1 Iyaw tana a pinakabinglay no trībo no Joda sigon do kāda partīdos, ki nakarapit do payis no Edom kan do Let-ang a Sin do katetenganaw a abagātan. 2 Iyaw abagātan a payis na, ki yapo do tokaran Nadiman a Tāw, 3 as katongtong na do abagātan a yapo do Ayayaman a Akrabbim a mangay do let-ang a Sin, as katongtong na do abagatānen no Kades-barnea a homabas do Hesron kan somonget a komwan do Addar, as karikos na do Karka. 4 Yapo dawri, habasan naw Asmon, as omonor do Oksong no Egipto a mohtot do Mediterranean a Tāw a pachipanda na. Nyaw abagātan a payis no trībo no Joda.

5 Iyaw payis na do dāya, ki iyaw Nadiman a Tāw a manda do ahtotan no ranom no Oksong Jordan.

Iyaw payis na do ammyānan, ki nangrogi do wangawangan no oksong a Jordan, 6 somonget do Bet-hogla, as katongtong na do ammyānan no Bet-araba a mangay do Bato ni Bōhan a pōtot ni Ruben. 7 Do dāwri, somonget do Debir a yapo do Payahosongan Akor, kan magpaammyānan do Gilgal a somalap do Ayayaman a Adommin a myan do mangket no abagātan no payahosongan. Tinongtong na a inonotan iyaw ranom no En-semes a mohtot do En-rogel 8 Somarono, somonget do Payahosongan Ben-hinnom do abagātan no barikir no Jeboseo a idi a logar no Jerosalem. Yapo dawri, somonget do tōtok no tokon do lāoden no Payahosongan Hinnom a myan do pandan ammyānan no Payahosongan Repaim. 9 Yapo do tōtok no tokon a manda do akbod do ranom no Neptwa, minohtot do idiidi saw no Tokon a Epron kan minosok a kominwan do Baala a mayngaran so Kiryat-jearim. 10 Do dāwri, nagrikos a magpalāod a yapo do Baala a mangay do Tokon a Seir, as nagpaammyānan do barikir no Tokon a Jearim mana Kesalon. Do dāwri, minosok do Bet-semes, kan habasan naw Timna. 11 Do dāwri, tinongtong do barikir a ammyānan Ekron, naypachicho a mangay do Sikkeron, habasan naw Tokon a Baala, kan mangay do Jabneel. As no pandan na, ki do Mediterranean a Tāw 12 a nawriw payis na do lāod.

Do irahem no nya saya payis, minyan saw tawotawo no Joda sigon do kāda partīdos da.

13 Sigon do bilinaw ni ĀPO di Joswe, intoroh na di Kaleb a pōtot ni Jeponne pinakabinglay na a yapo do tāwid no trībo no Joda. Rinawat ni Kaleb idi a Hebron mana Kiryat-arba a yapo do ngaran ni Arba*15:13 Jos. 14:15 a āmang ni Ānak.†15:13Nomiro 13. Siraw tawowaw a Ānak, ki makakarang sa. Si Kaleb nangpaksyat siras tatdwaw a partīdos do kapotōtan Ānak (Ok. 1:20), as kan kadwan dyiraw nayyayo a nangay a omyan do tana dan Pilisto do syiyodad a Gat. Asa a yapo do kapotōtan da, ki siganti a Golayat a diniman Dabid (1 Sam. 17). 14 Do Hebron, pinaksyat ni Kaleb saw kapotōtan ni Ānak a siraw partīdos no Sesai, Ahiman, kan Talmai. 15 Yapo dawri, nangay a nangraot siras tawotawo a minyan do Debir mana Kiryat-seper a ngaran na do sīgod. 16 Binata ni Kaleb a kāna, “Aran sino a mahakay a makasākop so Kiryat-seper, ipakabahay konchi dya si Aksa a balāsang ko.” 17 As si Otniel a pōtot ni Kenas a kakteh ni Kaleb, sinākop naw idyaw. Dawa, inpakabahay dya ni Kaleb si Aksa a balāsang na.

18 Do arawaw a nakaipatodah ni Kaleb si Aksa di Otniel a pachikabahayan na, pinakaolit ni Otniel di Aksa a mangdaw so bengkag di āmang na.‡15:18 Do kadwan saw a manyoskripto, batahen a “pinakaolit ni Aksa di Otniel a mangdaw di katogāngan naw”. Do nakagchinaw ni Aksa do asno, inyahes ni Kaleb dya, “Anak ko, aryoriw chakey mo?”

19 Initbay na a kāna, “Āmang, mangdaw ako pa dyimo so bindisyon. Maynamot ta intoroh mo na dyaken mabkohaw a tana do Negeb, itoroh mo pa dyaken akbod saw.” Dawa, intoroh ni Kaleb dyaw akbod saw do ato naw kan do ibaba naw.

20 Nyaw tana a pinakabinglay no trībo no Joda sigon do kāda partīdos da. 21 Siraw nyaw kaaabagatānan a idiidi no trībo no Joda do Negeb a masngen do payis no Edom: Kabseel, Eder, Jagor, 22 Kina, Dimona, Adada, 23 Kedes, Hasor, Itnan, 24 Sip, Telem, Bealot, 25 Hasor-hadatta, Keriot-hesron a matawagan so Hasor, 26 Aman, Sema, Molada, 27 Hasar-gadda, Hesmon, Bet-pelet, 28 Hasar-soal, Beerseba, Bisiotia, 29 Baala, Iim, Esem, 30 Eltolad, Kesil, Hormah, 31 Siklag, Madmanna, Sansanna, 32 Lebaot, Silhim, Ain, kan Rimmon. Dadwa poho kan sasyam a tabo idiidi kan siraw sīcho da saw.

33 Siraw nya idiidi saw do paytokotokonan saw do lāod: Estaol, Sora, Asna, 34 Sanwa, En-gannim, Tappoa, Enam, 35 Jarmot, Adollam, Sokoh, Aseka, 36 Saaraim, Aditaim, Gedera, mana Gederotaim.§15:36 Mana “Gedera kan Gederotaim”. Asa poho kan apat no bidang no idiidi kontodo siraw sīcho da saw.

37 Myan paw idiidi a Senan, Hadasa, Migdal-gad, 38 Dilean, Mispa, Jokteel, 39 Lachis, Boskat, Eglon, 40 Kabbon, Lahmam, Chitlis, 41 Gederot, Bet-dagon, Naama, kan Makkeda. Asa poho kan anem no bidang no idiidi kontodo siraw sīcho da saw.

42 Myan paw Libna, Eter, Asan, 43 Ipta, Asna, Nesib, 44 Keila, Aksib, kan Maresah. Sasyam no bidang no idiidi kontodo siraw sīcho da saw.

45 Nairāman paw Ekron kontodo siraw idiidi kan siraw sīcho da saw. 46 Yapo do Ekron a manda do Mediterranean a Tāw, nairāman tabo idiidi a masngen do Asdod kontodo siraw sīcho da saw. 47 Nairāman Asdod kan Gasa kontodo idiidi da saw kan siraw sīcho da saw manda do Oksong no Egipto kan do aptan no Mediterranean a Tāw.

48 Do katokotokonan, siraw idiidi daw, ki Samir, Jattir, Sokoh, 49 Dannah, Kiryat-sanna mana Debir, 50 Anab, Estemoh, Anim, 51 Gosen, Holon, kan Giloh. Asa poho kan asaw no bidang no idiidi kontodo siraw sīcho da saw.

52 Myan paw Arab, Doma, Esan, 53 Janim, Bet-tappwa, Apeka, 54 Homtah, Kiryat-arba mana Hebron, kan Sior. Sasyam no bidang no idiidi kontodo siraw sīcho da sa.

55 Myan paw Maon, Karmel, Sip, Jotta, 56 Jesreel, Jokdeam, Sanwa, 57 Kain, Gibea, kan Timna. Asa poho no bidang no idiidi kontodo siraw sīcho da saw.

58 Myan paw Halhol, Bet-sor, Gedor, 59 Maarat, Bet-anot, kan Eltekon. Anem no bidang no idiidi kontodo siraw sīcho da saw.

60 Myan paw Kiryat-baal mana Kiryat-jearim kan Rabba. Dadwa idiidi kontodo siraw sīcho da saw.

61 Do let-ang myan Bet-araba, Middin, Sekaka, 62 Nibsan, iyaw Idi no Asin, kan Engedi. Anem no bidang no idiidi kontodo siraw sīcho da saw.

63 Ki aran komwan, siraw tawotawo no trībo no Joda, ki maparin daba paksyaten saw Jeboseo a minyan do Jerosalem. Siraw Jeboseo, ki machiyan pa sa do tawotawo no Joda mandas changori.