7
Iyaw Baro di Ipatpateg Na a Nobya
1 Ay, anyan a kapintas no kokod mwaya a sitotokap,
O balāsang a reyna!
Iyaw porma dan pā mo, ki akmay alāhas
a pinarin do kakamay no sanay a tawo.
2 Iyaw posed mo, ki akmay mamemeh a royoy
a dya mapatawsan so nalaokan a palek.
Iyaw katinghan mo, ki akmay pinosot a trīgo
a nadibon dan bakong.
3 Siraw dadwaya a soso mo, ki akmay dadwa a orbon a ogsa.
Singin sa a akmay mataray a ogsa.
4 Iyaw lagaw mwaya,
ki akmay pagwanawanan a naparin do sōng no elipanti.
Siraw mata mwaya, ki akma siras līnaw no Hesbon
a myan do rowangan no Bat-rabbim.
Iyaw momodan mwaya, ki akmas pagwanawanan no Lebanon
a maytatalamad do Damasko.
5 Iyaw oho mwaya, ki akmay Tokon a Karmel.
Iyaw mananaro a boboh mo,
ki akmay kīta no obi a maidāyaw a molmolagātan no āri.
6 Ay, āngwa kapintas mo! Makaay-āyo ka.
Ay, mo Ipatpateg ko, taywara a kagānas myan dyimo.
7 Iyaw karakohan mo, ki akmay kayo no bāro.
As siraw soso mo, ki akma siras naypoypong a asi na.
8 Binata ko a kon ko, “Kayaten ko bārwaya.
Poysen ko saw asi na.”
Siraw soso mo pakono, ki akma siras ipoypong no ōbas,
as no banglo no sang-aw mo akmay mansanas.
9 Siraw dadek mo pakono, ki akmay kagānas no kagaganayan a palek
a tamtamen no bibi kan nyepen.
Iyaw Nobya di Chadaw Na a Baro
10 “Dyira na yaken ni Chadaw ko,
kan no pakakdekden na, ki yaken!
11 Ka dya mo Chadaw ko.
Mangay ta a homabas dyirad bengkag,
ta misaysan ta dyirad sitsīcho.
12 Omhep tanchi a mangay dyirad kaobāsan.
Chibanan ta sya an nagbōsel dana saw ōbas,
an nagbosak dana saw bōsel da,
as an nagsabong danaw granada.
Dawri itoroh konchiw adaw ko dyimo.
13 Siraw mandrarogas,*7:13 Gen. 30:14-16 mapasngaw sas banglo da,
kan do anmo no pantaw ta,
ki tabo kagaganayan a asi no kayo a bayo kan adan
a kinapya ko para dyimom Chadaw ko.”