1 As dawa, kakakteh, pakaolit ko nya a ibahey dyinyo a maynamot do rakohaya a kāsi no Dyos dyaten: Iparawat nyo pakono inawan nyo a sibibyay kan masantwan a dāton do Dyos a nāw na makahwahok dya. Iyaw nyayaw oyod a kapagdaydāyaw a machita a onotan nyo. 2 Machalit kamo aba do marahet saya a dadakay no tawotawo do lōbongaya, basbāli a ipalōbos nyo a si Āpo Dyos mangpabayo so tābo katawo nyo kan tābo aktokto nyo.*12:2 Epe. 4:23 Tan komwan, matonngan nyo a maganay iyaw koskostwaw a chakey no Dyos. On, an komwan, chapatak nyonchi a tabo maganay kan kosto, kan makahwahok do Dyos.

3 Sichangori, maynamot do toray kwaya a asa a apostol a intoroh ni Āpo Dyos a pagrebbengan ko, ibahey ko a katakatayisa dyinyo iyaw nyaya: Idāyaw nyo abaw inawan nyo a matwatohos kan gagāngayaw a katatawo nyo, basbāli a pirmi kamo pakono a mapakombaba do kapangtokto nyo. Iktokto nyo aba a arwāro kasirīban dyinyo kan oyodaw a intoroh ni Āpo Dyos sigon do kapanganohed nyo. 4 Sigod a chapatak nyo a āro partis no inawan nyo, ki matatarek kaosar da. 5 Komwan ta. Aran āro ta na a manganohed di Kristo, ki maynamot ta nachikāmang ta na dya, nayparin ta na a akmas asaw a inawan na. Kāda katakatayisa dyaten myan bōkod ta a rebbeng, ki alit na, nagkakāmang ta a akmay asa kainawan tawo. 6 As dawa, machita a osaren taw no matatarek saya a insāgot no Dyos do kāda asa dyaten a yapo do parābor na. An kapangipakatoneng so inpaltiing no Dyos myan a sāgot no Dyos dyinyo, machita a parinen nyo a machitōnos do kapanganohedaya myan dyinyo. 7 An kapachisidong chapatak nyo, sigi, ipasnek nyo somidong. Ki an kapangnanawo, mangnanawo kamo a maganay. 8 An kapamagbaga, sigi, mamagbaga kamo so kapayngay nyo a tawo. An myan sāgot a kadādam dyinyo, ki manoroh kamo a siboboslon. An iyaw sāgot ni Āpo Dyos dyinyo, ki mangipangōlo, mangipangōlo kamo pakono a sipapasnek. No myan dyinyo so panakabalin a somidong dyirad makakāsi, ki parinen nyo pakono a siraragsak.

9 Madaw kamo pakono a yapo do makatayrahem a katatawo nyo. Ipsok nyo marahet, as kan nāw na igpet nyo maganay. 10 Maypaypairot pakono kapaysin-aadaw nyo a makakakteh di Kristo. Padayāwan nyo kadwan dyinyo, kan ibidang nyo a masissisīta sa kan inyo. 11 Maysadosadot kamo aba do kapagsīrbi nyo di Kristo, basbāli a ipasnek nyo a yapo do tābo ayit kan kapangtokto nyo. 12 Maybibyay kamo a masoyot do kayanaya no hahawen nyo di Kristo. Anōsan nyo saw lidyat, as pirmi kamo a maydaydasal. 13 Iwaman nyo pakono kapanoroh nyo do kakakteh nyo saw do kapanganohed a makachita, as nāw nyo a ipaboya a managpadagos kamo.

14 Abayen nyo sabaw mangidadanes dyinyo ah, basbāli a machita a paydasal nyo sa tan chāsi san Āpo Dyos a bindisyonan. 15 Machipagragsak kamo pakono dyirad kakakteh di Kristo a masoyot. Masaw a machipagmamayo kamo pakono dyirad magmamayo. 16 Magtotōnos kamo pakono do kapangtokto kan adaw nyo. Maykoykospag kamo aba, basbāli a machisīt kamo dyirad makasyāsi a tawotawo. Hahawen nyo aba a inyo lang kasisirīban.†12:16 Prob. 3:7

17 Bahsen nyo aba a pamarinan so marahet aran sino a namarin so marahet dyinyo.‡12:17 Prob. 20:22; 24:29; Mt. 5:11-12; Roma 12:19 Nawri pakono igaget nyo a parinen maganay tan abo pakadilawan nyo do salapen da no tawotawo. 18 Parinen nyo mandad maparin nyo a maybibyay a machikapya dyirad tabo tawotawo. 19 Inyo a sīt ko a chadaw ko, mamahes kamo aba polos do mamarinaw so marahet dyinyo, basbāli a nonolay nyo sa, ta makatoneng dananchiw solyaw no Dyos a ombahes sira. Ta myanaw naitolas do Masantwan a Tolas a kāna, “Yaken anchiw mamahes, kan bahsen ko sanchi,”§12:19 Deot. 32:35 kānan Āpo. 20 On, mamahes kamo aba, basbāli a tongpalen nyo no myanaw do Masantwan a Tolas a kāna, “An mapteng kabōsor mwaw, ki pakanen mo. An mawaw, ki paynomen mo. Ta an parinen mo komwan, ki somken anchi dyaw kasnek na.”*12:20 Prob. 25:21-22; Mt. 5:44; Lk. 6:27-36 21 Magpaābak kamo aba do marahet, basbāli a paybadiwen nyo pakono a abaken a maynamot do maganay a kaparin nyo.