1 Do dawri, nakaboya ko so marongsot a animal*13:1 Inosar ni Satanas siraw dadwa a animal a machigobat dyirad manganohedaw di Kristo (12:17). No dāmo a animal, ki akmay heneral mana āri, ta myan saw korona na. Iyaw somarono (13:11), ki iyaw mabayataw a propīta na a magsirsīrbi do dāmwaw. Pal. 16:13; 19:20; 20:10 a mohtohtot do tāw a myan so asa poho a olong kan papito a oho, as kan do katakatayisa olong, ki myan korona na. Myan saw naitolas do kāda oho naw a iyaw ngarangaran ni Āpo Dyos a naosar do dya kosto a panggep tan oyawen naw Dyos. 2 Iyaw marongsotaya animal, ki akmay lipardo a makamwamomo a animal. Iyaw kokod naw, ki akmas kokodaw no oso a myan so manaro kan matarem a koko, as iyaw dangoy naw, ki akmas dangoyaw no lion. Intoroh no dragonaw dya iyaw no panakabalin kan iyaw trono na kan iyaw no toray na do tanaya. 3 Nabigaran so rakoh iyaw asaw a oho no marongsotaw a animal kan makey narana chadiman. Ki iyaw no bigar naw, ki napyan. Dawa, chinasdaaw dan tawowaw do lōbongaya, kan minonot sad marongsotaw a animal. 4 Nagdaydāyaw saw tawo do dragonaw maynamot do intoroh naw a panakabalin do marongsotaw a animal. Nagdaydāyaw pa sa do marongsotaw a animal a kon da, “Sino akmas marongsotaya animal, as kan sino iyaw makey a machilaban dya?”

5 Napalobōsan iyaw marongsotaya animal a mangitoray so lōbongaya do apat a poho kan dadwa kabohan.†13:5 Pal. 11:1-2; 12:6 Napalobōsan pa a mangosar so dangoy na a magpangpangas a mangoy-oyaw do Dyos. 6 Dawa, nawriw chabalay naw mangoyaw kan magbirngas so ngaran ni Āpo Dyos kan iyaw yanan naw. Masaw dyirad tabo omyan saw do hanyit. 7 Iyaw marongsotaya animal, ki natorohan so panakabalin a machigobat dyirad tawo saw a manganohed di Āpo Dyos kan omābak sira. Natorohan pa so toray a mangitoray so tabo tawotawo do tabo a nasnasyon kan kapaychirin do intīrwaya lōbong. 8 Tabo myan do lōbongaya, ki dayāwen daw animalaya, malaksid dyirad naitolasaw so ngaran do librowaw a myan so byay a abos pandan. Nyaya libro, ki dyiran naidātonaw a Karniro, as kan intolas naw ngaran da sakbay no nakaparswan lōbongaya.

9 Inyo a myan so tadyinya, kadngeyen nyo. 10 Ta siraw manganohed do Dyos, ki machita matored sa, kan anōsan daw kalidyatan da. Ta no nairanta mabahod, mabahod anchi. As iyaw no nairanta madiman do kampilan, ki madiman anchi.

11 Sinpangan na, nakaboya kos matarek a marongsot a animal‡13:11 Nyaya a animal, ki mayngaran so “Mabayatawaw a Propīta.” Pal. 13:1; 16:13; 19:20; 20:10 a minohtot a yapo do tanaya. Myan iyaw dadwa olong na a akmay karniro, ki maychirin a akmas dragonaw. 12 Myan dyaw tabo no toray no nanmaw a marongsot a animal, as kan inosar naw torayaya a magsīrbi dya. Pinilit na saw tabo tawo do lōbongaya a magdāyaw do nanmaya a marongsot a animal a myan so bigar a napyan. 13 Iyaw somaronwaw a marongsot a animal, ki namarin so āro a makaskasdāaw a pangilasīnan do salapen dan tawotawo a akmas apoyaw a nasday a yapo do hanyit a mangay do tanaya. Ay samna! 14 Dawa, inallīlaw na saw tawotawo do tanaya do kapangipaboya na so naipalōbos saw a milagro a parinen na do salapen no nanmaw a marongsot a animal. Inbilin na a mamarin saw no tawotawowaw so ladāwan mana bolto a pangpadāyaw das marongsotaw a animal a iyaw napyanaw so bigar a maynamot do bagkong no kampilan, as kan minirwa a nabyay. 15 Sinpangan na, napalobōsan iyaw no somaronwaw a marongsot a animal a manoroh so anges do boltwaya no nanmaw a marongsot a animal tan makapaychirin. Do dawri, maparin boltwaw mangidarom so tabo a dya magdāyaw dya tan madiman sa. 16 Pinilit na sa no marongsotaw a animal a markaan saw tawotawo, siraw myan so toray kan siraw abos toray, siraw mabaknang kan mapobri, siraw nawayawayaan mana adīpen do kawanan a tanoro da mana moyen da. 17 Maynamot do dawri a pinarin na, abaw no aran sino a makapaggātang mana makapaglako, malaksid an mamarkaan so ngaranaw no marongsotaw a animal mana iyaw no nomirwaw no ngaran naw.

18 Nyaw pakachitan so kasīrib. No myan so sīrib, ki chapatak naw chakey a batahen no nomirwaw no marongsot a animal. Maynamot ta iyaw nomirwaw, ki iyaw nomiro no tawo, kan anem a gasot, anem a poho kan anem iyaw nomirwaya.