Mukaanda wa tsiomi wa
Peetero
Kotili a mukaanda
Mukaanda wa tsiomi wa Peetero basionii nde kwaa bangaa Kristo. Babali mu bitinini bitaana bia Looma bili ku taanda, na bili ku peembi ya Esete ya Asia, yibubaata Turkia lolo. Bo bakidiaala kuu weti bieenyi. Mundaa bu bo bali bangaa Kristo (1.1; 2.11), bangaa tsi yii bakitsoro na bakimeengele bo. Bo bakifuundusu na bakikwaamisa bo kwahele a toono.
Peetero li mu usonuu mukaanda wu, mu uhamisa imiini na ilimbisi kia bo. Nde li mu uhamisa bo mu udiaata weti baata ba Nziaambi asoolo.
Mu mukaanda a Peetero wa tsiomi, nde li mu utsuu kwaa bangaa Kristo babamati mu mabuundu ma mupili na mupili. Mu taanga di, bo bamaabutuu libutuu lilinyatii. Bo a bali mu ubwadiaata pe weti bwakidiaata bakaa ba bo, so a buu pe, weti baata babadieengelele bo (1.13—2.4). Bo ka baata ba Nziaambi (2.4-10). Bo utuu ukama mutimi mu mapasi na mu kwaamisa mundaa ti, bo bali na ilimbisi kili mu uha bo moonyi (1.3,13,21; 3.15).
Nziaambi asiimbili Yiisu Kristo mu babakwa. Yii ni ndaa yili mu utuungu ilimbisi kia bangaa Kristo. Ilimbisi kii ili mu ubiti mu usiingi bituyi na kwaamisa weti bu Yiisu asiiri. Mu ngwanya Yiisu amoni pasi, bamutuyi na bamutuni. Ka nde a avutili mamabi mu mamabi pe. Ka bunu, nde asi ilimbisi kia nde mu Nziaambi (4.12-19).
Mukaanda a Peetero wa tsiomi li mu uleele bu: moonyi na likwa la Yiisu Kristo bili ifwaani kwaa ba ngaa Kristo. Ifwaani ki ili mu umweese buni diafwaana udiaala itwaari nha kati a bangooyi na bangaa Kristo. Mukaanda wu li mu uvulu uha mandoongi kwaa baata babavutuu mbisi (2.18—3.6). Ndiaatili a bo utuu ubaasila babamosi mu uyaaba buli imiini mu Kristo. Mutso libuundu, litoono na likiinzi la bana mu bana, bili mu usuungusu bakuutu, bafuru na pasi inama (5.1-7; 1.22—2.3). Ndiaatili ya pili yii, yili mu umweese kwaa babali ku mbari ti, a uli na ndaa so mosi pe, yibutuu usieembe bangaa Kristo.
1
Mabwee
1 Me Peetero, tumu a Yiisu Kristo, ndi mu usonuu mukaanda wu. Me tsindii nde kwaa baata ba Nziaambi asoolo na bali mu udiaala weti bieenyi mu bitinini bia Ponte bia Ngalatia, bia ku Kapadoki, bia ku Asia na bia ku Bitinya. 2 Nziaambi Taayi akwisoolo beni weti buli minhana mia nde. Muheebili a nde li mu usa ti beni diba baata ba nde, paa beni ditumumu kwaa Yiisu Kristo, na paa makili ma nde matsiaamii matsieemese beni. Nyaala kolokolo na iyeenge bifwaabala kwaa beni.
Mbutili yinyatii yili mu uha ilimbisi
3 Dibilani Nziaambi, Taayi a Pfumu a bisi Yiisu Kristo! Mu bunene ba ngebe a nde mu bisi, nde maabwaha bisi idiingi kiinyatii mu Yiisu Kristo wa siimbii mu babakwa. Nde ayilii buu, paa bisi dibaa ilimbisi kili moonyi. 4 Bisi sa dikwabaa ilimbisi kii, mundaa ti bisi sa ditolo mukobo wu Nziaambi aswee kwaa baba nde. Mukobo wu utuu pe ufuu, so ubiiyi, so usumuu bubwe ba nde. Nziaambi wadisweehele nde mu mayulu. 5 Ni litu la nde lili mu ukebe beni mu imiini kia beni mu Yiisu, natee bu liyobolo likaayabina mu taanga diatsieelele. 6 Diluulu mu kinya, so bu beni diafwaana umono ngebe mu taanga dikee mu mapasi ma mutindi na mutindi. 7 Woolo lo makulu libaafuu, ka bunu, bubaayesine lo mu mbaa. Bumosi ka, imiini kia beni kiavulu woolo tala, bali mu uyesene kio mu umweese ndutu a kio. Ni buu beni dikaayaka mbilili, likiinzi na buzitu kwaa Nziaambi, mu taanga di Yiisu Kristo akaayiri avutuu. 8 Beni diatoono nde, so bu diahele umono nde. Beni diasa imiini kia beni mu nde, so bu beni dikeni a diamono nde pe. Ni mubuu, beni dialuulu mu kinyi ya buzitu, yili so bwa utuu pe ubiindili. 9 Mundaa ti, beni dimaaholo musieende a imiini kia beni: ni liyobolo la miwuumu mia beni.
Mibili miayaabisi liyobolo mundaa a bisi
10 Mibili miayii na miakengisi bubwe mundaa yatala liyobolo. Na mio miabili mundaa bweese ba Nziaambi ataasila beni. 11 Bo bakisa mifuri mu uyaaba mataanga na makuulu mamubwaanina na biliimbi biayaabisa Muheebili a Kristo. Mundaa ti, Muheebili wuu wali mu bo, akikwayaabisa mapasi ma Kristo afwaana umono, na buzitu ba nde akaabaa nha mbisi. 12 Nziaambi amweesi kwaa mibili ti, a mundaa bo makulu pe bo bakibili, ka mundaa beni. Mu taanga di bayiisi beni Ndaa Yimbwe mu kuulu ya basiali, bo bali mu utsuu mu mo, mu lituu la Muheebili wa ngira wu batsindii wamati ku yula. So batumu, batoono umono mandaa maa.
Nziaambi aloombi kwaa bisi mu uba na ndiaatili yafwaana
13 Ni mu buu, diyilimi na diba likanda, di ba na nziaabili. Disa ilimbisi kia beni kioosi mu bweese ba Nziaambi akaaha kwaa beni, mu taanga di Yiisu Kristo akaamonuu. 14 Ditumumu Nziaambi weti baana babakuluu. A diduku pe manzala mamabi ma beni diali na mo, mu taanga di beni diali kutso bundimbi. 15 Ka diba babangira mu ndiaatili a beni yoosi, weti bu Nziaambi wata beni mbila ali ka wangira. 16 Mundaa ti Mabasonuu ma Ngira mali mu uleele: «Beni sa diba babangira, mundaa ti me ndi Wangira✡Mik 19.2.» 17 Mu makuundu ma beni, beni dili mu uta Nziaambi mu «Taayi». Nde li mu ufuundusu weti bwafwaana, muutu-muutu weti buli biyiluu bia nde. Ni mu buu, beni badili bieenyi nha tsini a toto nha, nyaala ndiaatili a beni yita imbaangi mu likiinzi li beni dili na lo mu nde. 18 Ni mu buu, beni diayaaba mu ki tala bakuuli beni mu ndiaatili a bakaa ba beni yahele a ndutu, yi basiisili beni. Kuulili yii, a yali mu kuulu ya bisii bibifuu weti mboongo na woolo pe. 19 Ka beni diakuulii mu makili ma tala ma Kristo, wuli weti ma limeme la tsieeme lahele na ipii, na lahele na keri. 20 Nziaambi akwisoolo nde mu ndaa yii, tswaamina nzilimini a tsi. Na mundaa beni Nziaambi amweesi nde mu taanga diatsieelele. 21 Ni mundaa Kristo beni bangaa imiini mu Nziaambi, wasiimbili nde mu babakwa, na waha nde buzitu. Ni mu buu, beni dibaa usa imiini na ilimbisi mu Nziaambi.
22 Beni dimaatsieeme bu diatumumu ngwanya, mu utonosono kwahele a lisi kutso likaya weti baana ba nguu. Ni mu buu, dihama mu utonosono bana mu bana, mu mutimi watsieeme. 23 Beni diamaabutuu libutuu lilinyatii. A mu libutu li fuu pe, ka mu libutu lili mu uhele ufuu, mundaa Mandaa ma Nziaambi ma li moonyi mu taanga dioosi. 24 Mundaa ti, basonuu: «Pasi nyutu li weti itiiti, na buzitu ba nde boosi weti ifulu kia matsiee. Itiiti ili mu ukanya na ifulu ili mu ubwa. 25 Ka mandaa ma Pfumu mali mu uba mu bilimi na bilimi✡Yes 40.6-8.» Ka bunu, mandaa maa, ni ma Ndaa Yimbwe yi bayaabisi kwaa beni.