10
1 Hermanos, aatz vaꞌl nital u vaanima, ayaꞌ vaꞌl sachitpu qꞌu Israeel tu qꞌul ipaav. Utz tiira nunqꞌila unsikꞌle u Tioxh tiꞌ. 2 Tan tekꞌ vootzaj aas nojchit kꞌonel taanima tiꞌ Tioxh nitaleꞌ. Pek yitꞌeꞌch koj inimaleꞌ vaꞌl nimotxiꞌaneꞌ. Yeꞌ tootzaj u txumbꞌal tiꞌ. 3 Tan yeꞌ tootzaj vijikomil u Tioxh tiꞌ taqꞌax bꞌens bꞌaꞌn qꞌu aanima. Echixeꞌat nichok txumbꞌal aas ijunal samotxichitpu jeꞌ tibꞌ tu qꞌul ipaav. Yeꞌxhkam nitoksa tetz vijikomla txumbꞌal u Tioxh. 4 Tan yeꞌxhat nimotxbꞌenku te aas aꞌ tzojpixsan utz, aꞌ yaꞌsan u oꞌtla mantaar u Cristo. Utz abꞌil qꞌuꞌl sakꞌujeꞌ ikꞌuꞌl tiꞌ, aꞌ qꞌuꞌl sabꞌens bꞌaꞌn vatz Tioxh.
5 Tan itzꞌibꞌaka u Moisees kaniꞌch ibꞌens jikom qꞌu aanima vatz u Tioxh tiꞌ inimal u oꞌtla mantaar. Tal ech tzaꞌ: —Aatz u aanima vaꞌl nojchit soꞌoleꞌ tiꞌ itzojpil vaꞌl nital u mantaar, aꞌ vaꞌl siꞌitzꞌpu vatz Tioxh.— Texhtuꞌ.*Choktaj u Leviitico 18.5. 6 Utz tal paj u Moisees majte kaniꞌch ibꞌens bꞌaꞌn qꞌu aanima vatz u Tioxh qꞌuꞌl sakꞌujeꞌ ikꞌuꞌl tiꞌ u Tioxh: —Ech yeꞌ koꞌxh etala aas tzian atilku u Tioxh sekꞌatza. Tan ministeer koj sajeꞌopꞌoꞌ tu Amlika tiꞌ en tiqꞌol kuꞌl viTxaaom u Tioxh. 7 Utz yeꞌ koꞌxh etal majte aas tzian koꞌp tu mam jolobꞌtxan xoꞌl kamnaj atilku u Cristo. Utz ministeer seꞌnqiqꞌo jiꞌul.— Chia.†Choktaj u Deuteronoomio 30.12-14. 8 Pek ¿kam tok vaꞌl nitaleꞌ tziꞌ uncheeꞌ? Aꞌ nitaleꞌ vaꞌl tzꞌibꞌamalka ech tzaꞌ: —Najaꞌ koꞌn atilku u yolbꞌal Tioxh sekꞌatza. Atil tetziꞌ utz, tetaanima.— Chia. Tan aꞌ u yol vaꞌl nikupaxsa itziiul, tetz kꞌujeꞌich kꞌuꞌl tiꞌ Tioxh. 9 Utz sachitpꞌaxh tu qꞌul apaav tuchꞌ koꞌxhtuꞌ saal tuchꞌ atziꞌ aas aꞌ u Bꞌaala u Jesuus. Utz sanima tuchꞌ avaanima aas qꞌaav itzꞌpixsamal xoꞌl qꞌu kamnaj tu u Tioxh. 10 Tan tu taanima u aanima sinimava aas nibꞌens bꞌaꞌn vatz u Tioxh. Utz satal tuchꞌ itziꞌ aas chitpi tu qꞌul ipaav.
11 Echaꞌ vaꞌl nital u Yolbꞌal Tioxh ech tzaꞌ:
—Abꞌil vaꞌl kꞌujlel ikꞌuꞌl tiꞌ,
yitꞌ saꞌkojchꞌixvixsali.— Chia.‡Choktaj u Isaias 28.16.
12 Tan yeꞌk tel qꞌu Israeel tuchꞌ qꞌu puera aanima vatz u Tioxh. Tan aꞌ u kuBꞌaal sukukajayil utz, sibꞌla bꞌaꞌnil nitaqꞌ kuꞌl tiꞌ qꞌu aanima qꞌuꞌl niqꞌilan nisikꞌlen. 13 Ech sachitpu kajay qꞌu aanima qꞌuꞌl saqꞌilan sasikꞌlen vibꞌii u kuBꞌaal.§Choktaj u Joel 2.32.
14 Loqꞌ ¿kaniꞌch iqꞌilat isikꞌlet vibꞌii u Jesuus, untzꞌoj yeꞌsaj inimataꞌ? ¿Kaniꞌch inimataꞌ, untzꞌoj yeꞌ nitabꞌi abꞌil u Jesuus? Utz ¿kaniꞌch tabꞌitaꞌ, untzꞌoj yeꞌxhabꞌil nialon te? 15 Utz ¿abꞌil seꞌnalon u bꞌaꞌnla chusbꞌal te, oj yeꞌxhabꞌil sachajaxi seꞌntaleꞌ? Echaꞌ vaꞌl nital u Yolbꞌal Tioxh:
—¡Tiira txꞌanel nitopon
qꞌu paxsan tetz u bꞌaꞌnla chusbꞌal,
qꞌu iqꞌon tetz u bꞌaꞌnil!— Chia.*Choktaj u Isaias 52.7; u Nahuum 1.15.
16 Loqꞌ yitꞌ kajay koj qꞌu Israeel niniman u bꞌaꞌnla chusbꞌal. Echaꞌ nital u Isaias ech tzaꞌ:
—UnBꞌaals Amlika, ¿abꞌil bꞌoj niniman u yol niqal saiꞌ?— Chia.†Choktaj u Isaias 53.1.
17 Tan tiꞌ u tabꞌil u yolbꞌal Tioxh, nichee u kꞌujlebꞌal kꞌuꞌl tiꞌ u Tioxh. Ech, aꞌ vixeꞌal viyolbꞌal u Tioxh.
18 Loqꞌ yitꞌ tiꞌ koj aas yeꞌ nitabꞌi u yolbꞌal Tioxh qꞌu Israeel. Nimotxtabꞌi. Tan nital u Yolbꞌal Tioxh:
—Vetpax bꞌen u yolbꞌal Tioxh tu kajay u vatz amlika txꞌavaꞌ.
Abꞌili tijuꞌtebꞌal u vatz txꞌavaꞌ.— Chia.‡Choktaj u Salmos 19.4.
19 Utz yitꞌ tiꞌ koj majte aas yeꞌxhat nimotxbꞌenku te. Pek tibꞌaxa, abꞌitaj vaꞌl tal u Moisees ech tzaꞌ:
—Savoksa ixaꞌv sekꞌuꞌl tiꞌ vaꞌt u tenam yitꞌ untenamich koj.
Utz sunlakpixsa eviꞌ tiꞌ maꞌl u tenam vaꞌl yeꞌk itxumbꞌal.— Chia.§Choktaj u Deuteronoomio 32.21.
20 Utz abꞌitaj viyol u Isaias majte tan, yeꞌk ixoꞌval nital ech tzaꞌ:
—Aal aꞌ chabꞌanin qꞌu aanima
qꞌuꞌl yeꞌ nichchokonin.
Utz vetvaqꞌ tzii aas aꞌ saootzajin qꞌu aanima
qꞌuꞌl aal yeꞌxhkam nichꞌoti abꞌil in.— Chia.
21 Utz nital tiꞌ qꞌu Israeel ech tzaꞌ:
—Iqꞌiil nichunchꞌia maꞌl u tenam aas sikꞌaxa ikꞌuꞌl tan,
qelol utz, tzꞌejxinaj.— Chia.*Choktaj u Isaias 65.1-2.
*10:5 Choktaj u Leviitico 18.5.
†10:7 Choktaj u Deuteronoomio 30.12-14.
‡10:11 Choktaj u Isaias 28.16.
§10:13 Choktaj u Joel 2.32.
*10:15 Choktaj u Isaias 52.7; u Nahuum 1.15.
†10:16 Choktaj u Isaias 53.1.
‡10:18 Choktaj u Salmos 19.4.
§10:19 Choktaj u Deuteronoomio 32.21.
*10:21 Choktaj u Isaias 65.1-2.