1 Apo ko a Dios, pachonongan mo yaken ta imo o pachipelan ko. 2 Vinata ko, “Imo o Apo ko as atavo a narawat ko a mapia am yapo dimo.”

3 Oyod a mapia o kapachasa dira do tawotawo sa no Dios as oyod ko ya a rakoh a kasoyosoyotan. 4 Sira o matarek so angayan a dia voken a no Dios am mangpeh sa so problema, dawa machahap akoava do katoroh da so sakrifisio da kano kapanganianib da so diosdiosan da sa.

5 Takwan imo o Apo ko as kano Dios ko. Imo o tomoroh diaken so atavo a kaylangan ko. No andelak ko am mian do tanoro mo. 6 No atavo a mian diaken am yapo sa dimo as oyod a mapia. Oyod sa makakniknin o itoroh mo sa diaken.

7 Dadayen ko o Apo ko takwan pawnoten na yaken as kananawo na diaken. Aran mahep do kanakenakem ko sia am torohan na yaken so kasolivan as kavahey na nia diaken o mayanong ko a parinyen. 8 Fermi ko sia a manakem, ta mapanmo ko o kafermi na diaken no Dios as dawa arava o ichamo ko.

9 Makayamot dia am magsal ako as dadayen ko sia as masigorado ko, 10 ta piahen moava o kavidin no pahad ko do yanan da no nadiman as kano piahen moava o kahta no karakohan ko. 11 Ta pinapanmo mo diaken o kapirwa ko a maviay a abo so pandan as masoyot ako ta machirayay ka diaken as no kapachasa ko dimo am pakamian a abo so kapachikomparan.