SALMO
Introduction
No libro aya no SALMO am katolasan sa ya no kanta kano dasal. Pinatolas da sa ya no matatarek a tawo do nayendes a tiempo. Serbien da sa ya no Israel do kadaday da so Dios.
Mian sa dia o kanta a idaday so Dios as mian sa o dasal no kapangahes so sidong, proteksion, kalibrian kano kapakabo so gatos. Kanta pa sa ya a mamahemahes do Dios do kasisien na kano nakatoroh na so kalibrian dira do komontra sira. Kanta kano dasal sa ya no nasion no Israel. Do SALMO paya o pawnonongan no asa ka tawo o personal a relasion na do Dios.
Sinerbi ni Jesus o Salmo saya do kapananawo na as aro malir ta do VAYO A TESTAMENTO a pinatolas da no Apostoles a yapo do SALMO.
No mayhahaw saya a pinayvatan a Salmo am pinidi sa ya do libro aya no SALMO a asa ka oyod a mapia a libro do Biblia do kadaday so Dios.
2
No patol a pinidi no Dios
1 Ango solian da no Dios no nasiones aya. Ango paro o aro a planohen da a abo so kayayawan. 2 Nayprepara sa o patopatol no mondo aya as kano naychakasa sa o manyokoyokod sira a omarap so Dios kano tinongdo na a Patol. 3 Vatahen da no tawotawo, “Librien ta o karakohan ta do panyokoyokoran da as kararayaw ta so ipakapamarin da.”
4 Amna mayak o Dios do trono na do kapaypalawong na do plano da sa a di makapakatongtong. 5 Do kwanasaw am ipapanmo na dira no Dios o kaket na nira a manda do kasinchad da do ipakapamarin na as kamo da do kavata na sia, 6 “Tayto dana o pinidi ko a maypatol do Sion a niaya so manamonamo a kavahayan ko.”
7 No pinidi naya no Dios a Patol am niaya o nitbay na, “Ipapanmo ko sa anti o abo aya so pandan a plano no Dios, takwan vinata diaken no Dios, ‘Imo o Manganak ko as do sicharaw am nayvadiw ako a Ama mo. 8 Akdawen mo diaken o atavo sa nasiones, ta itoroh ko sa anti dimo o atavo a kavahayan do mondo aya. 9 Oyod anti a rakoh o ipakapamarin mo, ta akma anti so kayeyet no kapsapsa sia no barita o banga.’ ”
10 Dawa adngeyen nio ya, inio a patopatol kano manyokoyokod do mondo aya tapian makasolib kamo as kapakatanggal nio. 11 Payserbian nio o Dios as kapamahbo nio a sominchad do ipakapamarin na. 12 Sincharan nio o Manganak naya no Dios tapian dia somoli as kakastigo na dinio. Patanggalen koynio ta an somoli am mararayaw kamo. Amna mapalak sa o mangay sia a machipel.