16
1 Myan do tawo kapagplāno do kapangtokto na,
ki no atbay, si ĀPO pakayapwan na.
2 Tabo kaparin no tawo, akmay kosto do mismo a kapanyideb na,
ki maimangmang ni ĀPO makatayrahem saw a panggep na.*16:2Do Hebreo a chirin, ki “timbangen ni ĀPO iyaw no ispirito”.
3 Iparawat mo di ĀPO aran āngo a parinen mo,
kan matongpal anchiw tabo plāno mo.
4 Si ĀPO, pinanggep na tābo naparswa,
aran siraw marahet do arawaw no didigra da.
5 Si ĀPO, ipsopsok na sa tabo mapangas.†16:5Prob. 18:12
Sigorādo nya: Mahabas sabanchi a madōsa.‡16:5 Prob. 11:21
6 Maynamot do kadaw kan kapodno, mapakawan gatos.
Do kayan kaanyib di ĀPO, makadichan tawo do marahet.
7 An no kabibyay no tawo, ki makahwahok di ĀPO,
mapayparin na a aran siraw kabōsor na, ki machikapya dya.
8 Maganaganay dēkeyaw a myan kinalinteg
kan āro a ganasya a abo kinalinteg.§16:8 Prob. 15:16
9 Magplāno tawo do aktokto na so kwanan na,
ki si ĀPO, mapalongo an dino dakwangan na.*16:9 Prob. 16:1
10 Naispiritwan a minsāhi, myan do bibi no āri,
ki basta dya makagatos do kapangokom na.†16:10 Mana “kosto tabo a panggedeng na”.
11 Siraw kosto a pagkīlwan kan pagtimbangan, dyira ni ĀPO.
No tabo a kosto a pagtimbang‡16:11No naosar a pagtimbang, ki bato sa a naisopot. do pagkīlwan, ikeddeng na.
12 Taywara a ipsok dan ar-āri iyaw kapamarin so marahet,
ta no kapagāri da, ki mapatnek do kinalinteg.
13 Chirin do bibi no malinteg, chasoyot dan ar-āri,
as chadaw da iyaw mangibahey so kosto.
14 Do kasoli no āri, maikeddeng naw kadiman,§16:14 Do Hebreo a chirin, ki “Iyaw kasoli no āri, ki (akmay) tobotoboyen no kadiman.”
ki no masīrib a tawo, bāwan naw kasoli no āri.
15 An masoyot rōpa no āri, palobōsan naw tawo a mabyay,
as kan no pakahwahokan na, akmay chimoy a mapagla so mohamoha.
16 Mapipya adayo mamoranom so kinasīrib kan balitok,
as kapamidi so kapakaāwat, mimyan pa kan pirak.
17 Iyaw kalsāda dan malinteg, ditditen naw marahet,
as no maannad do kokwanan na, aywanan naw byay na.
18 Iyaw kapangas, manmanma kan pakarārayawan,
as iyaw katangsit, manmanma kan kasdayan.
19 Maganaganay mapakombaba a machirāman dyirad mapobri
kan machibīngay dyirad sinamsam daw no mapangas.
20 No mangikāso so nainanawo, maasinso anchi,
kan mabindisyonan saw magtalek di ĀPO.
21 No masīrib a kapangtokto, matawagan so makailāsin,
as no makahwahok a kapaychirin, makaāwis so nanawo.
22 Iyaw kapakaāwat do akin inawan, akmay akbod a manoroh so byay,*16:22Prob. 10:11
ki kabon sīrib, manoroh so kadōsa dyirad abos arang.
23 Iyaw masīrib do kapangtokto na, annadan naw dangoy na,
kan no bibi no masīrib, ki makaāwis so nanawo.
24 Siraw makahwahok saw a chirin, ki akmay tagapolot no yokan
a matami so taham kan pasalon-aten naw inawan.†16:24 Do Hebreo a chirin, ki “pasalon-aten naw tohatohang”.
25 Myan ayaman a akmay kosto do asa tawo,
ki no pandan na, do kadiman a lomongo.‡16:25Prob. 14:12
26 Iyaw kakey a koman no trabahador, nawriw mapagaget sya,
ta no kapteng naw, mangipapīlit sya a maytarabāko.
27 No abos sirsīrbi a tawo, magpangta so marahet,
as no kapaychirin na, akmay domalangdang a apoy.
28 No nailabay do dyīdo, mapaklaklal so kapaydidiman,
as no kaparaherahet, mapaysyay siras masisinged a maysisīt.
29 No maranggas a tawo, solisogen naw karoba na,
kan palongohen na do rarahan a dya maganay.
30 No mangikosilap so mata na, magpangta so dyīdo,
as no machadangedanget, magpanggep so marahet.
31 Iyaw kapay-oban, akmay mapintas a korona do oho
a nahap do malinteg a kabibyay.
32 Maganaganay dya malisto a makasoli kan iyaw tawo a mabīleg,
as mimyan paw makaigpet so inawan na kan iyaw mangsākop so syodad.
33 Magbibinonōtan tawo,
ki disisyon, bokōdan ni ĀPO.
*16:2 16:2Do Hebreo a chirin, ki “timbangen ni ĀPO iyaw no ispirito”.
†16:5 16:5Prob. 18:12
‡16:5 16:5 Prob. 11:21
§16:8 16:8 Prob. 15:16
*16:9 16:9 Prob. 16:1
†16:10 16:10 Mana “kosto tabo a panggedeng na”.
‡16:11 16:11No naosar a pagtimbang, ki bato sa a naisopot.
§16:14 16:14 Do Hebreo a chirin, ki “Iyaw kasoli no āri, ki (akmay) tobotoboyen no kadiman.”
*16:22 16:22Prob. 10:11
†16:24 16:24 Do Hebreo a chirin, ki “pasalon-aten naw tohatohang”.
‡16:25 16:25Prob. 14:12