20
U tulebꞌal taama u Jesús
Mateo 28.1-10; Marcos 16.1-8; Lucas 24.1-12
1 As bꞌiitik chit isajbꞌeꞌ tu u bꞌaxa qꞌiieꞌ tu u xhemaanaeꞌ,*As aꞌeꞌ u tumiinkuꞌeꞌ. as bꞌen veꞌt u Maꞌleꞌ uveꞌ tzaanaj tu u tenam uvaꞌ Magdala kꞌatz u juleꞌ uvaꞌ mujlukat u Jesús. Tul oon veꞌt ixoj tziꞌ u juleꞌ, as til veꞌt ixoj uvaꞌ maꞌtik teesal veꞌt u sivaneꞌ tziꞌ u juleꞌ.
2 As qꞌax ibꞌen veꞌt ixoj. As bꞌex tal veꞌt ixoj te u Simón uvaꞌ Luꞌ as te umaꞌt vichusulibꞌ Aakeꞌ uveꞌ kꞌulik chit tibꞌ iyol Aak stukꞌ. Ech bꞌex tal ixoj ileꞌ: —¡Kat bꞌex eqꞌolyu vichiꞌol u Kubꞌaal Jesús tu u juleꞌ! As yeꞌ qootzaj katil bꞌex aqꞌaxojkat,— tiꞌk ixoj.
3 As el veꞌt chꞌuꞌl u Luꞌeꞌ tukꞌ umaꞌt vichusulibꞌ Aakeꞌ. As bꞌex veꞌt chajnaj tziꞌ u juleꞌ.
4 Vaꞌlik chit toojeꞌl chajnaj tiꞌ ibꞌeneꞌ. As pal chit toojeꞌl vimool u Luꞌeꞌ, tan naj oon bꞌaxa tziꞌ u juleꞌ.
5 As kꞌoebꞌ naj tiꞌ tilat ok tu u juleꞌ. As jit ok naj. As aꞌ kuxh veꞌt unqꞌa maantaeꞌ tiloꞌk naj uvaꞌ atik kan uveꞌ bꞌochlukat u Jesús.
6 As tul oon veꞌt u Simón uvaꞌ Luꞌ, as yakik ok naj tu u juleꞌ. As til veꞌt naj u maantaeꞌ uvaꞌ atik kan
7 tukꞌ u suꞌteꞌ uveꞌ bꞌochlukat viviꞌ u Jesús. As vaꞌlen bꞌalqꞌumalikkat veꞌt kan u suꞌteꞌ.
8 As ok veꞌt vimool u Luꞌeꞌ uvaꞌ oon bꞌaxa tziꞌ u juleꞌ. As tul til naj uveꞌ yeꞌlik veꞌt u Jesús tu u juleꞌ, as yak kuxh inima veꞌt naj uvaꞌ maꞌtik tul taama Aak,
9 tan yeꞌxnik pal chajnaj stuul tiꞌ uveꞌ tzꞌibꞌamal kan uvaꞌ la ul taama u Jesús unpajte.
10 As qꞌaav veꞌt kaꞌvaꞌl vichusulibꞌ Aakeꞌ kꞌatz unqꞌa imooleꞌ.
Nikꞌuch tibꞌ u Jesús vatz u Maꞌl uveꞌ aa Magdala
Marcos 16.9-11
11 As bꞌiilik kuxh stuul, as oon veꞌt u Maꞌleꞌ uveꞌ aa Magdala tziꞌ u juleꞌ unpajte. As vaꞌlik chit toqꞌ ixoj. As tul nikat toqꞌ ixoj, as kꞌoebꞌ veꞌt ixoj tiꞌ isajit ok tuul u juleꞌ.
12 As til veꞌt ok ixoj kaꞌvaꞌl unqꞌa ángel uvaꞌ vaꞌlik chit ipolal unqꞌa toksaꞌmeꞌ. Xonlik umaꞌl u ángel viꞌ u sivaneꞌ uveꞌ atikkat bꞌen iviꞌ u Jesús. As xonlik umaꞌte uveꞌ atikkat bꞌen u toj Aakeꞌ tu uveꞌ mujlukat Aak.
13 As ech tal veꞌt unqꞌa ángel ileꞌ te u Maꞌleꞌ: —¿Ixoj, kam nooqꞌle?— tiꞌk unqꞌa ángel. Ech tal veꞌt u Maꞌl ileꞌ: —Ni voqꞌeꞌ, tan tiꞌ uveꞌ kat eqꞌoliy veꞌt u Kubꞌaal Jesús. As yeꞌ vootzaj katil kat eqꞌolkat,— tiꞌk ixoj.
14 As tul kuxh tal ixoj u yoleꞌ, as isuchqꞌi tibꞌ ixoj. Til veꞌt ixoj uvaꞌ txaklik veꞌt ok u Jesús kꞌatz ixoj. As jit texhla ixoj Aak.
15 As ech tal veꞌt Aak ileꞌ: —¿Ixoj, kam nooqꞌle? ¿Abꞌil nachukeꞌ?— tiꞌk Aak. Ech tal veꞌt ixoj ileꞌ: —Pap, asoj axh kat eqꞌon, as al sve katil bꞌex aaqꞌkat. As la bꞌen veqꞌo,— tiꞌk ixoj, tan kamal u xeen tetz unqꞌa chikoeꞌ u najeꞌ uvaꞌ nik tal ixoj.
16 As ech tal veꞌt u Jesús ileꞌ: —¡Maꞌl!— tiꞌk Aak. As isuchqꞌi veꞌt tibꞌ ixoj. As ech tal veꞌt ixoj ileꞌ tu yolbꞌal hebreo: —¡Raboni!— tiꞌk ixoj. As aꞌ isuuchil u yoleꞌ Raboni uvaꞌ Chusul qetz tu kuyolbꞌal.
17 As ech tal veꞌt u Jesús ileꞌ: —Chajpu in, tan yeꞌ bꞌenoj in kꞌatz vunBꞌaaleꞌ. Pet kuxh al te unqꞌa eetz chusulibꞌeꞌ, tan bꞌen veꞌt in kꞌatz vunBꞌaaleꞌ uvaꞌ eBꞌaal, as vunTiixheꞌ uvaꞌ eTiixh,— tiꞌk Aak.
18 As bꞌex veꞌt ixoj unpajte kꞌatz unqꞌa tetz chusulibꞌeꞌ. As bꞌex tal veꞌt ixoj uvaꞌ maꞌtik tilat ixoj Aak. As tal veꞌt ixoj kam uvaꞌ kat tal Aak te ixoj.
Nikꞌuch tibꞌ u Jesús vatz unqꞌa ichusulibꞌeꞌ
Mateo 28.16-20; Marcos 16.14-18; Lucas 24.36-49
19 As an chit tu u bꞌaxa qꞌiieꞌ tu u xhemaanaeꞌ, as molik veꞌt tibꞌ unqꞌa ichusulibꞌ Aakeꞌ tul uvaꞌ maꞌtik itzꞌotin veꞌteꞌ. As kolimalik u kabꞌaleꞌ, tan nikat ixoꞌv chajnaj vatz unqꞌa iqꞌesal unqꞌa tenameꞌ. As ul veꞌt u Jesús txakebꞌoj xoꞌl chajnaj. As ech tal veꞌt Aak ileꞌ: —As bꞌaꞌnoj etatin sevatzaj sekajayil,— tiꞌk Aak.
20 As tul tal Aak u yoleꞌ, as ikꞌuch veꞌt Aak viqꞌabꞌeꞌ tukꞌ u txala tuuleꞌ te chajnaj. As vaꞌlik chit itxuqꞌtxun veꞌt chajnaj tul til chajnaj Aak.
21 As ech tal veꞌt Aak ileꞌ te chajnaj unpajte: —Aꞌ vibꞌaꞌnil u Tiixheꞌ la atin sexoꞌl. As tuk unchaj bꞌen ex tiꞌ talax vunyoleꞌ echeꞌ kat ibꞌan u Kubꞌaal Tiixheꞌ sve, tan kat ichaj tzan in Aak tiꞌ talax viyoleꞌ sexoꞌl,— tiꞌk u Jesús.
22 As tul tal u Jesús u yoleꞌ, as ixuli bꞌen Aak vixeveꞌ. As ech tal Aak ileꞌ: —Ekꞌultaj u Tiixhla Espíritu,
23 tan abꞌil uvaꞌ la etal isotz ipaav, as la sotz ipaav. Pet abꞌil uvaꞌ yeꞌ la etal isotz ipaav, as yeꞌl ipaav la sotzi,— tiꞌk Aak te unqꞌa ichusulibꞌeꞌ.
Nikaꞌkabꞌin taama u Maxh tiꞌ u Jesús
24 As u Maxh uvaꞌ Xuꞌm chꞌelel uvaꞌ atik ok xoꞌl kabꞌlaval unqꞌa ichusulibꞌ u Jesús, as yeꞌlik naj tul ikꞌuch tibꞌ u Jesús xoꞌl unqꞌa ichusulibꞌeꞌ bꞌaxa.
25 As tul ul veꞌt naj, as ech tal veꞌt ok unqꞌa imool naj ileꞌ ste: —Kat qillu veꞌt u Kubꞌaal Jesús,— tiꞌk chajnaj. As ech tal veꞌt u Maxh ileꞌ: —Lanal vil u tokebꞌal unqꞌa laavuxheꞌ tu viqꞌabꞌeꞌ, as lanal voksa u viꞌ unqꞌabꞌeꞌ stuul as tukꞌ u txala tuul Aakeꞌ uveꞌ qopel, as aꞌn la unnimaeꞌ,— tiꞌk naj.
26 As ech vaaxit qꞌii stuul, as jupik tibꞌ unqꞌa ichusulibꞌ u Jesús tu u kabꞌal unpajte. As atik u Maxheꞌ xoꞌl chajnaj. As aat kuxh til chajnaj uvaꞌ txaklik veꞌt ok Aak xoꞌl chajnaj. As ech tal veꞌt Aak ileꞌ: —Aꞌ vibꞌaꞌnil u Tiixheꞌ la kaa sexoꞌl,— tiꞌk Aak.
27 As ech tal veꞌt Aak ileꞌ te u Maxheꞌ: —Oksa u viꞌ aqꞌabꞌeꞌ tu uveꞌ kꞌaxbꞌinale. As oksa viꞌ aqꞌabꞌeꞌ tu u txala vuuleꞌ unpajte. As yeꞌ kuxh kaꞌkabꞌin aama. Pet kꞌujbꞌaꞌ akꞌuꞌl sviꞌ,— tiꞌk Aak.
28 As ech tal veꞌt u Maxh ileꞌ: —Kubꞌaal Jesús, as axheꞌ vunTiixheꞌ,— tiꞌk naj.
29 As ech tal veꞌt u Jesús ileꞌ: —Katnal chit eel in, Maxh. As aꞌn kat anima veꞌt in. Pet achvebꞌal chit unqꞌa uxhchileꞌ uveꞌ kꞌuxh yeꞌ kat til in, as ninima veꞌt in,— tiꞌk Aak.
Kam stiꞌ kat tzꞌibꞌalkat kan u yoleꞌ
30 As nimatel unqꞌa kꞌuchbꞌal tetz u tijleꞌm u Jesús kat ikꞌuch vatz unqꞌa ichusulibꞌeꞌ. As yeꞌxhkam tzꞌibꞌamal kan tu u uꞌujeꞌ.
31 Pet jankꞌal unqꞌa viꞌlaꞌ uvaꞌ tzꞌibꞌamal kan, as kat tzꞌibꞌal kan tiꞌ uvaꞌ la kukꞌujbꞌaꞌ kukꞌuꞌl tiꞌ u Jesús uvaꞌ Aak u Cristo, viKꞌaol u Tiixheꞌ. As estiꞌeꞌ uvaꞌ at veꞌt kutiichajil kꞌatz u Tiixheꞌ tukꞌ vibꞌii Aakeꞌ, asoj kꞌujleꞌl kukꞌuꞌl tiꞌ Aak.