No Libro A Nahom
No Pakatonngan so Paytābwan no Nya Libro
Nya libro, ki daniw a nangipadto so karārayaw no Ninebeh a sintro no nasyon a Assirya. (Sichangori, ki payayahapan dan nasyon a Sirya, Turkey, Iraq, kan Iran.) Siraw tawotawo do dyaya nasyon, ki oltimo sa so karanggas kan kapangas, ta rinārayaw da saw syodad, sinamsam daw warawara da, kan an maypisa, intābon da saw kabōsor da a sibibyay. Siraw bōyot da, sinākop daw kadwan saw a nasyon a nakairamānan kadwan a tana no nasyon a Israel (721 B.C.) kan kadwan a tana no Egipto (663 B.C.). Pinādas da a sakōpen nasyon a Joda, ki inparārayaw no Dyos soldādo saw no Assirya (701 B.C. Chiban nyo do Isayas 36-37). Aran komwan, siraw taga Assirya, ki nāw da mabīleg kan nayparin sa a makamwamomo a kabōsor dan tawotawo no Dyos a minyan do Joda.
Si Jonas a asa propīta, nangay do Ninebeh sigōro 150 katawen sakbay no nya padto. Do dāwri, nagbabāwi saw taga Ninebeh do nakadngey daw so minsāhi a rārayawen nanchi ni Āpo Dyos syodad daw a maynamot do gatogatos da. Ki do chimpo ni Nahom, minirwa dana sa a taywara a maygaygatos. Dawa, inpadto ni Nahom a arabaw namnāma no syodad a Ninebeh, kan maparin pa saba a domitdit do īto a karārayaw da. Nyaw paynamotan na a iyaw Dyos a masantwan, machita na dosāen marahet saw a kabōsor dan tawotawo na. Iyaw minsāhi a inpadto ni Nahom, ki taywara a inahwahok na saw tawotawo no Joda. No nakarārayaw no syodad a Ninebeh, ki natongpal do nakangay daw no taga Medes kan taga Babilonya do tawen a 612 sakbay a naiyanak si Āpo Jesos.
No Naychakarwan no Nya Libro
No nakaikeddeng no Ninebeh (1:1-15)
No padto no karāryayaw no Ninebeh (2:1-3:19)
Nahom
1
1 Nyaw minsāhi maynamot dyirad taga Ninebeh* 1:1Ninebeh, iyaw sintro no nasyon a Assirya do tawen 663 a mandad 612 sakbay no nakaiyanak ni Kristo. a inpaltiing ni ĀPO di Nahom a taga Elkos.
No Kasoli ni ĀPO Dyirad Taga Ninebeh
2 Si ĀPO, ki mangīmon kan mamahes a Dyos.
Si ĀPO, ki mamahes kan mapno so kasoli.
Si ĀPO, ki mamahes dyirad komontra dya,
kan isagāna naw soli na dyirad kabōsor na.
3 Si ĀPO, ki malisto aba makasoli, ki abaw akmas kabīleg na.
Mainonolay na saba polos nakagatos a dya madōsa.
No ayaman ni ĀPO, ki myan do alipogpog kan bagyo,
as siraw demdem, ki akmay ahbek no kokod na.
4 Mangilyak so tāw, ki mayachan,
as kan abkohan na paw ok-oksong saw.
Do Basan kan Tokon a Karmel,† 1:4 Myan do Basan magdindināmag saw a pagpastoran, kan do Tokon a Karmel, maabōno tana daw. ki mahayo mohamoha.
As makolay dana saw sabong do Lebanon.‡ 1:4 Do Lebanon, myan saw matotohos a tokotokon, kan magdindināmag sidro a kayokayo. Okom. 9:15; Sak. 11:1-2
5 Siraw tokotokon, ki magoyogoyon sa a maynamot dya,
as kan maloyo saw paytoytokonan.
Iyaw tanaya, ki magin-gined do salapen na,
as kan tabo tawotawo, ki maychamirpirpir.
6 Sino paro makapaytēnek do oltimo a soli na?
Sino paro makaibtor so karanggas no soli na?
Iyaw taywara a kasoli na, ki bomtak§ 1:6 Do chirin Hebreo, ki “mado”. a akmay apoy,
kan siraw bato, ki makchikchid sa do salapen na.
7 Si ĀPO, ki maganay,
salōkob do chimpo no riribok.
Aywanan na sa tabo machikāmit dya.
8 Ki do mapaboswang a layos,
lyoden na sanchiw komontra dya do kadimanan da,
as kan lakatan na sanchiw kabōsor na do kasaryan.
9 Aran āngo pangta da di ĀPO, ki akteben na sa.
Makapirwa pabaw mangriribok sya.
10 Ta akma saw napitipitan kamanadyit,
kan nabok sa do kaynoynom da.
Masosohan sanchi a akmas nabkohaw a garami.
11 Yapo dyinyo a taga syodad a Ninebeh,
minohtot nangipangta so kontra di ĀPO,
kan namagbaga so marahet.
12 Nyaw bata ni ĀPO dyirad tawotawo naw a Joda a kāna,
“Aran mabīleg kan āro saw taga Assirya,
ki alit na marārayaw kan mabo sanchi.
Aran do nakarahan, dinōsa koynyo, inyo a Joda,
ki pirwahen ko pabanchi inyo a dosāen.
13 Changori, pototen ko naw pāko do lagaw nyo,
as kan alngaten ko saw kadina a pinangigālot da dyinyo.”
14 Nyaw inbilin ni ĀPO a maynamot dyirad taga Ninebeh* 1:14 Mana “dyimom (Āri no) Ninebeh”. a kāna,
“Apabanchiw kapotōtan nyo a mangosar so ngaran nyo.
Rārayawen ko sanchiw didyosen nyo do timplo dan dyos nyo,
kan isagāna konchiw tanem nyo,
ta maikari kamo aba maybibyay.”
15 Inyo a tawotawo ko do Joda, chiban nyo do tokotokon saya,
ta īto danaw toboyen kwaw a mangyangay so maganay a dāmag
a mangipakatoneng so maynamot do kapaychapya!
Isagāna nyo a silibaren saw pista nyo, inyo a tawotawo a Joda,
as kan tongpalen nyo insapata nyo do Dyos.
Siraw marahet, polos a dyi dana sa mirwa a mangraot dyinyo,
ta marārayaw sanchi a golpi.
*1:1 1:1Ninebeh, iyaw sintro no nasyon a Assirya do tawen 663 a mandad 612 sakbay no nakaiyanak ni Kristo.
†1:4 1:4 Myan do Basan magdindināmag saw a pagpastoran, kan do Tokon a Karmel, maabōno tana daw.
‡1:4 1:4 Do Lebanon, myan saw matotohos a tokotokon, kan magdindināmag sidro a kayokayo. Okom. 9:15; Sak. 11:1-2
§1:6 1:6 Do chirin Hebreo, ki “mado”.
*1:14 1:14 Mana “dyimom (Āri no) Ninebeh”.