21
1 No aktokto no āri, akmay moyog a ranom a palongohen ni ĀPO.
Pakwanen na do aran dino a chakey na.
2 Kāda kaparin no tawo, akmay kosto do mismo a kapanyideb na,
ki maimangmang ni ĀPO a mangtimbang so pōso.
3 Iyaw kapamarin so kosto kan kinalinteg,
ad-adda a rawaten ni ĀPO kan dātonaw.*21:3 1 Sam. 15:22
4 Mata a mapangas†21:4 Prob. 6:17 kan makospag a pōso,
akmay soho dan marahet, ki gatos sa.
5 Siraw plāno no magaget, mapaypāro,
ki no taykalo, mapagpobri.
6 Iyaw kinabaknang a mahap do bayataw a rida,‡21:6 Prob. 10:2
malisto a mabo kan akmay asdok no kadiman.
7 Iyaw karanggas dan marahet, manggōyod sira a mangikaro,
ta mawedwed sa mamarin so kosto.
8 No kabibyay no maygatos, ki madyīdo,
ki no kaparin no abos gatos, ki malinteg.
9 Maganaganay omyan do aroywan atep no bahay
kan machiwpok do baket a maganay a machidiman.
10 Chalakam no marahet mamarin so karahet.
Aba polos kāsi na do kapayngay na tawo.
11 Do kadōsa no mangoy-oyaw, somīrib machononot.
Do kapachinanawo no masīrib, maypāro chapatak na.
12 No Dyos a malinteg, chapatak naw mapariparin do bahay dan marahet,
as iyangayan na sa so karārayawan da.
13 No mamengbeng so tadyinya na do kapachikakaāsi no mapobri,
matbay abanchi anchan iyaw machikakaāsi.
14 Iyaw rigālo a naikorimed, mangbaw so tawo a makasoli,
kan pasoksok a sililimed, mapahanebneb so taywara a kasoli.
15 Do kaipākat no kinalinteg, masoyot saw malinteg,
ki makaam-amak dyirad mamarinaw so marahet.
16 No somiwal do rarahan no kapakaāwat,
machipanda a kayban dan nadiman.
17 No madaw so kapagragsak, pomobri.
No madaw so palek kan kanen a mangingīna,§21:17 Do Hebreo a chirin, ki “lana.” An magpasken sa, mangosar sa so palek kan lana. bomaknang aba.
18 Siraw marahet, mayparin sanchi a pangsaka siras malinteg,
as siraw dya mapodno, mayparin sanchi a bāyad dan malinteg.
19 Maganaganay omyan do let-ang
kan machiwpok do baket a machidiman kan masosolihen.*21:19 Prob. 21:9; 25:24
20 Do bahay no masīrib, myan kinabaknang kan mababalor,
ki do abos arang, patawsen naw tabo myan dya.
21 No maychichwas so kinalinteg kan kapangipateg,
makadongso so maynam a byay, kinalinteg, kan dāyaw.
22 No masīrib a komander, makadarop so syodad dan mabīleg,
kan mangrārayaw so kōta a pachikāmitan a talken da.
23 No mangihawa so dangoy kan rida na,
ki pachibawan naw riribok.
24 No mapangas kan makospag, no ngaran na,
ki si “Mangoyaw” a dya maiyalat katangsit na.
25 No kalakam no sadot, ki pakadimanan na,
ta mawedwed so tanoro a maytarabāko.
26 Iya, maychaychasaryan a magkalikāgom so arwaro pa,
ki do bit, no malinteg a tawo, maboslon kapanoroh na.
27 Iyaw dāton no marahet, ki ipsopsok ni Āpo.†21:27 Prob. 15:8
Mangamangay pa an naitoroh do marahet a ranta.
28 No palso a sistīgo, mabonchi,‡21:28 Prob. 19:5, 9
ki manayon ichirin no maganay a mangadngey.
29 No marahet a tawo, ki sin-gāganay,
ki no malinteg, mangtokto sakbay a mamarin.
30 Abaw kinasīrib, kapakaāwat, mana pamagbaga
a makapaytēnek a machikontra di ĀPO.
31 Naisagāna danaw pachigobat a kabalyo,
ki si ĀPO, makatoneng an sino mangābak.§21:31 Prob. 16:3, 9; 19:21; 20:18