12
1 No madaw so kapangdisiplīna, chadaw naw kapakatoneng,
ki no mangipsok so kapaydabdab, abos arang.
2 No mamarin so maganay, chahwahok ni ĀPO,
ki no magpangta so marahet, ikeddeng na a madōsa.
3 Abaw tawo a makatalna a maynamot do karahet,
ki no malinteg a tawo, mabagot aba polos.
4 No maikari a baket, manoroh so dāyaw di lakay na,
ki no makasnesnek a baket, akmay mangrokop so tohatohang na.
5 Siraw plāno dan malinteg, dyīdo aba,
ki no pamagbaga dan marahet, mangallīlaw.
6 Siraw chirin dan marahet, akma say mangsaneb a mangdiman,
ki no kapaychirin dan malinteg, mangisalākan dyira.
7 Siraw marahet, madiman sanchi kan mabo,
ki no pamilya dan malinteg, nāw da maytēnek a mahnyi.*12:7Mana “no bahay dan malinteg, nāw na”.
8 Maidāyaw asa tawo sigon do kinasīrib na,
ki no madyīdo so kapangtokto, chahanyinyi no tawotawo.
9 Maganaganay sinsinan a tawo a myan so tobotoboyen†12:9 Mana, “Maganaganay sinsinan a tawo a maytarabako a para do chabyay na,”
kan magpabigbigaw a tawo a magkiraos so bodek.
10 No malinteg a tawo, maganay a mangonong so binyay na,
ki do marahet, aran iyaw no kāsi da, ki kinaranggas.
11 No magaget a homakahakaw, āronchiw kanen na,
ki no mangrōnot so ōras na do abos sinpaspangan, kōrang so sīrib.
12 No marahet a tawo, chalakam naw sinamsam dan marahet,
ki no malinteg a tawo, maasi, ta marahem yamot naw.
13 No marahet a tawo, maotapan do marahet a kapaychirin na,
ki no malinteg a tawo, maidichan do riribok.
14 Yapo do omno a kapaychirin na, mapnek tawo so magaganay,‡12:14Prob. 13:2; 18:20
as no kagaget na a maytarabāko, manoroh so gon-gona.
15 No abos arang, ipagarop na a kosto sawen kapangtokto na,
ki no masīrib a tawo, mangadngey so pamagbaga.
16 No abos arang, ipaboya na taros karorod na,
ki no mangtokto a nainsirīban, ikaskāso nabaw kairoromen.
17 No mapodno a sistīgo, ipaneknek naw oyod,
ki no palso a sistīgo, mangibahey so bayataw.
18 No taykalo a kapaychirin, mapaynyin akmay nabagkong,
ki no kapaychirin no masīrib, ki makapapya.
19 Iyaw kapaychirin so oyod, nāw na a abos pandan,
ki no bayataw a kapaychirin, apagripat lang.
20 Myan kapangallīlaw do kapangtokto dan magpangta so marahet,
ki no magplāno so kapaychapya, myan anchiw soyot.
21 Abaw pakaynyinan no malinteg,
ki maynana riribok mapasaran dan marahet.
22 Si ĀPO, ipsopsok naw maybayataw a tawo,
ki chasoyot na saw mapodno a tawo.
23 No mangtokto a nainsirīban, ibahey nabaw chapatak na,
ki no abos arang, makararahawa do kabon sīrib na.
24 No magaget a tawo, mayparin anchi a mangitoray,
ki no masadot a tawo, mayparin anchi a adīpen.
25 No kabakel no asa tawo, ki itoroh naw kaliday na,
ki iyaw makawahok a chirin, mapasoyosoyot sya.
26 No malinteg a tawo, maannad do kapachisīt na,§12:26Mana “No malinteg a tawo, manoroh so maganay a pamagbaga dyirad sīt naw.”
ki no ayaman no marahet a tawo, mapalongo do paychawawan.
27 No masadot a tawo, pasohen nabaw naanopan naw,
ki no magaget, makahap anchi so kinabaknang na a mapateg.*12:27 Mana “No magaget a tawo, ki ipateg naw dyira na,” mana “osaren na maganay aran āngo a madongso na”.
28 Do rarahan no kinalinteg, ki myan byay.
Do dawri a rarahan, ki abaw kadiman.†12:28 Mana “Do madi a rarahan, ki magtongpal do kadiman.”
*12:7 12:7Mana “no bahay dan malinteg, nāw na”.
†12:9 12:9 Mana, “Maganaganay sinsinan a tawo a maytarabako a para do chabyay na,”
‡12:14 12:14Prob. 13:2; 18:20
§12:26 12:26Mana “No malinteg a tawo, manoroh so maganay a pamagbaga dyirad sīt naw.”
*12:27 12:27 Mana “No magaget a tawo, ki ipateg naw dyira na,” mana “osaren na maganay aran āngo a madongso na”.
†12:28 12:28 Mana “Do madi a rarahan, ki magtongpal do kadiman.”