1 O Dios a imo so dadayen ko am adngeyen mo yaken do katawatawag koaya dimo, 2 ta tayto da yaken a parahten as kapavata da so daday a komapet diaken no makagatogatosen saya tawo. 3 Oyod sa marahet o vatahen daya diaken as kontrahen da yaken a abo so pakayapoan. 4 Niaya o ivahes da dia o kapsek ko dira amna mapanmo mo o kadadasalen ko a tawo. 5 Vahsan da yaken no marahet do mapia sa parinyen ko dira as kaket da niaken a aran mapia o dadakay ko dira.

21 Amna mo Apo ko a Dios am sidongen mo yaken akma so nipromisa mo as kalibri mo diaken a makayamot do addaw mo. 22 Oyod ako makasi kano mangaylangan as kaynyenan ako do irahem no tawol ko. 23 Maypakaha ako as oyod ako na masonong a mahomis do viay ko akma so kasonosonong no kaponas so kavaga do tachay. 24 No tood ko am oyod a makakaha a makayamot do kakolang no kanen ko as oyod ako na magolang kano makaha. 25 An mavoya da yaken no komontra sa diaken am ichayak da yaken as kapaylilinlin da omtek niaken.

26 Dawa sidongen mo yaken mo Apo ko a Dios as kalibri mo diaken do di aya machipanda a addaw mo, 27 as ipapanmo mo dira do komontra aya diaken o kaimo na no omlibri aya kano somidong aya diaken. 28 Aran avayen da yaken amna bendisionan mo yaken. Ari ko masigorado o kahomis da as yaken a pachirawatan mo o masoyosoyot anti. 29 Panghomisen mo sava o komontra aya diaken do aran ango a parinyen da. No gatos da am rakoh anti a pakasnekan da.

30 Amna fermi ko anti kaliaken o kapamahemahes ko do Dios as kadaday ko sia do kakpekpehan da no tawotawo na sa, 31 takwan machitangked sia a omdefende sira o makasiasi as kalibri na sira do omakosa dira.