1 Dimono ndaa ya ngwanya: so muutu tooni uba mukebi a libuundu, nde tooni usa isala ki ibwe. 2 Mukebi a libuundu afwaana mu uba muutu wahele a toono na nde afwaana ukaangama mu mukari*Tit 1.6-9. ndila mosi. Nde afwaana mu uba na mbeelili yimbwe, wa buleembi, wa likiinzi na muutu wu uyaka bieenyi na nde afwaana uyaaba uyiisi. 3 Anyaala uba munywiiri a mala, so a buu pe ngaa ituusi. Ka nde afwaana uba, muutu wakuluu na wa iyeenge. Anyaala uba watoono mboongo kwaa laa! 4 Aba muutu wu utumu nzo a nde bubwe. Baana ba nde bafwaana mu utumumu nde kutso likiinzi loosi. 5 Mu ngwanya, so muutu atuyi utumu nzo a nde makulu pe, buni nde utuu ubiti libuundu la Nziaambi? 6 Nde anyaala uba muutu wu maakiingili mayele liili, leeti nde saa aluulu mu liwaa, na sa amana kutso tsieembili weti bu basieembi Saatina. 7 Bwafwaana ka ti babahele uba ba ngaa Kristo bata imbaangi ki ibwe mu nde, paa bahele umeengele nde na anyaala ubwa mu mieete mia Saatina.

8 Pili mosi ka, bakebi ba libuundu bafwaana uba baata ba likiinzi, na babuta ngwanya. Bo a bafwaana pe unywa mala kwa mifuri, so usaa mboongo mu makuulu mamabi. 9 Nyaala bo baba babakaangama mu matsweeyi ma imiini mu Nziaambi, na mu matsimi matsieeme. 10 Bwafwaana mu ukwakengese ndiaatili a bo, tumake so a uli na ndaa ya bisieembi pe, bo utuu usala weti bakebi ba libuundu.

11 Pili moosi ka, bakebi ba libuundu ba bakaasa†bakebi ba libuundu ba bakaasa utuu uba bakari ba bakebi so buu pe bakaasa bayaka mbili ya uba bakebi., bafwaana uba balikiinzi, banyaala uba na tsuyili yimbi wa Saatina. Baba ba buleembi, na taanga dioosi, bafwaana usa ilimbisi mu bo. 12 Bakuutu ba libuundu bafwaana ukweele mukaasa ndila mosi, na bo bafwaana mu utuu utumui baana ba bo na nzo a nde yoosi. 13 Bakebi ba libuundu babubaasa isala kia ibwe, bubaabili bo kwaa baata. Ni mu yii, bo bali mu utuu uyiisi mu ilimbisi kialaa, mu imiini kili mu uvuutu bisi itwaari mu Yiisu Kristo.

14 Me ndi mu usonuu we mukaanda wuunawu, bu ndi na ilimbisi ti taanga hoolo disiaali, me sa yamono we. 15 Ka so me diingi mu uyiluu buu, miloongo mia mukaanda wu, sa mibaasila we mu uyaaba, buni we afwaana udiaata mu nzo a Nziaambi. Pili mosi, libuundu la Nziaambi wa moonyi, lili kuunzi na ibwa bili mu usuku ngwanya. 16 Ee-e, mu ngwanya, bisi dili mu uyaabisa nha kulu a baata boosi: ti matsweeyi ma ukangama kwa bisi mu Nziaambi mali mamanene!