Mukaanda watsiomi wa
YOWANI
Kotili
Mukaanda a Yowani watsiomi, a basonuu nde pe kwaa libuundu so limosi layabina, so a buu pe kwaa mukuutu a libuundu li mosi pe. Musonii a mukaanda wu abaanduu mbala mosi mu nziisili. Nde li mu uyaabisa musundu a litoono la baana ba nguu. Nde li mukelese bangaa Kristo bakimi, babali mu ubisi usiingi ti Yiisu ni «Kristo», wu Nziaambi a soolo na atsinduu.
Ku mbaandila mukaanda wu, nde li mu umweese ndaa yakinyi (1.1-4). Musonii a mukaanda wu li mu ubwaleele ka ti «Ndaa a Nziaambi yi li mu uha moonyi». Bu nde ali mu uleele buu, nde li mu ubiindili itwaari kia bisi na Nziaambi, kiadiaala mu Yiisu Kristo mwaana a nde, na mu imbaangi kia batumu ba Yiisu. Kukati a mukaanda wu, uli na mandaa moolo ma manene.
Ndaa ya tsiomi: Nziaambi ni liyalila (1.5—3.10). Mu uba mutso liyalila, bwafwaana mu usalila mukele a Yiisu mu yatala litoono (1.5—2.17). Nha mbisi a nhaa, Musonii a mukaanda li mu utungululu mitaata mia Kristo, babali mu uhele usiingi ti nde ali ka muutu wabutuu mu musunyi (2.18-28). Ka babali ngo baana ba Nziaambi, bali mu unambita mu Kristo na bali mu udiaata mu libweeye la Nziaambi (2.29—3.10).
Ndaa ya moolo: Nziaambi ni litoono (3.11—5.12).
Nde wabalibili moonyo ka ti, difwaana utonosono bana mu bana (3.11-24). Nha mbisi a umweese bwa usa lisoboso nha kati a Muheebili wa Nziaambi na muheebili wa Mutaata a Kristo (4.1-6), musonii a mukaanda li mu uleele ti, uba wa Nziaambi ni utoono baata. Mundaa ti Nziaambi ni litoono (4.7-21). Ku manini, nde li mu uleele ti, imiini kia bisi mu Kristo ili mu uha bisi mbiingili nha yulu a tsi (5.1-12).
Ku manini a mukaanda (5.13-21), musonii li uloombo mu ukuundu mu babubaasa mandaa mamabi. Nde li mu ulibili ka moonyi ti, ndila Mwaana a Nziaambi li mu ubiti mu uyaaba Nziaambi.
1
Ndaa yili mu uha moonyi
1 Bisi dili mu uyaabisa beni Ndaa yili mu uha moonyi. Ndaa yii, yili umata mbaandila tsi. Bisi diayuyi yo. Bisi diamoni yo mu misi mia bisi bameme. Bisi diakengisi yo. Na mioo mia bisi miabeembi yo. 2 Moonyi amonii, na bisi diamoni nde! Bisi dili bambaangi ba nde, na dili mu uyaabisa beni moonyi wa bilimi na bilimi wuu, wali na Taayi, na wamonii kwaa bisi. 3 Mandaa ma bisi diamoni na diayuyi, ni mo ka bisi dili mu uyaabisa beni. Bisi dili mu uyaabisa beni mo, paa beni ka diba weti bisi mu itwaari ki dili na kio na Taayi, na Mwaana a nde Yiisu Kristo. 4 Na bisi dili mu usonuu mandaa ma, paa kinya a bisi yiba yakuu.
Nziaambi ni liyalila
5 Dimono ndaa yi bisi diayuyi kwaa Yiisu Kristo, na yi bisi dili mu uyaabisa kwaa beni: Nziaambi ni liyalila, na a uli na pimisi so hoolo pe mu nde.
6 So dileeli ti bisi dili itwaari na nde, ka bunu bisi dili mu uba kutso pimisi, dili bangaa pia, na a dili mu usalila ngwanya pe. 7 Ka so bisi dili mu uba kutso liyalila, weti bu Nziaambi nde makulu ali kutso liyalila, bisi dili mu itwaari bana mu bana. Na Yiisu, mwaana a Nziaambi, watsala makili ma nde, li mu utsieemese bisi mu masumu moosi. 8 So bisi dileeli ti a diasa masumu pe, bisi dili mu ufutu pia mu bisi bame, na ngwanya a yili mu bisi pe. 9 So disiingi masumu ma bisi nha kulu a Nziaambi, bisi utuu usa ilimbisi mu nde, mundaa ti nde li wa libweeye: nde sa asa masumu ma bisi kolo-kolo, na utsieemese bisi mu bubi boosi. 10 So dileeli ti a dili na masumu pe, bisi dili mu umweese ti Nziaambi li ngaa pia, na mandaa ma nde a mali mu bisi pe.