14
1 No masīrib a mabakes, maganay kapatnek nas pamilya na,
ki iyaw maychabobos arang a mabakes, rakraken naw pamilya na do kabon sīrib na.
2 No maybibyay a malinteg, chāmo na si ĀPO,
ki no maybibyay a masīkap, chahanyinyi na si Āpo.
3 No chirin abos arang, manoroh so kapakabāot no bokot na,
ki no kapaychirin dan masīrib, iyaw mangaywan dyira.
4 An abo bāka, abaw irek do hosagan,
ki no kayit no bāka, pakayapwan āro a āpit.
5 No mapodno a sistīgo, maybayataw aba,
ki no palso a sistīgo, maynana bayataw ibahey na.*14:5Prob. 6:19; 12:17
6 No mangoy-oyaw, maychichwas so kinasīrib, ki makasārak aba polos,
ki no kapakatoneng, maydamnay a machichwasan no myan so kapakaāwat.
7 Pachibawan mo abos arang a tawo,
ta madongso mwabaw chirin a myan so kapakatoneng.
8 Iyaw kinasīrib no mangtokto a nainsirīban, mangipaboya an maypāngo kabibyay na,
ki no kabon sīrib dan abos arang, mangallīlaw.
9 Siraw abos arang, oyawen daw kapangidāton a para do gatos,†14:9Leb. 5:1-6
ki dyirad malinteg a tawo, ganāsen daw pakahwahokan no Dyos.
10 Kāda tawo, chapatak naw bōkod na a kaliday no pōso,‡14:10 Mana, “bōkod na a kakpad,”
as abaw aran sino a machipangdidiw dya so soyot na.
11 Iyaw bahay no marahet a tawo, marārayaw anchi,
ki maytēnek panchiw tolda no malinteg a tawo.§14:11No chakey na batahen dan kadwan a maynamot do “bahay” kan “tolda,” ki pamilya.
12 Myan ayaman a akmay kosto do asa tawo,
ki no pandan na, do kadiman a lomongo.
13 Aran do kamyeng, myan naitayo a karahmet,
as no pandan no kasoyot, maparin a mamayo.
14 No tomadyichokod do kinalinteg, apīten nanchiw maiparbeng dya,
as no maganay a tawo, magon-gonaan anchi sigon do pinarin na.
15 No machononot, anohdan naw aran āngo a naibahey dya,
ki no mangtokto a nainsirīban, sintiren na saw dakwang na.
16 No masīrib a tawo, siaannad*14:16Mana “chamo na si Āpo”. kan pachibawan naw karahet,
ki no abos arang a tawo, taykalo kan tarantādo.
17 No malisto a makasoli, parinen naw abos arang a kaparin,
as no mangipangta so marahet, maipsok anchi.
18 No machononot, magtāwid anchi so kabon sīrib,
ki siraw mangtokto a nainsirīban, akma say nakoronaan so kapakatoneng.
19 Siraw marahet, magrōkob sanchi do salapen dan maganay,
kan magrōkob sanchi do rowangan daw no malinteg.
20 No mapobri, chaskeh no aran karoba na,
ki siraw mababaknang a tawo, āro sīt da.
21 No mahanyinyi do karoba na, maygatos,
ki mabindisyonan tawowaw a māsi dyirad mapobri.†14:21 Prob. 14:31; 19:17
22 Siraw magpangta so marahet, somiwal sabawri?
Ki siraw magplāno so maganay, machichwasan danchiw kadaw kan kapodno.
23 Do tabo malidyat a tarabāko, myan maganay a asi na,
ki no tod a maychiychirin, mapawnot lang do kapobri.
24 Iyaw kinabaknang dan masīrib, akmay korona da.‡14:24 Prob. 3:16; 8:18; 22:4
Ki no kabon sīrib dan abos arang, ki iparang naw kabon sīrib.
25 No mangipaneknek so oyod, mangisalākan so byay,
ki no maybayataw a sistīgo,§14:25 Prob. 6:19; 19:5, 9; 21:28 manglipot so tawotawo.
26 No tawo a mamo di ĀPO, myan kahnyi no kapagtalek na,
as kan siraw anak na, ki myan anchiw kamāngan da.
27 Iyaw no kaanyib di ĀPO, akmay akbod a manoroh so byay
a mapadichan so tawo do asdok saw no kadiman.*14:27 Prob. 13:14
28 Iyaw kāro no itorayan no āri, nawriw dayag na,
ki an abo itorayan no prinsipi, marārayaw.
29 No dya malisto a makasoli, myan dyaw rakoh a kapakaāwat,
ki no taykalo a komohat, pakatetēnek naw kabon sīrib na.
30 No kaydamnayan no kapangtokto, manoroh so salon-at no inawan,
ki no āpal, akmay ganyit a mangrōnot so tohatohang.†14:30Prob. 12:4
31 No mangidadanes so mapobri, iroromen naw Namarin dya,‡14:31 Prob. 17:5; 22:2
ki no māsisyen siras makachitaw, dayāwen naw Dyos.
32 No dyīdo a kaparin no marahet a tawo, mangasday sya,
ki no malinteg a tawo, myan kamāngan na aran do kadiman na.§14:32Mana “masarākan naw kamāngan na do kasingpet na”.
33 Iyaw kinasīrib, omyan do kapangtokto no myan so kapakaāwat,
as kan aran dyirad abos arang, ki maipakatoneng dyiraw kinasīrib.*14:33Mana “ki siraw abos arang, matonngan daba polos kinasīrib”.
34 Iyaw kinalinteg, mapatohos so asa nasyon,
ki no kapaygatos, mapabodis so dāyaw no aran sino.
35 No pakahwahokan āri, myan do masīrib a pachirawatan,
ki no kasoli na myan do tobotoboyen a mangasnesnek.
*14:5 14:5Prob. 6:19; 12:17
†14:9 14:9Leb. 5:1-6
‡14:10 14:10 Mana, “bōkod na a kakpad,”
§14:11 14:11No chakey na batahen dan kadwan a maynamot do “bahay” kan “tolda,” ki pamilya.
*14:16 14:16Mana “chamo na si Āpo”.
†14:21 14:21 Prob. 14:31; 19:17
‡14:24 14:24 Prob. 3:16; 8:18; 22:4
§14:25 14:25 Prob. 6:19; 19:5, 9; 21:28
*14:27 14:27 Prob. 13:14
†14:30 14:30Prob. 12:4
‡14:31 14:31 Prob. 17:5; 22:2
§14:32 14:32Mana “masarākan naw kamāngan na do kasingpet na”.
*14:33 14:33Mana “ki siraw abos arang, matonngan daba polos kinasīrib”.