1 Do chapat naw a katawen no kapagāri ni Āri Daryos, nangipakatoneng si ĀPO so minsāhi na di Sakaryas do chapat naw a karaw, do chasasyam naw a kabohan a mapangaranan so Kisleb.

2 Tinoboy da san taga Betel saw sa Sareser kan Regemmelek kontodo tawotawo da saw a mangay do Timplo ni ĀPO a mangdaw so bindisyon ni ĀPO. 3 Inpaiyahes da dyirad papādi saw kan aran propīta saw do Timplo ni ĀPO a Manakabalin do Tābo iyaw nya a kon da, “Tongtongen namen pawriw magdongdong-aw kan magayonar do chadadima naya bohan*7:3 Maynamot do nakarārayaw naw no Timplo, paynamotan da magdongdong-aw kan magayonar. a akmas pinariparin namenaw do nakahabas saya āro a tawtawen a mandas changori?”

4 Sinpangan na, inpakatoneng ni ĀPO a Manakabalin do Tābo minsāhi naw dyaken a kāna, 5 “Ibahey mo dyirad tabo tawotawo saya do tana a Joda as kan do papādi saya iyaw nya: ‘Do nakapagayonar kan nakapagdongdong-aw nyowaw do chadadima naw kan chapapito naw a kabohan, do kayan papitwaya poho a katawen a nakaakaw nyo a yapo do tana nyo, yaken nawriw pinadayāwan nyo? Engga! 6 As kan do kapaychakakan kan kapaychaynoynom nyowaw, tod nyo abawri a parinen a para do inaynawan nyo?’ ”

7 Batahen pa ni ĀPO a kāna, “Tinongpal nyo pakono iyaw inpaibahey kwaw dyirad nanmanma saw a propīta saw do chimpwaw a no Jerosalem, ki mabaknang kan āro so tawotawo a aran do omdibonaw a idiidi, do abagātanaw a Negeb†7:7 Negeb, ki midyo let-ang a yanan. kan do paytokonan saw do lāod naw.”

8 Inpakatoneng dana ni ĀPO minsāhi naw di Sakaryas a kāna, 9 “Nyaw batahen ni ĀPO a Manakabalin do Tābo a kāna, ‘Ipākat nyo kosto a kapangokom; ipaboya nyo kāsi kan kapachipangdidiw do katakatayisa dyinyo. 10 Idadanes nyo sabaw bālo saw mana olīla saw, aran siraw gan-ganaet saw mana mapopobri saw. Iktokto nyo abaw mangīsad so marahet do kapayngay nyo a tawo.’

11 “Ki chinaskeh dan tawotawo ko saw nangadngey. Do katwaw no oho da, tomnadyichokod sa, as nakabengbeng das tadyinya da. 12 Pinatwa daw pospōso da akmay bato tan dyi sa mangadngey so linteg kan inanawo kwaw a inpaipakatoneng ko dyirad nanmanma saw a propīta ko saya. Dawa, nakasoli ako so taywara dyira. 13 Maynamot ta akma say bitor do nakapaychirin kwaw dyira, inkaskāso ko sabaw dasal da. 14 Akmas bagyo, pinasayaw ko sa a nangay a minyan do gan-ganaet a nasnasyon. Dawa, iyaw nya maganay a tana a kinarwan da, ki nainonolay a makalidliday, kan apabaw aran asa a maparin a omyan daw.”