12
Siraw Ar-āri a Inābak ni Moyses
1 Siraw tawotawo no Israel, ki nasākop darana iyaw tana do dayāen no Oksong Jordan a yapo do payahosongan no Arnon a manda do ammyānan do Tokon a Hermon*12:1 Tokon Hermon, ki mamangket do syodad a Damasco. kontodo tabo tana do dayāen Araba. Inābak da saw dadwaw a āri. 2 No asa a āri, ki si Sihon a āri dan Amoreo†12:2 Nom. 21:21-30; Deot. 2:26-37 a nangitoray yapo do Hesbon. Ki iyaw pagtorayan naw, ki yapo do Aroer do payis no payahosongan no Arnon, kan yapo do hobok no payahosonganaw a manda do Oksong a Jabbok a iyaw pandan dan Ammonita, as kan nairāman godwa no tana a Gilead. 3 Intorayan na paw dayaēn Araba a yapo do Minānga a Kinneret‡12:3 Mana “Minānga a Galilya”. a kominwan do abagātan do Bet-jesimot do dayāen no Nadiman a Tāw, kan kominwan do atngeh no Tokon Pisga.
4 Siraw tawotawo no Israel, inābak da pa si Og a āri do Basan§12:4 Nom. 21:33-35; Deot. 3:1-11 a iya asa dyirad kapanawdyanaw a kapotōtan dan Repaim.*12:4 Siraw tawotawo a Repaim, ki makakarang sa. Deot. 2:10, 20; 3:11 Nangitoray yapo do Astarot kan Edrei. 5 Ki iyaw pagtorayan naw, ki nairāman Tokon a Hermon, Salekah, kan tabo no Basan a manda no payis no Gesor kan Maakah, kan godwa no tana a Gilead a manda no payis no tana ni Āri Sihon do Hesbon.
6 Si Moyses a pachirawatan ni ĀPO kan siraw Israelita saw, ki inābak da no nya dadwa a āri. Intoroh ni Moyses tana da dyirad trībo saw a Ruben, Gad, kan Mamandāya a Manasses, a pinakabinglay da.
Siraw Ar-āri a Inābak ni Joswe
7 Si Joswe kan siraw tawotawo no Israel, ki inābak da saw tabo ar-āri do tana do laōden no Oksong Jordan a yapo do Baal-gad a myan do Payahosongan Lebanon a manda do Tokon a Halak a myan do abagātan a masngen do Seir. Pinaychakarwa ni Joswe iyaw nya tana dyirad trībo saw, kan intoroh na dyira a pinakabinglay da. 8 Iyaw nya binglay da, ki nairāman no katokotokonan, paytoytokonan saw do lāod, do tana a Araba kontodo barikir saw, do let-ang, kan do tana no Negeb. Siraw minyan do nya saya tana, ki siraw Heteo, Amoreo, Kananeo, Pereseo, Hibeo, kan Jeboseo. 9 Siraw tawotawo no Israel, ki inābak daw kāda āri do kāda idi a Jeriko, Ai a masngen do Betel, 10 Jerosalem, Hebron 11 Jarmot, Lachis 12 Eglon, Geser 13 Debir, Geder 14 Hormah, Arad 15 Libna, Adollam 16 Makkeda, Betel 17 Tappoah, Heper 18 Apek, Lasaron, 19 Madon, Hasor, 20 Simron-meron, Aksap, 21 Taanak, Megiddo, 22 Kedes, Jokneam do Karmel, 23 Dor do aptan, Goiim do Galilya,†12:23 Mana do Gilgal. 24 kan Tirsa. Tabo nya saya āri, ki tatdo a poho kan asa.