3
1 As tul uvaꞌ atik oꞌ tu u Atenas, as yeꞌ nik kukuy qabꞌit etzibꞌlal. As kat kutxumbꞌali veꞌteꞌ uvaꞌ la kaa oꞌ tu u Atenas.
2 As kat kuchaj veꞌt bꞌen u qitzꞌin qatzikeꞌ u Timoteo sexoꞌl, tan ikꞌam u Tiixheꞌ naj, tan niloch oꞌ naj tiꞌ talpu u bꞌaꞌnla yoleꞌ tetz u Cristo. As kat kuchaj bꞌen tiꞌ uvaꞌ la bꞌen iyakꞌinsa veꞌt etaanxelal as tiꞌ ibꞌeyal veꞌt sete tiꞌ u kꞌujlebꞌal ekꞌuꞌleꞌ,
3 aqꞌal uvaꞌ yeꞌxhebꞌil la sotzsan ekꞌuꞌl taꞌn unqꞌa kꞌaxkꞌoeꞌ uveꞌ nepalebꞌe. As ootzimaleꞌ setaꞌn uvaꞌ la chit kupalebꞌe unqꞌa kꞌaxkꞌoeꞌ.
4 Tan tul uvaꞌ atiktel oꞌ sexoꞌl, as kat kubꞌaxsa qalat veꞌt sete uvaꞌ la chit kupalebꞌe unqꞌa kꞌaxkꞌoeꞌ. As ootzimaleꞌ setaꞌn uvaꞌ kat chit bꞌex ibꞌana echeꞌ uvaꞌ kat qal sete.
5 As yeꞌ nik ibꞌan veꞌt sve uvaꞌ yeꞌ nik vabꞌi veꞌt etzibꞌlal uvaꞌ kam bꞌanik veꞌt etaꞌn tiꞌ u kꞌujlebꞌal ekꞌuꞌleꞌ. Estiꞌeꞌ kat unchaj veꞌt bꞌen u Timoteo tiꞌ uvaꞌ la vootzi. Tan nik vitzꞌa uvaꞌ texh yeꞌ kat txakon uvaꞌ kat bꞌex kubꞌan sexoꞌl, tan kamal kat teesa ex u txꞌiꞌlanajeꞌ tu bꞌey tiꞌ u kꞌujlebꞌal ekꞌuꞌleꞌ uvaꞌ nik valeꞌ.
6 As tul ul veꞌt u Timoteo sukukꞌatz tul maꞌtik bꞌex tilat ex, as achaꞌv chit u yoleꞌ uveꞌ kat ul tal veꞌt sqe setiꞌ tiꞌ uvaꞌ kꞌujleꞌl chit ekꞌuꞌl tiꞌ u Jesús. As xoꞌn chit etibꞌ sevatzaj. As bꞌenameen netulsa oꞌ sekꞌuꞌl, tan atoꞌk etaama sqiꞌ. As kat tal u Timoteo uvaꞌ nesaꞌ etilat oꞌ echeꞌ uvaꞌ nu kubꞌan setiꞌ.
7 Estiꞌeꞌ, qitzꞌin qatzik, tan kꞌuxh nikat kupalebꞌe unqꞌa kꞌaxkꞌoeꞌ tukꞌ txumuꞌm, as kat chit chiibꞌ veꞌt qaama setiꞌ tul kat qabꞌi uvaꞌ kꞌujleꞌl chit ekꞌul tiꞌ u Jesús.
8 As cheel kat kꞌujebꞌyu veꞌt qaama, tan tiꞌ uvaꞌ kat qabꞌi uvaꞌ chabꞌamal chit ekꞌujbꞌaꞌt ekꞌuꞌl tiꞌ u Kubꞌaaleꞌ.
9 As yeꞌl umaꞌtoj txumbꞌal la kubꞌaneꞌ tiꞌ qaqꞌat taꞌntiixh te u Tiixheꞌ setiꞌ tiꞌ u chiibꞌichileꞌ uveꞌ nu kunach vatz u Tiixheꞌ.
10 As qꞌiil aqꞌbꞌal nu kujaj veꞌt bꞌaꞌnil te u Kubꞌaaleꞌ tiꞌ uvaꞌ la til tibꞌ kuvatz, tiꞌ uvaꞌ la bꞌen kuchus unbꞌiitoj ex, tiꞌ uvaꞌ la yakꞌin veꞌt etaama tiꞌ ekꞌujbꞌaꞌt ekꞌuꞌl tiꞌ u Kubꞌaaleꞌ.
11 Pet aꞌ u Kubꞌaal Tiixheꞌ tukꞌ u Kubꞌaal Jesucristo la lochon oꞌ tiꞌ uvaꞌ jatu la bꞌen kuqꞌelu veꞌt ex unpajte.
12 As u Kubꞌaaleꞌ la lochon ex tiꞌ uvaꞌ la yakꞌin veꞌt etaama tiꞌ exoꞌnit etibꞌ sevatzaj. As la exoꞌni unqꞌa uxhchileꞌ skajayil echeꞌ uvaꞌ nu kubꞌan sete tiꞌ kuxoꞌnit ex,
13 aqꞌal uvaꞌ la yakꞌin veꞌt vetaanxelaleꞌ. As yeꞌl epaav la cheei, tan jik veꞌt ex vatz u Kubꞌaal Jesús tul uvaꞌ la ul veꞌt Aak unpajte tukꞌ unqꞌa niman tetz Aakeꞌ skajayil.