1 Chasoyot ko a iyam-āmmo dyinyo kakteh taya a mabakes a si Pebe*16:1 No batahen kadwan, si Pebe ngataw nangyangay so nyaya tolas ni Pablo a inparawat dyirad nanganohed saw do Roma. a asa magsirsīrbi do iglisya do Senkrea. 2 Rawaten nyo pakono a maganay, ta kapayngay nyo a manganohed di Āpo, kan nyayaw maitotop a dadakay no tawotawo ni Āpo Dyos. Sidongan nyo do tabo machita na, ta āro dana tawotawo sinidosidongan na, kan yaken paw asa.

3 Pakomostaan nyo pa sa Prisila kan Akila a rārayay ko a maytarabāko di Kristo Jesos. 4 An maynamot dyira, in-gasanggāsat daw byay da para dyaken. Yaken aba lang magyāman dyira, an dyi pa tabo iglisya saw no Dya-Jodyo. 5 Pakomostaan nyo pa saw tawotawo saw a makpekpeh do bahay da a magadal so chirin no Dyos.

Pakomostaan nyo si Epeneto a chadaw kwa sīt. Iyaw nanma a nangrawat si Kristo do probinsya a Asya. 6 Pakomostaan nyo pa si Maria a nangitoroh so tābo a kayit na a maytarabāko a para dyinyo. 7 Pakomostaan nyo pa si Adroniko kan Jonya a kapayngay ko a Jodyo, kan rārayay ko a nabahod do nakarahan. An maynamot dyira, ki magdindināmag sa a apostolis, as kan nanmanma sa kan yaken a nanganohed di Kristo.

8 Pakomostaan nyo pa si Ampliato a oyod kos chadaw a sīt do kapachirayarayay ko di Āpo. 9 Pakomostaan nyo pa si Orbano a rārayay namen a maytaytarabāko a magsīrbi di Kristo, kan si Estakis a chadaw kwa sīt. 10 Pakomostaan nyo pa si Apeles a napanpaneknekan dana a mapagtalkan a maynamot do kapanganohed na di Kristo. Pakomostaan nyo paw pamilya ni Aristobolo. 11 Pakomostaan nyo pa si Herodyon a kapayngay kwa Jodyo kan siraw kapayngay ta saw a manganohed do pamilya ni Narsiso.

12 Pakomostaan nyo pa sa Tripena kan Triposa, siraw mababakes a oyod a intoroh daw ayit da a magsirsīrbi di Āpo. Masaw do sīt kwaw a si Persida a asa pa mabakes a magaget a magsīrbi di Āpo. 13 Pakomostaan nyo pa si Ropo a asa magdindināmag a magsirsīrbi di Āpo, as kan pakomostaan nyo pa si ānang na a nangibidang dyaken a asa anak na. 14 Pakomostaan nyo pa si Asinkrito, Plegonte, Hermes, Patrōbas, Hermas, kan tabo a kakakteh a rārayay da. 15 Pakomostaan nyo pa si Pilologo, Jolya, Nereo kan kakteh naw a mabakes. Masaw si Olimpas kan siraw rārayay da saw a tawotawo no Dyos.

16 Maysinpapakomosta kamo so oyod a adaw no makakakteh. Asa pa, pakomostaan da paynyo no tabo saya manganohed di Kristo do dya.

17 Kakakteh, akdakdawen ko dyinyo a magannad kamo do mapaysisyay saw kan mangriribok saw so kapanganohed dan tawotawo, ta komontra sa do oyod a nanawo a rinawat nyo. Machita nyo a pachibawan saw komwan saya a tawo. 18 Ta siraw mamarin saya so komwan, ki magsirsīrbi saba di Āpo ta a si Kristo, an dya mismo a inawan da. Aysa! Paspasablogan da saw tawotawo saw a maydamnay a mapawnot tan maallīlaw sa. 19 Chapatak ko na a nagdindināmag do tabo iyaw kayit nyo a manganohed, as kan nyaw paynamotan kwaya a masoyot a maynamot dyinyo. Ki aran komwan kamo a mayit, ki alit na chakey ko a maypasīrib kamo a maynamot do maganayaya, kan abo pakono dyinyo kinasīrib a maynamot do kapamarin so marahet. 20 Ta sigorādo ko a si Āpo Dyos a pakayapwan kapya, īto danaw kapitapita nas Satanas. On, pangabāken nanchinyo no Dyos a ompadso so marahet.

Myan pakono dyinyo parābor ni Āpo ta a si Jesos.

21 Pakomostaan na paynyo ni Timoteo a rārayay ko do tarabāko. Magpakomosta pa sa dyinyo sa Lucio, Jason, kan Sosipatro a kapayngay kwa Jodyo.

22 Changori, aran yaken a si Tersyo a sikritaryo ni Pablo a somnidong a naytolas, ki pakomostaan koynyo do ngaran ni Āpo Jesos.

23 Pakomostaan paynyo ni Gayo a iyaw mangpadpadagosaya dyaken, kan iya paw akin bahayaya so paychichipehan daya no manganohed. Pakomostaan na paynyo ni Erasto a trisoriro no gobyirno do dya a syodad, kan magpakomosta pa dyinyo si kakteh ta a si Kwartos.

[ 24 Myan pakono dyinyo a tabo parābor ni Āpo ta a si Jeso-Kristo. Amen.]†16:24 Nyaya birsikolo, ki aba do kadwan a manyoskripto mana tolas.

25 Madaydāyaw pakono si Āpo Dyos! Ta maynamot do panakabalin na, ki maparin na a payiten kapanganohed nyo tan maybibyay kamo sigon do Maganay a Dāmag a maynamot di Jeso-Kristo a iyaw inkasaba kwaya dyinyo. Ta aran naitayo nyaya a Maganay a Dāmag a yapo do nanma pa a araw, ki sichangori, inpakatoneng no Dyos dyaten. 26 On, malawag a maboya taw nyaya do intolas da saw no propīta saw do Masantwan a Tolas, ta inkeddeng no abos pandan a Dyos a maipakatoneng Maganayaya a Dāmag a maynamot di Kristo dyirad tabo a nasnasyon do lōbongaya tan manganohed sa tabo tawotawo dya.

27 Sichangori, maynamot di Jeso-Kristo, madaydāyaw pakono a abos pandan si Āpo Dyos, ta iya lang myan so sīrib a makapatak so tabo! Amen.