9
No Kaokom Da no Kabōsor Saya a Nasyon no Israel
1 Nyaw minsāhi ni ĀPO a maikontra do tana a Hadrak*9:1 Iyaw tana a Hadrak, ki akmay myan do ammyānan no Israel a masngen do syodad no Damasko.
kan do syodad no Damasko.
Ta dyira na tabo tawotawo do lōbongaya
a akmas tabo no trībo no Israel a dyira pa ni ĀPO.†9:1 Mana “Ta tabo mata dan tawotawo kan tabo trībo no Israel, ki tangayen da si ĀPO.”
2 Masaw do Hamat a myan do payawan Hadrak kan do Damasko.
Akma saw do syodad dan Tiro kan Sidon kontodo kasirīban da.
3 As no Tiro, ki namarin so kōta na.
Nangpeh pa so āro a pirak a tod a akmay ahbek,
as kan balitok a tod a akmay hota do kalsāda.
4 Ki si Āpo ikaro nanchiw tabo warawaraya no nya Tiro,
kan abohen na sanchiw bīleg naya do tāw.‡9:4 Mana “ipoha nanchiw kinabaknang na do tāw”.
As iyanchiw nya syodad, ki temtemen nanchi.
5 No Askelon, paybinākel nanchi do kaboya na sya.
As do kaboya nanchi sya no syodad no Gasa, ki matotōok anchi.
As aran do Ekron, ki mabo nanchiw namnāma na.
As mabonchi no Gasa iyaw āri na,
as apabanchiw omyan do Askelon.§9:5 Askelon, Gasa, Ekron, kan Asdod, ki syodad sa Palisteo.
6 Masagesagel dananchi a gan-ganaet omyan do Asdod,
as pachipandahen ko naw pangas dan nya Pilisteo.
7 Sodiben konchiw maraya a karni*9:7 Siraw Pilisteo, ki minonot saba do Linteg ni Moyses a mabaywan saw Israelita a koman so raya. Gen. 9:4; Leb. 3:17; Deot. 12:16 do dangoy da
mana kadwan a mabaywan a mākan do payawan no nyepen da.
As tabonchi a makalāsat, ki mayparin a tawo ko,
kan akma dana sanchiw asa kapartīdos do trībo no Joda.
Masaw siranchiw taga Ekron, ki mayparin sanchi a tawo ko
a akma siras sīgod saw a Jeboseo do Jerosalem.
8 Gwardyaan konchiw naybahayan kwaya
tan abanchiw makasākop a soldādo.
Palobōsan ko pa sabaw mangidadanes saya so tawotawo ko saya,
ta sichangori, nāw ko na sa chichiban.
No Kangay no Āri no Sion
9 Iyoltimo nyo kasoyot nyo, inyo a tawotawo no Sion!
On, pangagagay nyo ragsak nyo, inyo a tawotawo do Jerosalem!
Chiban nyo, kangay dyinyo no āri nyowaya.
Iya, ki malinteg kan myan dyaw kaisalakānan,
mapakombaba kan nakasakay do orbon no asno.†9:9 Mat. 21:5; Jn. 12:15
10 Pakarohen konchiw logan saw a pachigobat do Israel,‡9:10 Mana “Epraim”. Epraim, ki myan do ammyānan. As no Jerosalem, ki myan do abagātan.
kan ikaro konchiw kabalyo saw a pachigobat do Jerosalem,
kan marārayaw sanchiw bai saw a pachigobat.
Machikapya anchiw āri nyo§9:10 Iyaw āri a naibahey dya, ki iyaw Mesias a si Āpo Jesos. dyirad nasnasyon saw.
As no itorayan nanchi, ki yapo do tāw a mandad matarek a tāw,
kan yapo do Oksong a Oprates a mandad pachipandan no tanaya.
No Nakapaybidi Darana no Tawotawo no Dyos
11 Batahen dana ni ĀPO a kāna,
“Maynamot do nakapachitōlag ko dyinyo
a nasilyowan so raya no naidāton a animal,
wayawayaan ko sanchiw tawotawo nyo saw
a akmas nabahodaw do bobon a abos ranom.
12 Maybidi kamo do yanan a abos kaparoparwan,
inyo a nabahod a myan so namnāma.
Sichangori, ibahey ko dyinyo a paypirwahen ko a itoroh dyinyo bindisyon
a pamabidi ko so tabo nakalidyat nyo.
13 Osaren konchiw Joda kan Israel*9:13 “Israel” mana “Epraim”.
a pinakabai kan pinakadāwa na.
Osaren ko sanchiw mahahakay do Sion
a pinakaispāda a machigobat dyirad mahahakay no Gresya.”
14 Magparang anchi si ĀPO do tohos do yanan dan tawotawo na,
kan gomilap anchi a akmay kimat bai na saw.
Si Āpo a DYOS dananchiw magtrompīta,†9:14 Nom. 10:9; 2 Kor. 13:12
as kan mayam anchi a machirayay dyirad bagyo a yapo do abagātan.
15 Si ĀPO anchi a Manakabalin do Tābo mangaywan so tawotawo na,
as kan dimanen da sanchiw kabōsor da do kapagsid so bato.
Akma sanchiw nabok a mangngēngey do paggogobatan,
as kan pawyogen danchiw raya dan kabōsor da.
On, moyog anchi a akmas rayaw no maidāton
do hapot no altar a yapo do palanggana.
16 Anchan marapit nawri a araw, isalākan sanchi ni ĀPO tawotawo na
akmas parinen magpaspastor dyirad arban saw a karniro na.
Komnyaknyay sanchi do tana na
a akmas mapapateg saw a bato a naipadket do korona.
17 Ay, taywara anchi a mabīleg kaganay kan kapintas da.
Iyaw kāro no trīgo kan palek, ki mangpayit anchi so maychakatotobo.
*9:1 9:1 Iyaw tana a Hadrak, ki akmay myan do ammyānan no Israel a masngen do syodad no Damasko.
†9:1 9:1 Mana “Ta tabo mata dan tawotawo kan tabo trībo no Israel, ki tangayen da si ĀPO.”
‡9:4 9:4 Mana “ipoha nanchiw kinabaknang na do tāw”.
§9:5 9:5 Askelon, Gasa, Ekron, kan Asdod, ki syodad sa Palisteo.
*9:7 9:7 Siraw Pilisteo, ki minonot saba do Linteg ni Moyses a mabaywan saw Israelita a koman so raya. Gen. 9:4; Leb. 3:17; Deot. 12:16
†9:9 9:9 Mat. 21:5; Jn. 12:15
‡9:10 9:10 Mana “Epraim”. Epraim, ki myan do ammyānan. As no Jerosalem, ki myan do abagātan.
§9:10 9:10 Iyaw āri a naibahey dya, ki iyaw Mesias a si Āpo Jesos.
*9:13 9:13 “Israel” mana “Epraim”.
†9:14 9:14 Nom. 10:9; 2 Kor. 13:12