1 Sinpangan na, minirwa dana somindep si Jesos do sinagoga da daw, kan myan daw asa mahakay a singkol. 2 Myan pa daw tawotawo saw a omsisiim di Jesos an pyahen naw nawri a mahakay do Araw a Kapaynaynahah tan myan pamagatosan da sya. 3 Do dawri, binata ni Jesos do nagsingkolaw, “Maytēnek ka pa dya do kasalasalapanaya.”

4 Sinpangan na, inyahes ni Jesos dyirad tawotawo saw daw a kāna, “Āngo chakey no linteg a parinen an marapit Araw a Kapaynaynahah: kasidong mana kapangranggas, kapangisalākan mana kapangdiman?” Ki abaw nakalilyak dyira.

5 Do dawri, pinakasisirem sa ni Jesos a insoli, as kan chinaynyin no aktokto naw katwaw no oho da. Sinpangan na, binata na do mahakayaw a singkol a kāna, “Lonaten mo tachay mwaya.” Do dawryaw a inbahey ni Jesos, linonat na kan nyeng a napyan.

6 Ki maynamot do nyaya, minohtot saw Parisyowaw do sinagoga, kan nyeng sa nagplāno kan siraw no nanawhen naw ni Āri Herodes an maypāngo iyaw no kadiman das Jesos.

7 Sinpangan na, domnitchan sa Jesos kan siraw nanawhen naw, kan nangay sa do payisaw no minanga. Ki minonot saw reprep saw a tawotawo a yapo do probinsya naw a Galilya kan 8 do Jerosalem, as kan do probinsyaw a Jodya kan Idomya kan do kabtangaw no Oksong a Jordan, as kan aran siraw no logaraw a masngen do syodad nad Tiro kan do Sidon. Tabo san nyaya tawo, ki nangay sad Jesos, ta nadāmag da saw pariparinen naw. 9 Ki maynamot do kāron tawo, inbahey ni Jesos dyirad nanawhen naw a isagānaan das abang tan dyi da masdin no tawotawo saw, 10 ta āro pinapya na tawotawo, as kan nawriw naynamotan paysinpapadoydoyan dan maychagaganyitaw a maypasngen a omsalid sya. 11 Kāda maboya da si Jesos no tawotawo saw a sindepan marahet a ispirito, ki maysasakeb sad salapen naw, as kapangagay da a kon da, “Imo Anakaw no Dyos.” 12 Ki inmandar na dyira a dyi da ibahebahey an sino iya.

13 Sinpangan na, somnonget si Jesos do asaw a tokon. Tinawagan na saw no chakey naw a tawo, kan minonot sa dya. 14 Namidi dyira so asa poho kan dadwa mahahakay tan sira danaw rārayay na as kan tan toboyen na sa a mangay a mangasaba. 15 Tinorohan na pa sa so toray a mangpaksyat so marahet saw a ispirito.

16 No ngarangaran dan nya sa pinidi ni Jesos, ki sa Simon a pinangaranan ni Jesos so Pedro, 17 siraw maykaktehaw a sa Santiago kan ādi na a si Juan a anak ni Sebedeo. Siraw nya maykakteh, ki pinangaranan san Jesos so “Boanerges,” as kan no chakey na batahen ki, “akmay adey.” 18 As pinidi na pa sa Andres, Pilipi, Bartolome, Matchew,*3:18 Mana “si Lebi.” Tomas, Santiago a anak ni Alpeo, Tadeo, Simon a mangispal so kaidyan na, 19 kan si Jodas a yapo do Iskariote, iyaw nyaw nanglipotaw di Jesos.

20 Sinpangan na, somnabat sa Jesos. Ki do dawri, minirwa dana naychipeh daw tawotawo saw, kan maisanga na paba kan siraw nanawhen naw koman. 21 Ki do nakadāmag daw syan pamilya naw, nangay sa tan hapen da, ta batahen dan kadwan dyira a magattit dana konos Jesos.

22 As siraw mangnanawowaw so linteg a minosok a yapo do Jerosalem, ki binatabata da a kon da, “Sindepaya ni Beelsebob. On, iyayaw pangōlo daw no dimonyo saw manorotoroh dyas bīleg a mangpaksyat so marahet saya ispirito.”

23 Ki tinawagan san Jesos tawotawowaw, as nakapagpangārig na dyira a kāna, “Maypāngo kapaksyat ni Satanas so mismo na inawan?” inyahes ni Jesos. 24 “An mayayarap saw tawotawo do asa kapagaryan, manayonoriw nawri a pagaryan? 25 Masaw asa kapamilya an maglalaban sa, masigorādo a masisyay sanchi. 26 Komwan pa saw myanaw do pagāryan ni Satanas an maglalaban sa, ki masisyay sanchi. Ta an maysinrarārayaw saw bonggoy naw, makapaytēnek pa saba, kan narapit danaw tawsan da.

27 “Abaw tod a makasdesdep do irahem no bahay no mayit a tawo a akmas Satanas kan manakanakaw siras dyira na saw, an dyi pa manma mabahod nya mayit a tawo. Amnan nabahod dana, libri danaw tod a manghap siras dyira na saw. 28 Oyod nya ibahey ko dyinyo maparin a mapakawan tawotawo do tabo a pakagatosan da, kan mapakawan saw maychirin so maikontra do Dyos. 29 Ki aran sino a maychirin so maikontra do Ispirito Santo, mapakawan aba polos tawowaw do nawri a gatos, ta gatos a abos pandan.” 30 Chinirin ni Jesos nyaya maynamot do kabata daw syan mangnanawowaw so linteg a sindep kono no marahet a ispirito.

31 Sinpangan na, nawara si ānang ni Jesos kan siraw kakakteh naw a mahahakay. Naytēnek sa do atataw no bahay, as nakapanoboy das nangay a omtawag sya. 32 Dawa, siraw tawotawo saw a naychadisdisna a mindibon sya, ki inbahey da dya a kon da, “Ari saw sa ānang kan ādi mo saw do gagan a maychichwas dyimo!”

33 Ki inatbay san Jesos a kāna, “Sino saw ānang ko kan kakakteh ko?” 34 Ki sinpangan na,, chiniban san Jesos myanaw do omdibon naw, as nakabata na sya, “Cha saya dyaw ānang kan kakakteh ko, 35 ta aran sino a mamarin so pagayatan no Dyos, iya danaw kakteh kan ānang ko.”