Mukaanda wa mioolo kwaa
Timoteo
Kotilili
Mukaanda wa mioolo wa Pawuli kwaa Timoteo, li na mandaa matsieelele matala tumini a Pawuli tumu a Yiisu Kristo. Pawuli li mu perese (2.9), na babalayi mu balibuundu bamaabwoongolo nde. Nde ayaaba ti taanga hoolo dimaasaala (1.15; 4.10-16), nde sa akwa (4.6). Nde li mu uha mabweele kwaa Timoteo, mbaayi a nde wa isala, wu nde atoono weti mwaana a nde.
Mukaanda wu li mu ulibili moonyi mu idiingi kia Pawuli: isala kia nde weti tumu a Yiisu Kristo, nziisili a nde, mapasi ma nde mundaa Ndaa Yimbwe. Mu mukaanda wu, Pawuli li mu uha mandoongi kwaa Timoteo. Nha kati a tsiomi, nde li mu uhamisa Timoteo mu ukaba mapasi ma nde mu isala mu Kristo (2.1-13). Tumake, Pawuli li mu uhamisa Timoteo mu uyaabisa Mandaa ma Nziaambi bubwe-bubwe (2.14—4.15). Mu yii, Timoteo afwaana ubata makaama matala bitoolo, nde afwaana mu utee mbisi kwaa babali mu usa bubi, na nde afwaana uduku ndiaatili a Pawuli. Tsiomi a tsiomi, nde afwaana uba wanambita mu nziisili a Pawuli na ya miyiisi mia Kristo mikimi.
Mu taanga di bambaangi ba Yiisu ba tsiomi bali mu udiimbili, babali mu udukusu isala bafwaana mu uduku nziisili a bo. Mu yii, bo bafwaana ukebe nziisili bubwe-bubwe yi bo baholi kwaa miyiisi mia bo. Bo bafwaana ka utaanga Mabasonuu ma Ngira. Mu taanga di basonii mikaanda mio mia mioolo kwaa Timoteo, Mabasonuu ma Ngira ali Lilasina li likulu, na helape, ndaamba a yikimi mu Lilasina li Linyatii. Mandaa Mabasonuu ma Ngira maa moosi, «mali mafwaana mu uyiisi ngwanya, mu usieembe bubi, mu usuungusu mamabi, na mu uyiisi ndiaatili yafwaana, na yi Nziaambi ali mu uloombo» (3.16).
1
Mabwee
1 Me Pawuli, wuli tumu a Yiisu Kristo, mu litoono la Nziaambi. Nziaambi asooli me mu uyaabisa moonyi wubalasini bisi mu Yiisu Kristo. 2 Me nitsinduu mukaanda wu kwaa Timoteo✡Timoteo Biy 16.1, mwaana a me wa litoono: Nyaala Nziaambi Taayi na Yiisu Kristo Pfumu a bisi baha we bweese, mbweeyili, na iyeenge!
Pawuli li mu uvutulu matoondo kwaa Nziaambi mundaa Timoteo
3 Me nivutulu matoondo kwaa Nziaambi, wu me ndi mu usalila mu matsimi matsieeme, weti bwasiiri bakaa ba me, mundaa ti me ndi mu uhama mu ukuundu mu we, butsuu na nyanga. 4 Me ndi mu ulibili moonyi mu matsanga ma we, mu taanga di diakikabuu. Me ndi na nzala yalaa ya ubwamono we, paa me uluulu mu kinyi. 5 Me ndi mu ulibili moonyo mu imiini kia ngwanya, ki we li na kio. Ni imiini kiali na kaa a we wa mukaasa Loyisi na nguu a we Enikia, tswaamini a we. Me ndi mu utsimi ti kio ili ka mu we. 6 Ni mu buu me ndi mu ulibili we moonyi mu yo: bwalulu mbaa ya bungori ba Nziaambi ahi kwaa we, mu taanga di me nanayi mioo nha yulu a we. 7 Mu ngwanya Muheebili wu Nziaambi ahi kwaa bisi, a ali mu uha bisi boomo pe, ka bunu Muheebili wuu li mu uluusu bisi mu mifuri, mu litoono, na mu kamini a mutimi.
8 Aba na tsionyi pe mu uta imbaangi mu Pfumu a bisi. Aba ka na tsionyi pe mu me, wuli mu perese mu ndaa nde. Ka siingi umono pasi na me mu ndaa Ndaa Yimbwe, mu usa ilimbisi mu mifuri mi Nziaambi ali mu uha. 9 Ni nde:
Wayobili bisi na wata bisi mu mbili ya ngiri.
A uli pe mu ndaa biyiluu bibibwe bi bisi diasi, nde ayilii buu,
ka mu ndaa minhana mia nde,
na mu bweese ba nde aheeri bisi.
Nde amweesi bisi bweese ba nde mu Yiisu Kristo, tswaamina a taanga didihele uwa.
10 Nde amweesi bisi bo mu taanga di,
mu nziriri a muvuyisi a bisi Yiisu Kristo.
Ni nde asukusu lituu la likwa,
na mu Ndaa Yimbwe, amweesi moonyi wu uhele ukwa.
11 Nziaambi abiaalisi me mu uyaabisa Ndaa Yimbwe yi, weti muyiisi na tumu a Yiisu Kristo. 12 Ni mu ndaa yii me ndi mu umono pasi di. Ka me a ndi na tsionyi pe, mundaa ti me nayaaba mu na me na sa imiini. Na, me ndi na ilimbisi ti, nde li na lituu la ukebe bii bi nde aha kwaa me, natee mu iluumbu kia pfuundisi.
13 Holo weti ifwaani mandaa masuungunu ma me nayaabisa we. Temene na ngwi mu imiini, na mu litoono li bisi dili na lo mu itwaari na Yiisu Kristo. 14 Kebe mandoongi mamabwe mabaheeri we, mu libaasila la Muheebili wa Ngira wuli mu udiaala mu bisi.
Pamini a Onesifora
15 Weti bu we ayaaba, boosi ba ku itinini kia Asia babwoongolo me, nha kati a bo uli na Pingela na Ermongena ka. 16 Nyaala Pfumu amweese mbweeyili a nde kwaa likaanda la Onesifora, mundaa ti nde ubaahamisanga me mu mataanga mama mosi. Nde a amoni tsionyi mu me pe, mu mikuru mia me pe. 17 Ka mu diina taanga di nde atoori ku ngaanda a Looma, nde asiayi me mu nzala yalaa, natee bu nde asiolili me. 18 Nyaala Pfumu aha nde bweese ba Nziaambi mu iluumbu kia pfuundisi! We ayiluu uyaaba ka libaasila li nde ahi kwaa me bu nali ku ngaanda a Efeso.
✡1:2 Timoteo Biy 16.1