Mukaanda a Pawuli wa tsiomi kwaa
Timoteo
Kotili
Kuumbu ya Timoteo bali mu uyaabisa yo mu taanga kimi mu mukaanda Biyiluu bia batumu na mikaanda mia Pawuli. Mu ngwanya, Timoteo wakiyili Pawuli mu isala. Timoteo ayili Pawuli mu midieenge mialaa. Ninha Pawuli ahiiri nde bisala bialaa biamifuri, vulu-vulu ku vulu la Tesalonika na ku vulu la Kolito.
Asonii mikaanda mioolo na atsindii mio kwaa Timoteo. Basonuu mio mundaa ibwa kia imiini mu ikristo ya makwa ba. Isala kimaasaala kia ubweeyese libuundu na uhamisa imiini kia balibuundu.
Mukaanda wa tsiomi li mu uha madoongi kwaa balibuundu, kwaa bakuutu na kwaa Timoteo nde makulu.
Mwaana kaba la balibuundu, lili mu uyene ayiisi nziisili ya pia kwaa bangaa imiini (1.3-7; 4.1-4; 6.3-5). Matsimi ma kaba lii mali mu umweese ti mbayili ya biloo bia nha tsi a yabweeye pe. Ni mu buu, bo bali mu ubisi makweele na utsoro biloo bikimi. Ka bunu, biloo bioosi bi Nziaambi ayiluu bili bibibwe. Timoteo afwaana ulibili libuundu moonyi mu ndaa yii.
Mabuundu ma Kristo mamaatuungumu. Mo mali na bakuutu. Ni bakuutu ba libuundu, na bakebi ba libuundu bali mu ubaasila bawele na babeeri, na bakuutu ba mabuundu bali uyiisi mandaa ma Nziaambi.
Mabuundu maa mali na nzala ya udiaala kutso idzuunu, na baata ba tsi bafwaana umono kinyi mu mo. Musonii a mukaanda wu, li mu uha mandoongi mu ndaa ya tala likutunu na likuundu (kiiti kia 2). Nde li mu uyaabisa ka buni bakuutu ba libuundu bafwaana udiaata (kiiti kia 3).
Taayi a Timoteo musi Eleene, na nguu a nde Mukristo wa Muyuudayo. Pawuli ayiisi Timoteo, na nde li weti mwaana kwaa Pawuli. Nde ka mukuutu a mabuundu. Mukaanda wu, li mu uloombo kwaa nde mu uba musiali wumubwe wa Yiisu Kristo. Mukaanda li mu uyiisi ka kwaa Timoteo, buni nde utuu ubaasila balibuundu, na buni nde afwaana uyiisi na utumu kwaa mosi mosi mu bo (kiiti kia 4 natee kia 6).
1
Mabwee
1 Me Pawuli, tumu a Yiisu Kristo weti buli litumu la Nziaambi, Muyobili a bisi, na la Yiisu Kristo ilimbisi kia bisi. 2 Me nitsinduu mukaanda wu kwaa Timoteo✡Timoteo Biy 16.1, mwaana a me wa ngwanya mu imiini: Nyaala Nziaambi Taayi na Yiisu Kristo Pfumu a bisi baha we bweese, mbweeyili na iyeenge!
Usa mayele na nziisili ya pia
3 Nha me nakiyene ku Masedwane✡Masedwane 2Ko 1.16, me natumi we, mu usaala ku ngaanda a Efeso✡Efeso 2Ko 1.8. Mundaa ti, mu ngaanda yii, uli na baata babali mu uyiisi nziisili ya pia. Ha bo litumu, la unyaala nziisili yii! 4 Leele bo banyaala ukaangama mu matsaba matala bukulu ba bakaa, mamali uwa pe*Mba 4—5; 9—11. Mandaa maa, mali mu ubee ndila ma makaama, nha mbuu ya usalila minhana mia liyobolo la Nziaambi, mi buyaaba mu imiini mu nde.
5 Ndutu a tumini yii, ni mu ubutusu litoono, lili mu umata mu mutimi watsieeme, mu matsimi mamabwe na mu imiini kia ngwanya. 6 Baata babamosi bamaasiisi kuulu yii, na bamaadiimbili kutso bimoo biahele a ndaanda. 7 Bo batoono umweese ti, bo bayiisi ba mikele mia Nziaambi. Ka bo a bayaaba tsutulu a mandaa ma bo makulu bali mu uleele, na so mandaa ma bo bali mu uyaabisa mu ilimbisi kioosi.
8 Bisi diayaaba ti mikele mimibwe mili, mbiiti diayaaba ndutu a mio. 9 Dilibilani moonyi ti: Nziaambi a ahi pe Mikele mia nde mundaa baata balibweeye. Ka nde ahi mio mundaa baata babali mu uhele utumumu nde, mundaa baata babahele na inziaambi, na baata bangaa buhaangi, na bangaa masumu. Nziaambi ahi mio, mundaa baata bali mu uhele ukiinzi nde. Nde ahi mio, mundaa babali mu udusu bataayi ba bo, so a buu pe banguu ba bo, na mundaa a badusi. 10 Nde ahi mio, mundaa bangaa tsoongili, mundaa babaala babali mu usoongo na bambayi babaala, mundaa bayalii ba baata mu butee. Mio mili ka mundaa bangaa pia na mundaa babali mu ulaba mikisi mia pia. Nde ahi mio, mundaa baata babali mu usa mandaa moosi ku buko nha kulu a nziisili ya ngwanya. 11 Nziisili yii yili mu tso Ndaa Yimbwe ya Nziaambi wa buzuti, yi ba heeri me, yo yili ndaa wa makinyi.
Mvutili a matoondo mu bubwe ba Nziaambi
12 Me ndi mu uvutulu matoondo kwaa Yiisu Kristo, Pfumu a bisi waha me bweese bafwaana mu ukuusu isala kia me. Me ndi mu uvutulu nde matoondo bu amono ti, me ndi muutu wu nde afwaana uholo mu isala kia nde. 13 So bu yili ti me nakileele mandaa mamabi mu nde taanga dialuti, mukwaamisi, na natuyi nde, ka Nziaambi akwiilili me ngebe mu mundaa ti me nakiyiluu buu kutso bundimbi, bu nali nahele na imiini✡nakiyiluu Biy 8.3; 9.4-5. 14 Pfumu a bisi aluusi me mu bweese bafwaabala. Nde ahi me imiini na litoono bili mu umata mu itwaari na Yiisu Kristo.
15 Mono, ndaa yi yili ya ngwanya, yi baata boosi bafwaana usa imiini mu yo: Yiisu Kristo ayiiri mu tsi mu uyobolo bangaa masumu. Me ndi watsiomi nha kati a bo. 16 Ka ni mubuu, Nziaambi amweesi libweeye la nde kwaa me. Nde atooni ti Yiisu Kristo amweese kamini a mutimi a nde yoosi mu me, me wuli wavulu mu masumu. Ki ni ifwaani kwaa babakaasa imiini mu nde, mu taanga dikaayira, na sa baholo moonyi wa bilimi na bilimi.
17 Nyaala likiinzi na buzitu biba mu taanga dioosi kwaa Mutini wa bilimi na bilimi, wu uhele ukwa, wu bali mu uhele umono, na Nziaambi ndila mosi! Ameni.
Udwaana mudiingi wumubwe
18 Timoteo, mwaana a me, me niha we tumini di, weti buli mbilili yibayaabisi mu mataanga malutu mu we. Nyaala mandaa maa, maba mifuri mia we mu mudiingi wumubwe, wu we udwaana. 19 Kebe imiini na matsimi matsieeme. Baata babamosi babisi uyuu matsimi ma bo matsieeme na badiaamisi imiini kia bo, weti bu luungu libaadiaama mu maamba. 20 Nha kati a baata baa uli na Imene✡Imene 2Ti 2.17 na Alekandere✡Alekandere 2Ti 4.14. Me nayeelili bo kwaa Saatina✡nayeelili bo kwaa Saatina 1Ko 5.5, paa bo bayii bwa uhele utuu Nziaambi.