2
No Kapakombaba kan Katoray ni Kristo
1 Kakakteh, chapatak ko a naypayit danaw aktokto nyo a maynamot do kapachichasa nyod Kristo, as kan naparagsak kamo na do adaw na. Masaw a chapatak ko a myan danaw kapachasa nyo do Ispirito, kan myan danaw adaw nyo kan kāsi nyo a somidosidong dyirad katakatayisa dyinyo. 2 Dawa, machikakaāsi ako dyinyo a pasoyoten nyo pakono yaken a maynamot do kasa nyo do aktokto, adaw, kan panggep. 3 Mamarin kamo abas aran āngo a maynamot do kasinyat mana kapangas, basbāli a maysinpapakombaba kamo kan ibidang nyo saw kadwan a masissisīta kan inyo. 4 Nawri aba lang chichiban katakatayisa dyinyo bōkod na kaganayan, basbāli a machita chiban nyo paw kapyan kadwan. 5 Akma kamo pakono so kapangtoktwaw ni Kristo Jesos.
6 Ta aran sīgod a mayengay sa Kristo kan Āpo Dyos,
ki nawri abaw chintokto na iyaw nāw na mangigpet
so katan-ok na kan katoray na,
7 basbāli a kinarwan naw nawri a kayayan na do bōkod na pagayatan,
kan pinayparin naw inawan na a akmay adīpen.
Nayparin a tawo, kan naybibyay a kaparpariho no tawo.
8 As do nakapayparin naranaw a tawo,
ki chintokto naba polos iyaw kapatohos nas inawan na,
basbāli a sitotolok a nangiparawat so inawan na a madiman
a akmas bilinaw ni Āmang na a aran chakey na batahen a mailansa do kros.
9 Dawa, maynamot do dyaya pinarin na,
ki pinatohos no Dyos do katotohosanaw a toray,
kan intoroh na dyaw āwag a matwatohos a adayo kan āwag no aran sino.
10 Ta anchan mabnek ngaranaya ni Jesos, ki maydogod sanchi
a magdaydāyaw tabo a naparswa do hanyit, do tanaya,
kan siraw myanaw do yanan kadiman.
11 On, ipodno danchi a tabo a si Jeso-Kristo, ki Āpo do tabo,
kan tan komwan, dayāwen das Āpo Dyos a Āmang ta.
No Kapaysēdang Ta a Akmay Soho do Lōbongaya
12 As dawa, inyo a chadaw kwa sīt, an maypāngo kapagtongpal nyo do innanawo ko do kayan ko paw dyinyo, ad-adda pakono kapagtongpal nyo sichangori a aran abo ako na dyinyo. Tongtongen nyo pakono kapagtongpal nyo so bilbilinaw ni Kristo a mapawnotan so kāmo nyo a mapaynyin so Dyos. On, ipasnek nyo kapagtongpal nyo do Dyos a mandanchan katayoka na tabo so chakey na a parinen do byay nyo a nawriw kaisalakānan nyo. 13 Ta si Āpo Dyos a mismo iyaw pirmi a myan dyinyo a mangitoroh so kakey kan kabaelan nyo a mangtongpal so chakey na.
14 Parinen nyo tabo a bilin na dyinyo a dyi kamo a maydabadabay mana maydidiman. 15 Tan komwan, ki abaw mabata da maynamot dyinyo kan tan madadas kamo a anak no Dyos a abos pakapilāwan do kabyay nyowaya do madyīdo kan āros gatos a tawotawo. Mayparin kamo pakono a soho da a akmas kasēdang daya no bitohen saya do tohos,*2:15 Mt. 5:14-16 16 do kaibahey nyo dyira so Maganay a Dāmag a maynamot do byay da a abos pandan. Tan komwan parinen nyo, ki myan anchiw paynamotan ko a mangipangas dyinyo anchan araw a kapaybidi ni Kristo, as kan tan sayang abanchiw nakapayhohopag kwaya dyinyo.
17 Iyaw kapanganohed nyowaya, ki akmas dātonaw a mangahwahok so Dyos. An chakey na a rapan so kadiman ko iyaw dāton nyowaya, alit na chasoyot ko, ki basta maypayit kapanganohed nyo kan kapagsīrbi nyo do Dyos. On, an komwan, ki masoyot ako a maynamot ta chapatak ko a mairāman kamo na do ragsak ko. 18 Dawa, an bitosen daw byay ko, ki machita pakono a masoyot kan machipagragsak kamo dyaken.
Si Timoteo Kan Epaprodito
19 Hahawen ko, an ipalōbos ni Āpo Jesos, mahay aba, as katoboy konchi dyinyo daw si Timoteo. Tan komwan, ki anchan maybidi dyaken, ipadāmag nanchi dyaken no maganayaw a kayayan nyo, kan iyanchiw nyaw manoroh so taywara kasoyotan ko. 20 Ta apabayaw kapayngay na a taywara mangisakit dyinyo a akmas kapangisakit kwaya dyinyo. 21 Ta siraw kadwan saw a tawotawo, ki katakatayisa dana saw maychichwas so bōkod da kaganayan, kan iya pabayaw chichwasen daw chakeyaw ni Kristo Jesos. 22 Ki an si Timoteo, chapapatak nyo na sīgod dadakay naw a matalek. Akma kami naw may-āmang do kasidosidong naya dyaken a mangiwaras so Maganay a Dāmag. 23 As dawa, basta matonngan ko na an āngo maparin dyaken do dya, nanyeng ko na toboyen dyinyo daw. 24 Ki aran komwan, talken ko pas Āpo a mahay abas kapakangay ko dyinyo daw a mismo.
25 Naktokto kwaya a machita paybidyen ko na dyinyo daw si Epaprodito a kakteh ko do kapanganohed kan kasmang ko a maytarabāko. Iya paw kapayngay ko a soldādo ni Kristo a tinoboy nyo a pinakainawan nyo a somnidosidong dyaken. 26 On, paybidyen ko, ta mangsah danaya a makaboya dyinyo a tabo, as kan mariribokan paw, naten dana do nakadāmag naya sya a nadāmag nyo kono a naganyit. 27 Oyodaw a naganyit kan nagistayanaw a nadiman. Ki aran komwan, chināsi pa ni Āpo Dyos. As otro ako pa, ki chināsi na paw yaken, ta pinaditdit na yaken do rakorakoh pa a pagmamayowan ko. 28 As dawa, naypataywaraw kakey ko a mapaybidi dana si Epaprodito dyinyo. Ta an komwan, aran inyo, ki chasoyot nyo a maboya mirwa, as kan tan mapapaw kabakel ko a maynamot dyinyo. 29 As dawa, machita a rawaten nyo a siraragsak a asa kakteh di Āpo, kan ipaboya nyo kayan dāyaw nyod tawo a akma dya. 30 Ta iya, ki nagistayan a chinadimanaw maynamot do nakatongpal nas chakeyaw ni Kristo, kan in-gasanggāsat naw byay na a nangisidong so dyi nyowaw a maisidong dyaken.