1 Manganak, kanakmen mo sa o vatahen ko dimo as kano kawayakan mo sava o yokoyokoran ko nimo. 2 Parinyen mo sa o vatahen ko dimo tapian katahaman mo o somnivog a viay. Pakapiahen mo saya onongan a akma so kapakapia mo sia onongan o mata mo. 3 Entero mo sa di pasiayen o nanawo ko sa dimo. Patneven mo saya do tawol mo. 4 Kakmahen moy kakteh o mapía a kapangtokto as no mapía a kapaysovol so atavo o kakmahen moy mapía dana kayvan mo. 5 Ta niaya sa o mapavawa dimo do kakovot no kadwan anmana dira do mavavakes a manentasion no ichichirin.

6 Do naypisa am maypalawong ako do bintana no vahay ko. 7 Aro sa o navoya ko a kahenakan a mahahakay a dekey so pinangtoktoan amna mian o asa dira sivog a abo pa so kasolivan. 8-9 Mian ya a mayam do rarahan a masngen do vahay no asa ka mavakes. Omhavas sia do vahay aya a masngen do kanto do kapaysarisari na. 10 Nivayat sia no mavakes aya. Mangonay o mavakes aya so onayen no malapos a mavakes as mian o plano na nia. 11 Oyod ya mangdet as abo so asnek a mayam do rarahan. 12 Manapanaya o mavakes aya do payis no rarahan sa anmana do kaaroan no tawo. 13 Nivayat na o mahakay aya as karek na dia. Tiniban na o mata na as kavata na sia, 14 “Tayto o pamistan ko do kayapo ko na do templo, 15 as tiya ako mangay a komita dimo ta oyod koymo ichakey a mavoya. 16 Tori ko oyod a pinakapia a rasayan o kama ko, 17 as kapangay ko dia so maynyen a pabango. 18 Dawa machivan ka diaken ta mayasa ta a manda do mavekhas, 19-20 ta komnaro o kakovot ko as mayvidi ava do dadwa ka dominggo ta rakoh o kartos a inahap na.”

21 Nitentasionan na sia no avid na kano chirin na as nachitoneng o mahakay aya. 22 Dekey as kawnot na do mavakes aya a akmay asa ka vinyay a pawnoten a mangwan do dimanan sia anmana akmay asa ka agsah a mapía so kayam a mangwan do toloan sia, 23 a dia so kadimanan na do pana da no omahap sia. Akma siay asa ka manomanok a mangwan do tolo. No mahakay aya am ara nava mapanmo o katori na do pangananawan no mismo a viay na.

24 Dawa inio a kamahahakayan a manganak ko am kapiahen nio yaken a adngeyen. Iktokto nio so kapiahen o vatahen ko sa. 25 Mapagorogod kava do tentasion no akmaya sia a mavakes. Paypavawan mo sia do viay mo. 26 Oyod dana sa aro mahahakay a mararayaw niaya so viay as kavidangan pa sava o nararayaw na nia. 27 An mangwan ka do vahay na nia am tori ka na do rarahan a mangwan do yanan da no nadiman. Asa ya ka malisto a kapangwan do kadimanan.