No Libro A Obadyas
No Pakatonngan so Paytābwan no Nya Libro
Abaw rakoh a chapatak ta a maynamot di Obadyas, as kan chapatak aba an kāngo nakaitolas no nya dēkey a libro. Ki no pandan chapatak ta, ki intolas ni Obadyas do nakatayokaw no nakarārayaw no Jerosalem do tawen 586 B.C. Do naparinaya do Jerosalem, chinasoyot no nasyon a Edom a myan do abagātan a dāyaen a nahay dana kabōsor da no tawotawo no Joda. Ginondawāyan na paw syodadaya a Jerosalem, kan sinamsam na saw warawara naw, kan sinidongan na paw nasyonaw a nangsākop sya. Inpadto ni Obadyas iyaw kadōsa no Edom kan kaābak na, magrāman saw nasnasyon saw a kabōsor no Israel.
No Naychakarwan no Nya Libro
No kadōsa no Edom (1-14)
No araw ni ĀPO (15-21)
Obadyas
1
1 Nyaw inpaltiing ni Āpo a DYOS di Obadyas a maynamot do nasyon a Edom.
Dosāen Anchi ni ĀPO Siraw Tawotawo do Edom
Tinoboy ni ĀPO iyaw minsahīro naw dyirad nasnasyon saw,
kan nadngey namen minsāhi na a kāna,
“Magsagāna kamo! Mangay ta machigobat kontra do Edom!”
2 Bata ni ĀPO do Edom a kāna, “Payparinen koymo a sinsinan,
as taywara anchiw kaidadanes da dyimo.
3 Inallīlaw naymo no kapangas mwaya, imo a machilibeng do kōta a bato.
Nya logar mo, ki do katokotokonan.
Batahen mo do inawan mo,
‘Aryoriw makarawa a mangalnet tan masday ako?’
4 Aran tomodem ka akmas katohos no kasayap no kangkang,
kan aran maparin mo maybahay do kabitohenan,
alit na alneten konchimo a asdayen,” bata ni ĀPO.
5 “An mangay saw manakanakaw an mahep,
sira lang hapen daw chakey da.
An mamolas saw tawo so ōbas, myan paw bidinen da.
Ki kapakāsi nyo pa, ta hanyiben danchinyo no kabōsor nyo.
6 Inyo a kapotōtan Esaw,*1:6 Iyaw nasyon a Edom, ki yapo do kapotōtan Esaw. Gen 36:1, 8, 19 pohsen danchiw dyira nyo do aran dino a paytayotaywan nyo,
as madongso kan maāgaw anchi a tabo kinabaknang nyo.
7 Inallilaw daynyo no tabo kayban nyo.
Pinaksyat daynyo do bōkod nyo a nasyon.
Siraw tawo a nachikapya dyinyo,
sakōpen darananchi inyo.
Siraw nachisīt a kinahanghang nyo,
mapangay sa so pangotap dyinyo,
kan mapoōtan nyo aba polos.
8 “Do dawrinchi a araw a kapangdōsa ko so Edom,
dimanen ko sanchiw masisīrib a tawo na,
kan ponasen konchi a tabo kinasīrib no Edom.
9 Mamirpir sanchiw taga-gobat no Teman,†1:9 Teman, ki asa masisita a idi do Edom. As do dyaya, ki pinakainawan no Edom.
kan tābo a yapo do Edom, ki madiman sa a abos kāsi,” bata ni ĀPO.
Siraw Rason An Āngo Ta Madōsaw no Edom
10 “Maynamot do nakaranggas mo so
kakabagyan mo a kapotōtan ni Jakob,
makneb kanchi so asnek,
kan marārayaw kanchi a abos pandan.
11 Ta tod ka naytēnek do arawaw
a nakarakrak da no kabōsor da sa so rowangan da saw.‡1:11 2 Ār. 25:4; Jer. 39:2
Maiyarig iyaw karahet mo dyirad gan-ganaet saw a mangsākop
a nangipayyayo siras kinabaknang no Jerosalem, kan nagbibingayan da.
12 Dyi ka pakono a masoyosoyot
do makasyāsi a pinasar no kakabagyan mo sa do Joda.
Dyi ka pakono a magragsak
do arawaw a nakarārayaw da.
Dyi ka pakono a magpangas
do arawaw a nakadidigra da.
13 Dyi ka pakono a somindep
do syodad dan tawotawo ko
tan masoyosoyot ka do nakalidyalidyat da,
kan nangsamsam siras kinabaknang da do araw no didigra da.
14 Dyi ka pakono a nangay do paykokorosan no rarahan
tan tiliwen mo saw maglības.
Dyi mo pakono sa inparawat dyirad kabōsor da,
do araw a kalidyalidyat da.”
Okomen Sanchi no Dyos Nasnasyon
15 “Masngen danaw araw a yaken a ĀPO,
ki mangokom anchi so tabo nasnasyon.
Imom Edom, maparin anchi dyimo akmas pinarin mo.
An āngo intoroh mo, nawrinchiw rawaten mo.
16 Akmas nakaynom nyo a siraragsak do yanan masantwan a paytokonan ko,
komwan anchiw kapaynom ko dyinyo kan siraw tabo nasnasyon
so makpakpad a kopa no kadōsa.
At-atkan nyonchi a mandan mawpas kamo a tabo.”
No Kapagballīgi no Israel
17 “Ki myan sanchiw makalības do Tokon a Sion,
kan mayparin anchi a masantwan a logar.
Madyira danchi a mirwa no tawotawo ni Jakob
iyaw tana a tāwid da.
18 Akma sanchiw apoy tawotawo da Jakob kan Jose.
Rārayawen da sanchiw tawotawo ni Esaw
a akmas karōnot no apoy so garami.
Abanchi a polos makalāsat a kapotōtan na.
Yaken a ĀPO naychirin so nyaya.”
19 “Siraw tawotawo a yapo do abagātan no Joda,§1:19 No “abagātan no Joda” mana “Negeb”.
ki sakōpen danchiw tokotokon saw do Edom.
Siraw myan saw do paytoytokonan do lāod,
ki sakōpen danchiw tana da no Pilisteo.
Sakōpen danchi iyaw tana dan Epraim kan Samarya,
as hapen danchi no kapotōtan ni Benhamin iyaw tana no Gilead.
20 Siraw naakawaw a nabahod a soldādo a yapo do ammyānanen no Israel,
maybidi sanchi kan sakōpen danchiw tana no Penisya
a manda do idi a Sarepat do ammyānan a parti na.
Siraw naakawaw a yapo do Jerosalem a myan do Separad,*1:20 Sichangori, ki chapatak ta ba an dino nyaya a logar.
ki sakōpen danchiw idiidi saw do abagātanen a parti no Joda.
21 Siraw mangab-ābakaw a tawo, somonget sanchi do Tokon a Sion,†1:21 “Tokon a Sion” mana Jerosalem.
kan itorayan danchiw tokotokon saw do Edom.
Si ĀPO anchi a mismo iyaw magāri!”
*1:6 1:6 Iyaw nasyon a Edom, ki yapo do kapotōtan Esaw. Gen 36:1, 8, 19
†1:9 1:9 Teman, ki asa masisita a idi do Edom. As do dyaya, ki pinakainawan no Edom.
‡1:11 1:11 2 Ār. 25:4; Jer. 39:2
§1:19 1:19 No “abagātan no Joda” mana “Negeb”.
*1:20 1:20 Sichangori, ki chapatak ta ba an dino nyaya a logar.
†1:21 1:21 “Tokon a Sion” mana Jerosalem.