1 Dadayen ko o Dios so pasivogen ko do tawol ko! Dadayen ko o masanto a ngaran na! 2 Dadayen ko o Dios as kawayakan ko sava o atavo a kapichapian na diaken. 3 Iya o ompakabo so atavo a gatos ko as iya o tomovatova diaken. 4 Pachonongan na yaken a pavawahen do kadimanan as kabendision na diaken no di machipanda a addaw kano kasisien na. 5 Iya o ompakamia diaken do viay ko, ta itoroh na o atavo a ichapia ko as kapayavayo na so ayet ko.

6 Mahosto o parinyen no Dios, ta iyagom na sa o pakasisien da sa as katoroh na nia o anohed da. 7 Pinapanmo no Dios o panyokoyokoran kano plano na sa di Moises as kapavoya na nia dira do tawotawo sa a Israel o makakniknin sa a pariparinyen na. 8 No Dios am masisien kano madadawen. Oyod sia a matanoy as kadi na abdibdisan no addaw na. 9 Mavidin nava naknakmen no Dios o gatos ta anmana mavidin ava o soli na. 10 Kastigoan nava yaten so machinaho do gatogatos kano sinadasadan ta sa. 11 Akma so katoatohos no hanyit kano tana aya am nawri o kaparin no karakorakoh no addaw nira no Dios o sominchad as omanib sia. 12 As akma so kararayi no twawan no araw do asdepan na am nawri o kararayi no pinohan na nia o gatogatos ta sa. 13 Akma so katanoy no asa ka ama do manganak na sa am nawri o kaparin no Dios dira do sominchad as omanib sia, 14 takwan ari na mapanmo o kakaha ta. Manakem na o kayapo ta do tana.

15 No araw sa no kayan no ayet ta do tana aya am akma so kaparin no dibobot. Akma ta pa so savosavong do takey a dekey so kavoyan so avid na, 16 ta an kawara no salawsaw a omviot am pasayawen na sia as kabo narana. 17 Asna no addaw no Dios am arava o pamandan na dira do sominchad as omanib sia. Sincharan na sira a mahosto do salapan na o atavo a henerasion, 18 sira o mavidin a omonong do trato na dira kano manganohed do panyokoyokoran na sa.

19 Do hanyit o yanan no trono no Dios as iya o maypatol do atavo. 20 Dadayen nio o Dios, inio a maheheyet kano mian so ipakapamarin a angheles, inio a manganohed do panyokoyokoran no Dios as domngey so vatahen na sa. 21 Dadayen nio o Dios, inio a mian do hanyit a inio a pachirawatan no Dios a omparin so ichakey na! 22 Dadayen nio o Dios, inio atavo a inamaog do aran dino a yanan nio do paypatolan na! Dadayen ko paymo, O Dios, so pasivogen ko do tawol ko!