1 An machahap ka koman do tawo a mato so anongen am fermi mo a nakmen an sino sia. 2 An mayet ka koman am kontroladohen mo ya. 3 Kalakaman moava o masesdep a kanen a itoroh na, ta tarek na ya a serbien a tod a iyahap dimo.

4 Makapatak ka do kadi mo dimadimanan do kakey mo a maypaynakem, 5 ta tarek a dekey a tiempo as kabo no kaynakman mo a akma so kapakasayap no kangkang an makapanid dana.

6 Machiakan kava do mabayo a tawo anmana ichahoho moava o masesdep a kanen na. 7 “Kakan mo pa,” kwana anti, pero matarek o mian do aktokto na. 8 Iyota mo anti o chinan moaya as kapanehseh mo anti no mapakeakey a vahevahey mo sia.

9 Hawahawayen moava konsehoan o abo so pinangtoktoan, ta arava o sinmo na sia.

10 Abdisen moava o somnivog a tayongkad no paypandan no propidad anmana pohsan mo sava so takey o nasbang. 11 Ta no Apo taya o mayet a omdefende sira as machidiman nira.

12 Adngeyen mo so kapiahen o maistro mo as kapanghap mo so nanawo.

13 Penpenen moava o kadisiplina mo so asa ka metdeh. No iplot am mandiman ava. 14 No kakawyoran na am nia o mismo a omlibri sia do marahet a pangwanan no viay na.

15 Manganak, an mayrakorakoh ka anti a masolib do atavo am oyod ako anti a masoyot. 16 Rakoh anti a onor diaken o kadngey ko dimo a mapavata so kasolivan.

17 Ichaynanahet mo sava o makagatogatosen asna nawri chitahen mo o komwan do kasinchad mo do Dios a onotan, 18 ta mapia o andelak mo an nia o parinyen mo.

19 Adngeyen mo yaken a manganak ko. Kapiahen mo a iktokto o kaparin no viay mo. 20 Machisagel kava dira do maynoynomen anmana dira do maymot do kanen, 21 ta no mavovoken kano maymot am mangwan sa do kapaypakasiasi da, ta an nawri parinyen mo o kapakaycheh kano kakan mo am mayendes ava as kapangonay mo so napiripirit.

22 Adngeyen mo o ama mo, ta naytawo kava an abo sia. An malkem dana o ina mo am ipavoya mo o kapamahemahes mo sia.

23 No kakawyoran, kasolivan kano mapia a pinangtoktoan am mayanong sa ya paygastoan. Oyod a rakoh o balor da nia, dawa paswaden mo sava do aran ango.

24 No mapsek a anak am onor do asa ka ama na. Kayayakan na o akmaya sia anak na.

25 Chitahen mo o kayan no onor da no inyapoan mo a makayamot dimo. Itoroh mo dira o akmaya sia kasoyosoyotan da.

26 Makapia ka manngey a manganak ko as ahapen mo o viay ko a ehemplo mo. 27 No malalapos sa mavavakes am delikado sa ya tolo. 28 Akma sayay manakanakaw a manayayan as kaparin da so aro a mahahakay a mabdis so addaw.

29-30 Pavoyan mo yaken so mavovoken, ta pavoyan koymo so asa ka tawo a oyod a makasi as fermi a omsehseh so karakohan. Asa ka mapasitnan so golo as fermi a mayreklamo. Fermi a mavaya o mata na as kaaro no rawa na a nia sa so naparin a pavawahen. 31 Katentasionan kava no palek a aran oyod ya a makakeakey, masdep so katitiban na as mapia so nakatwatwa na, 32 ta do ichadadwa na karaw am akma kay sinonyit no binino a boday. 33 Aro akmay mavoya mo as kadi na talinngan no kapangtokto kano kapayliliak mo. 34 Akma ka anti mian do bapor a tori do kabkasan do kahango mo as kano kahohed mo. 35 “Sigoro tinaho da yaken,” kon mo anti, “amna ara koava manakem. Mango ako paro a di makapayvangon amna tayto ako pa makey a mirwa ominom.”