2
1 Estiꞌeꞌ ni val sete, eteesataj etibꞌ kꞌatz unqꞌa vaꞌlexheꞌ uveꞌ nibꞌan unqꞌa uxhchileꞌ svatzaj. As yeꞌ la emaxtibꞌe umaj uxhchil. As jit ex kaꞌvatz la ebꞌaneꞌ. As yeꞌ la ichꞌoꞌnsa tibꞌ etaama. As mitaꞌn la icheesa tibꞌ yol setiꞌaj.
2 As ech etachvat viyol u Tiixheꞌ echeꞌ ijajat umaj tal neꞌ ichꞌuꞌ uvaꞌ aꞌn itzꞌebꞌnale, aqꞌal uvaꞌ la etootzi viyol u Tiixheꞌ tiꞌ enimataꞌ. As la chee veꞌt etxumbꞌal tiꞌ unqꞌa nimla bꞌaꞌnileꞌ uvaꞌ alel kan setiꞌ taꞌn u Tiixheꞌ,
3 tan ootzimal itxumbꞌal u Kubꞌaal Jesucristo setaꞌn uvaꞌ bꞌaꞌn itxumbꞌal Aak nibꞌan sete.
Nim talcheꞌ u Jesucristo xoꞌl vitenam
4 As kꞌuxh aꞌ u Cristo aqꞌol tetz kutiichajil kꞌatz u Tiixheꞌ, as ech tatin u Cristo vatz unqꞌa tenameꞌ echeꞌ umaj kꞌubꞌ uvaꞌ kat sutil el taꞌn u lakol kabꞌaleꞌ, tan yeꞌl itxaꞌk svatz. Pet vatz u Tiixheꞌ as ech tatin u Cristo echeꞌ umaj kꞌubꞌ uvaꞌ txaael taꞌn umaj uxhchil, tan nim ijaꞌmil. As jankꞌal ex uvaꞌ nimamal u Cristo setaꞌn,
5 as at etiichajil kꞌatz u Tiixheꞌ. As ex veꞌt tetz Aak taꞌn u Tiixhla Espíritu uvaꞌ at veꞌt ok tetaanxelal, tan kat toksa veꞌt ex Aak sitenam, ex uvaꞌ ech etatineꞌ echeꞌ umaj kabꞌal vatz Aak, aqꞌal uvaꞌ la chiibꞌ veꞌt u Tiixheꞌ tiꞌ unqꞌa veeꞌ nebꞌaneꞌ, tan jik chit nenach veꞌt Tiixh tiꞌ unqꞌa tenameꞌ tukꞌ vibꞌaꞌnil u Jesucristo.
6 Tan ech ni tal umaꞌl u yol ileꞌ uvaꞌ tzꞌibꞌamal kan:
«La unkꞌujbꞌaꞌ kan umaꞌl u kꞌubꞌ tu u tenameꞌ uvaꞌ Sion.
As u kꞌubꞌeꞌ uvaꞌ oksamal iqꞌii svaꞌn, as aꞌeꞌ uvaꞌ ni yakꞌinsan u tenameꞌ.
As ech tatin u kꞌubꞌeꞌ sunvatz echeꞌ umaj kꞌubꞌ uvaꞌ txaael veꞌteꞌ, tan nim ijaꞌmil.
As abꞌil uvaꞌ la ikꞌujbꞌaꞌ ikꞌuꞌl stiꞌ, as yeꞌ la eesal iqꞌii u uxhchileꞌ,» tiꞌk u Tiixheꞌ.
7 As ech u Jesús sevatz, ex uvaꞌ kꞌujleꞌl ekꞌuꞌl tiꞌ Aak, echeꞌ umaj bꞌaꞌnla kꞌubꞌ uvaꞌ nim ijaꞌmil.
Pet ech koj vatz unqꞌa tenameꞌ uvaꞌ yeꞌ nisaꞌ ikꞌujbꞌaꞌt ikꞌuꞌl tiꞌ Aak,
tan ech tatin Aakeꞌ svatz echeꞌ umaj kꞌubꞌ uvaꞌ la ixval taꞌn unqꞌa lakol kabꞌaleꞌ.
As tul aꞌ u kꞌubꞌeꞌ uvaꞌ xeꞌabꞌ tetz u kabꞌaleꞌ.
8 As ech tatin u Jesucristo vatz unqꞌa tenameꞌ uveꞌ yeꞌ ni niman Aak echeꞌ
umaj kꞌubꞌ uvaꞌ la itxꞌet unqꞌa tenameꞌ toj stiꞌ.
As la jojtxꞌu veꞌt staꞌn.
As yeꞌ nikꞌujbꞌaꞌ unqꞌa tenameꞌ ikꞌuꞌl tiꞌ u Tiixheꞌ, tan tiꞌ uvaꞌ yeꞌ nisaꞌ inimat viyol Aakeꞌ. As kꞌujlu veꞌt kan stiꞌ uvaꞌ ech la ibꞌaneꞌ.
Niyolon u Luꞌ tiꞌ vitenam u Tiixh
9 Pet ech koj ex, tan txaael veꞌt ex taꞌn u Tiixheꞌ tiꞌ etok sitenam Aak as tiꞌ etok nachol Tiixhil tiꞌ unqꞌa tenameꞌ, tan ex veꞌt tetz Aak. As kat itxaa ex Aak tiꞌ uvaꞌ la bꞌen etal isuuchil viyol Aakeꞌ tulaj unqꞌa tenameꞌ tiꞌ vinimla bꞌaꞌnil Aakeꞌ, tan kat teqꞌo el tzan Aak vetaanxelaleꞌ tu u qꞌej toktoeꞌ. As kat toksa veꞌt ex Aak sitenamil uvaꞌ atkat u txijun tetz vetaanxelaleꞌ uvaꞌ achaꞌv chittuꞌ.
10 As jitik ex itenam u Tiixheꞌ bꞌaxa. Pet ech koj cheel, tan ex veꞌt itenam Aak. As bꞌaxa yeꞌxnik pal ex stuul uvaꞌ nitxum Aak evatz. Pet ech koj cheel, tan ootzimal veꞌt setaꞌn uvaꞌ nitxum Aakeꞌ evatz.
Niyolon u Luꞌ tiꞌ uvaꞌ kam itxumbꞌal vitenam u Tiixh la ibꞌaneꞌ
11 Vitzꞌin vatzik ex uvaꞌ xoꞌn ex sve, as ex uvaꞌ tilumal el ex tu vetenameꞌ, as bꞌiil kuxh la pal ebꞌan vatz u txꞌavaꞌeꞌ. Estiꞌeꞌ nunbꞌeya sete tiꞌ uvaꞌ la eyaꞌsa ebꞌanat u tachaꞌv vechiꞌoleꞌ uvaꞌ nepaavin staꞌn, tan aꞌ unqꞌa tachaꞌv vechiꞌoleꞌ niyaa tibꞌ tukꞌ u bꞌaꞌnla txumbꞌaleꞌ uvaꞌ at tu vetaanxelaleꞌ.
12 As aꞌ unqꞌa jikla txumbꞌaleꞌ la ekꞌuch xoꞌl unqꞌa tenameꞌ uvaꞌ yeꞌ ni niman u Tiixheꞌ. As kꞌuxh kam kuxh umaj vaꞌlexh la cheesal setiꞌ, as la ekꞌucheꞌ uvaꞌ jik veꞌt etxumbꞌal nebꞌaneꞌ. As la toksa veꞌt unqꞌa tenameꞌ iqꞌii u Tiixheꞌ tu u qꞌiieꞌ tiꞌ u tulebꞌal u Jesús unpajte, tan la til unqꞌa tenameꞌ u bꞌaꞌneꞌ uvaꞌ nebꞌaneꞌ.
13 As tiꞌ uvaꞌ nimamal u Kubꞌaal Jesucristo setaꞌn, as estiꞌeꞌ la enima unqꞌa uxhchileꞌ uvaꞌ at tijleꞌm, echeꞌ u ijlenaaleꞌ uvaꞌ ibꞌooqꞌol u tenameꞌ,
14 tukꞌ unqꞌa bꞌanol ivatz u ijlenaaleꞌ, tan at veꞌt tijleꞌm taꞌn u ijlenaaleꞌ tiꞌ taqꞌat kꞌaxkꞌo tiꞌ unqꞌa uxhchileꞌ uvaꞌ ni bꞌanon u vaꞌlexheꞌ as tukꞌ tiꞌ toksal iqꞌii unqꞌa uxhchileꞌ uvaꞌ bꞌaꞌn nibꞌaneꞌ.
15 As aꞌ nisaꞌ u Tiixheꞌ setiꞌ uvaꞌ aꞌ u bꞌaꞌneꞌ la ebꞌaneꞌ, aqꞌal uvaꞌ yeꞌ la chee iyol unqꞌa uxhchileꞌ setiꞌ uvaꞌ aꞌ kuxh u onkonileꞌ nibꞌaneꞌ, tan yeꞌ ninima u Tiixheꞌ.
16 As kꞌuxh qꞌalpumal veꞌt ex taꞌn u Jesucristo, as echiniꞌk etal jeꞌ ileꞌ sete: «La uchi uvaꞌ la kubꞌan u vaꞌlexheꞌ, tan qꞌalpumal veꞌt oꞌ,» chajiniꞌk ex la etaleꞌ. Pet aꞌ u bꞌaꞌneꞌ la ebꞌaneꞌ, tan nimamal veꞌt u Tiixheꞌ setaꞌn.
17 As eqeetaj etibꞌ sevatzaj tukꞌ unqꞌa uxhchileꞌ skajayil. Exoꞌnitaj unqꞌa qitzꞌin qatzikeꞌ uvaꞌ ni niman u Tiixheꞌ. As exoꞌvataj u Tiixheꞌ. As enimataj u ijlenaaleꞌ.
18 As jankꞌal ex uvaꞌ atoꞌk ex skꞌamil xeꞌ umaj bꞌaal aqꞌon, as kꞌuxh bꞌaꞌn itxumbꞌal as kꞌuxh yeꞌ bꞌaꞌn itxumbꞌal, as la enima kam uvaꞌ la tal sete.
19 Asoj nepalebꞌe kꞌaxkꞌo kꞌuxh yeꞌl umaj vaꞌlexh kat ebꞌana, as ateꞌ vibꞌaꞌnil u Tiixheꞌ setiꞌ, tan nekuy unqꞌa kꞌaxkꞌoeꞌ uvaꞌ nepalebꞌe tiꞌ uvaꞌ nimamal veꞌt u Tiixheꞌ setaꞌn.
20 Pet asoj la qꞌospu veꞌt ex tiꞌ u vaꞌlexheꞌ uveꞌ kat ebꞌana, as yeꞌl eqꞌii la oksali, tan aꞌ u vaꞌlexheꞌ nebꞌaneꞌ. Pet asoj nekuy unqꞌa kꞌaxkꞌoeꞌ uvaꞌ nepalebꞌe as tul aꞌ u bꞌaꞌneꞌ nebꞌaneꞌ, as ateꞌ vibꞌaꞌnil u Tiixheꞌ setiꞌ,
21 tan kat imolo ex Aak tiꞌ uvaꞌ la ebꞌan u bꞌaꞌneꞌ kꞌuxh la epalebꞌe u kꞌaxkꞌoeꞌ stiꞌ. As echat la ebꞌaneꞌ echeꞌ uvaꞌ kat ikꞌuch kan u Jesucristo, tan kat ipalebꞌe Aak u kꞌaxkꞌoeꞌ sqiꞌ.
22 As yeꞌlik ipaav Aak.
As mitaꞌn umaj chuli yol kat el chꞌuꞌl titziꞌ Aak.
23 As tul kat yoqꞌpu veꞌt Aak, as yeꞌl ichꞌexel kat tal Aak. As tul kat ipalebꞌe Aak u kꞌaxkꞌoeꞌ, as yeꞌ kat tal Aak ibꞌanax ichꞌexel te unqꞌa uxhchileꞌ. Pet aal kat ikꞌujbꞌaꞌ Aak ikꞌuꞌl tiꞌ u Tiixheꞌ uvaꞌ jik chit tuk bꞌanon isuuchil unqꞌa tenameꞌ uvaꞌ kat bꞌanon u vaꞌlexheꞌ te u Jesucristo.
24 As tul kat kꞌaxbꞌisal vichiꞌol u Jesucristo vatz u kuruseꞌ, as kat teqꞌo veꞌt Aak u kupaaveꞌ stiꞌ, as ech veꞌt oꞌeꞌ echeꞌ kamnaj la ibꞌan vatz u paaveꞌ. As isleꞌl veꞌt oꞌ tiꞌ kubꞌanat u jikeꞌ. As kat kꞌaxbꞌisal vichiꞌol Aakeꞌ sqiꞌ setukꞌ, aqꞌal uvaꞌ bꞌaꞌn veꞌt qatin vatz u Tiixheꞌ la ibꞌaneꞌ,
25 tan echik veꞌt qatineꞌ setukꞌ echeꞌ umaj kaneeroꞌ uvaꞌ tzꞌejxinalike. Pet ech koj cheel, tan kat qꞌaaviy veꞌt ok oꞌ kꞌatz u Jesucristo uvaꞌ ech tatineꞌ echeꞌ umaj xeen txoo tan ni til Aak kusuuchil.