5
1 Tawotawo no Jerosalem, isagāna nyo bōyot nyo saw,
ta nadibon ta na no kabōsor.
Baōtan danchi so baston iyaw mangitoray no Israel
do pisnyi na tan asnesnekan da.
No Naikari a Mangitoray a yapo do Betlehem
2 Bata ni ĀPO a kāna, “Imo a Betlehem Epratah
a aran dēkey ka dyirad partīdos no Joda,
ki yapo dyimo, mohtot anchiw asa a mangitoray so Israel
a no kapoonan na yapo do kaychōwa pa.” *5:2 Mt. 2:6
3 Dawa, iparawat nanchi ni ĀPO tawotawo na dyirad kabōsor da
a mandan mayanak no mabakesaw iyaw anak naw.
Sinpangan na, maybidi sanchiw kakabagyan naw a naakaw,
kan machirapa dana sanchi dyirad tawotawo no Israel.
4 Anchan mangay, maytēnek†5:4 No chakey na batahen no maytēnek, ki “machilāban” mana “machisidong”. Ki an maydisna, ki “mangokom”. a mangidaōlo dyirad tawotawo na
a maynamot do bīleg a yapo di ĀPO
kan do dayag no ngaran ni ĀPO a Dyos na.
Siraw tawotawo, ki maybibyay dana sanchi a matalna,
ta dāwrinchi, iyaw dayag na, ki romapit do intīro a lōbong.
5 Iya dananchiw pakayapwan kapya da.
No Kawayawaya kan Kadōsa
Anchan raoten dan taga Assirya iyaw nasyon taya,
as tomokap sa do tana taya,
mapatēnek ta so papito a mangidaōlo‡5:5 Do chirin Hebreo, ki “magpaspastor”. kontra dyira
mana wawaho§5:5 No chakey na batahen papito kan wawaho, ki “komplito”. a pangpangōlo no tawotawo.
6 Itorayan darananchiw tana a Assirya do ispāda,
kan asdepen daw rowanganaw no tana ni Nimrod.*5:6 Gen. 10:8-11
Iyaw āri taya, ki isalākan nanchi yaten dyirad taga Assirya
anchan raoten da yaten kan lomasag do yanan taya.
7 Siraw nakalāsat saw do kapotōtan ni Jakob,
ki maychawpit sanchi dyirad āro a nasnasyon.
Akma sanchiw apon a yapo di ĀPO,
kan akma say chimoy a mangsibog so katamtamkan
a dya manghahaw do tawo mana mangnanaya so tawotawo.
8 As siraw nakalāsat saw a kapotōtan ni Jakob,
ki myan sanchi do payapayawan dan nasnasyon do naychawpitan daw.
Akma sanchiw lion do yanan dan animal saw do kahasan,
kan akmay bomaro a lion do yanan dan arban a karniro
a manggammat an homabas, kan piripiriten naw mahap naw,
kan aba polos makaisalākan sya.
9 Abāken anchi no Israel kabōsor na saw,
kan tomawos sanchi a tabo mangipsok sya.
No Kapasanto ni ĀPO Tawotawo na
10 Bata ni ĀPO a kāna, “Do dāwri a araw,
“dimanen ko sanchiw kabalyo nyowaw,
kan rārayawen konchi a tabo logan nyowaw a pachigobat.
11 Rārayawen ko sanchiw syodad do tana nyo,
kan rakraken ko sanchiw pagkamītan nyo saw a gwardyado.
12 Akteben ko nanchiw kapanolib nyo,
kan apabanchiw mamadto nyo.
13 Rārayawen ko sanchiw didyosen nyo saw
kan siraw bata nyo saw a masantwan a parey a bato a pagdaydayāwan nyo
tan dyi kamonchi a makapagdaydāyaw a polos
do pinarin no bōkod nyo a tanoro.
14 Bagoten konchi dyinyo posti da saw a pagdaydayāwan no dyosa a Asera,†5:14 Asera, ki dyosa a mananaken kono.
kan rārayawen ko sanchiw syodad nyo.
15 Do taywara a kasoli ko, bahsen ko sanchiw
nasyon a dya magtongpal dyaken.”
*5:2 5:2 Mt. 2:6
†5:4 5:4 No chakey na batahen no maytēnek, ki “machilāban” mana “machisidong”. Ki an maydisna, ki “mangokom”.
‡5:5 5:5 Do chirin Hebreo, ki “magpaspastor”.
§5:5 5:5 No chakey na batahen papito kan wawaho, ki “komplito”.
*5:6 5:6 Gen. 10:8-11
†5:14 5:14 Asera, ki dyosa a mananaken kono.