da do adan saw a kostal, kan pinangay daw palek do natakopan saw a bayon a lālat, kan inkarga da dyirad asno. 5 Naylaylay sa so rotrot saw a laylay. As siraw tokap da saw, ki adan kan natakopan. Tabo kanen da, ki naypatwa kan inohapong dana. 6 Do nakapakasagāna daranaw, nangay sa do kampo do Gilgal, kan binata da di Joswe kan siraw Israelita a kon da, “Yamen, ki yapo do mateng a nasyon.*9:6 Siraw idiidi no taga Gibeon, ki tatdo a poho a kakilomitro lang a yapo do Gilgal. Siraw idiidi da, ki Chepirah, Beerot, kan Kiriat-jearim. Jos 9:17 No chakey namen, ki machitōlag kamo dyamen.”

7 Ki initbay dan Israelita dyirad Hibeo saw a kon da, “Namna, āngwan omyan kamo a masngen dyamen. An komwan, maypāngo a machitōlag kami dyinyo?”

8 Binata da di Joswe a kon da, “Yamen, ki tobotoboyen nyo.”

Ki inyahes ni Joswe dyira a kāna, “Sino kamo? Dino nakayapwan nyo?”

9 “Yamen a tobotoboyen nyo, ki yapo do mateng a nasyon, ta nadāmag namen a maynamot di ĀPO a Dyos nyo. On, nadāmag namen tabo saw a pinarin na do Egipto 10 kan tabo saw pinarin naw dyirad dadwa saya a Amoreo a āri do dayāen no Jordan a sa Āri Sihon no Hesbon kan Āri Og no Basan a omyan do Astarot. 11 Siraw pangōlo namen kan tabo tawotawo a omyan do nasyon namen, ki inbilin da a mangirobwat kami so bahon namen, as kangay namen a machibayat dyinyo. Inbilin da pa a mayparin kami a tobotoboyen nyo, kan inyahes da pa dyamen a machitōlag kamo dyamen. 12 Cha dyaw tināpay namenaya. Kahohoto paw do kakaro namenaw do bahay a mangay dyinyo. Ki chiban nyo pa, naypatwa kan nayohapong danaya. 13 As siraw bayon a lālat a inapno namen so palek, ki bayo paw do dāwri. Ki adan kan naychalkalka dana saya. Siraw laylay kan tokap namen saya, ki narotrotan dana saya do nakahay namen a kominwan dya,” kon da.

14 Dawa, rinawat dan Israelita saw kadwan saw a kanen a yapo dyira, ki nangdaw saba di ĀPO so balākad na. 15 Do dāwri, nachikapya si Joswe dyirad taga Gibeon saw kan pinalobōsan na sa a mabyay. As siraw pangpangōlo daw no Israelita, ki nachion sa.

16 Nakahabas tatdo a karaw do katayoka da a nachikapya dyirad taga Gibeon, nadāmag da a kaaroba da sawen sa kan omyan sa a masngen dyira. 17 Dawa, siraw Israelita saw, ki nangay da chiniban an oyod, kan do chatatdo naw a karaw, nakarapit sa do idiidi da saw no omyan do Gibeon, Chepirah, Beerot, kan Kiryat-jearim. 18 Ki dinarop da saba no Israelita saw, ta nagsapata saw pangpangōlo di ĀPO a Dyos no Israel.

Do dāwri, dinabadabay da tabo no Israelitaw pangpangōlo da saw. 19 Ki tinbay dan tabo pangpangōlo saw a kon da, “Insapata namen dana do salapen ni ĀPO a Dyos no Israel. As sichangori, maparin paba a saliden namen sa. 20 Nyaw parinen namen dyira: Palobōsan namen sa a mabyay a maynamot do insapata namen. Ta an dyi namen a parinen komwan, dosāen nanchi yamen no Dyos. 21 On, palobōsan namen sa a mabyay, ki machita daw mangasdasda so kayokayo kan mamoranom so para dyaten a tabo.” Dawa, naparin dana akmas binata daw no pangpangōlo saw.

22 Sinpangan na, tinawagan sa ni Joswe siraw taga Gibeonaw. As inyahes na dyira a kāna, “Āngo ta sinikāpan nyo yamen, kan inbahey nyo a yapo kamo do mateng? Ki no kaoyodan na, omyan kamwaya sawen do masngenaya. 23 Maynamot ta pinarin nyo komwan, nabay kamo na. Nāw nyo na abos pandan a adīpen a mangasdasda so kayokayo kan mamoranom para do pagdaydayāwan no Dyos ko.”

24 Inatbay da a kon da, “Pinarin namen komwan, ata, nadāmag namenaw a oyod a si ĀPO a Dyos nyo, ki inbilin na di Moyses a pachirawatan na a itoroh na dyinyo intīro a tana kan dimanen nyo sa tabo tawotawo do kwanan nyo. On, pinarin namen nyaya do taywara a nakāmo namen dyinyo kan kabonchi no byay namenaya. 25 Sichangori, ari kami na do kāsi nyo. Parinen nyo dyamen aran āngo ibidang nyo a kosto kan malinteg dyinyo.” 26 Dawa, insalākan na sa ni Joswe, kan pinalobōsan na sabaw Israelitaw a mangdiman sira. 27 Aran komwan, pinayparin ni Joswe a adīpen saw taga Gibeonaw a nāw darana mangasdasda so kayokayo kan mamoranom para dyirad tawotawo no Israel kan do altaraw ni ĀPO. Mandas changori, tinongtong daw nya tarabāko do yanan a pinidi ni ĀPO a pakaidaydayāwan sya.