19
1 Maganaganay mapobri a maybibyay a masingpet
kan abos arang a dyīdo so kapaychirin.
2 Iyaw taywara a kakey a abos kapakatoneng, maganay aba,
as no taykalo, mahabasan naw kosto a rarahan.
3 Iyaw kabon sīrib no tawo, nawriw pakarārayawan na,
kan isoli na pa a pagatosen si ĀPO.
4 Iyaw kinabaknang, mangāwis so āro a sīt,
ki no mapobri, syayen pan sīt na.*19:4 Prob. 14:20
5 No palso a sistīgo, mahabasan nabanchiw kadōsa na,
as no maychirichirin so bayataw, makadichan aba.†19:5 Prob. 19:9; 21:28
6 Āro saw machischisngen do madādam a tawo tan makahap sa,
as tabo, ki sīt no tawo a manorotoroh so rigālo.
7 No mapobri, an ipsok da tabo no kabagyan na,
mimyan pa ditditen dan sīt na.
Aran machikakaāsi pa dyira,
apabaw makey sya.
8 No mamoranom so kinasīrib, chadaw naw bōkod na a inawan,
as no mangipateg so kapakaāwat, maasinso anchi.
9 No palso a sistīgo, mahabasan na abanchiw kadōsa na,
as no maychirichirin so bayataw, mabonchi.
10 Maitotop aba a maybibyay abos arang a mabaknang,
mimyan paw asa tagābo a mangitoray dyirad prinsipi.
11 No myan so maganay a kapakaāwat, malisto aba a makasoli,
as no kaidāyaw na, inonolay naw madi a pinarin no kadwan dya.‡19:11 Prob. 10:12
12 Iyaw kasoli no āri, akmay kapayngernger no lion,§19:12 Prob. 16:14; 20:2
ki no pakahwahokan na, akmay apon do tametamek.
13 No abos arang a anak, pakarārayawan āmang na,
as no baket a maganay a machidiman, akmas chimoyaw a nāw na maytetedted.
14 Bahay kan kinabaknang, matāwid yapo dyirad inyapwan,
ki no baket a nainsirīban so kapangtokto, ki yapo di ĀPO.
15 Iyaw kasadot, manoroh so kapaynepdep,
as no dya maytarabāko, magkiraos so bodek.
16 No magtongpal so bilbilin, aywanan naw byay na,
ki no mangipsok sya,*19:16Mana “mangipsok so kabibyay na”. madiman anchi.
17 No somidong so mapobri, akmay mapabohod di ĀPO,
as si ĀPO dananchiw mamahes sya do pinarin naw.
18 Disiplināen mo anak mo ranan a myan paw namnāma.
An nonolay mo, machirāman ka a somidong do kadiman na.
19 No malisto a komohat, machita magbāyad so molta na,
ki an ibayādan mo, pirwahen mo nanchi a isalākan.
20 Adngeyen mo pamagbaga, kan rawaten mo kapangnanawo
tan maypasīrib ka do masakbayan.
21 Āro a plāno iktokto no tawo,
ki iyaw panggep ni ĀPO, nawriw matongpal.†19:21 Prob. 16:1
22 Iyaw chakey no tawo, ki mapodno a kadaw.
Maganaganay mapobri kan mabayatawaw.
23 Iyaw no kaanyib di ĀPO, lomongo do byay,‡19:23 Prob. 10:27; 14:27
as makapaynahah a mapnek, kan abanchis pakarārayawan.
24 No masadot, ilomlom naw kakamay na do labay na,
ki chasadot na pasobohen do dangoy na.§19:24 Prob. 26:15
25 Baōtan mo mangoy-oyaw, as kan mananawonchiw machononot a makailāsin.
Paydabdab mo makaāwat, as maypāronchi so kapakatoneng.
26 No mangranggas di āmang na, kan mangpaksyat di ānang na,
ki anak a mangasnesnek kan mangabo so dāyaw.
27 Anak ko, an katngan mo mangadngey so nanawo,
somiwal kanchi do chirin saya no kapakatoneng.
28 No abos sirsīrbi a sistīgo, mangoyaw so kinalinteg,
as no dangoy no marahet, hamonen naw karahet.
29 Iyaw kadōsa, maisagāna dyirad mangoy-oyaw,
as kan kapagbāot do bokot dan abos arang.