1 Mu ilimi kia kuumi na bitaana kia tumini a mutini Tibere Kayisari, Ponse Pilato akitumu mu itinini kia Yuuda, Erode akitumu mu itinini kia Ngalili, Filipo ni mwaana a nguu a nde, akitumu mu bitinini bia Ituraya na Trakoniti, na Lisanya akitumu mu Abilene. 2 Mu taanga di Aana na Kayifa bali banguu ba bangaanga ba Nziaambi, mandaa ma Nziaambi mayuyini mu tsi ya tsata kwaa Yowani, ni mwaana a Zakaria. 3 Yowani ayeni mu itinini kioosi kiadiengelele Yorodaani. Nde akiyaabisa kwaa baata boosi: «Disobo ndiaatili a beni, diholo libootuu. Tumake, Nziaambi sa asa masumu ma beni kolokolo.»

4 Mbii bu basonuu mu mukaanda a Yeesaya, mubili:

7 Makoongi mayiri kwaa Yowani mu uholo libootuu. Nde wabaleeli: «Beni ifuumbu kia bapili! Na wadiyiisi mu usaa ubata kesi a Nziaambi, yi ka bebele? 8 Dimweese mbutu dili mu uta imbaangi ki ibwe mu kiingili a mayele ma beni, ka a dileele pe mu matsimi ma beni: “Abraami li kaa a bisi.” Ka me nadileeli: Nziaambi utuu ukitisi mamanya ma, mu uba bateeri ba Abraami! 9 Ka lolo, pibi yimaayilimi mu ukese muti nha miaanzi: Pasi muti wu uhele ubutu mbutu dimbwe, sa bakwaanga na udumunu nde ku mbaa.» 10 Makoongi mamufuuli, maleeli: «Ka ima diafwaana usa?» 11 Nde avutili, aleeli kwaa bo: «Pasi wuli na bikutu bioolo, aha imosi kwaa wahele na ikutu. Wuli na bia udia, asa pili mosi.» 12 Batoli ba limaanda bayiri ka mu uholo libootuu, baleeli kwaa Yowani: «Muyiisi, buni diafwaana usa?» 13 Nde avutili kwaa bo: «A diholo pe tala yavulu nha yulu a yibakese.» 14 Masodaare ka mamufuuli, baleeli: «Bisi ka buni diafwaana usa?» Yowani aleeli kwaa bo: «A dipatila mboongo dia muutu pe, na a difuundu muutu kwahele a toono pe, ka disiingi ndila mufutu a beni wu beni dili mu ubaa.» 15 Bu baata bakikebe, na bu boosi bakifulusunu ti, helape Yowani ni Kristo. 16 Yowani avutili, aleeli kwaa bo boosi: «Me ndi mu ubootuu beni mu maamba, ka wuli mu uyiri avulu me mu lituu. Me a nafwaana so mu unyangila misiingi mia bikoori bia nde pe. Nde sa wadibootuu mu Muheebili wa Ngira na mu mbaa. 17 Nde akaanga iyengese mu koo kia nde, paa asoolo mbutu dimbwe na usiisi bifufuri. Nde sa akukuu mbutu dimbwe ku yulu a ibaanga, na utsuu bifufuri ku mbaa yiyihele udimi.» 18 Bu akita bibili bikimi kwaa bo, Yowani ayaabisi ndaa yimbwe kwaa boosi. 19 Yowani asieembi Erode mundaa a Erodia, mukari a mwaana a nguu a n de, na mu mandaa moosi makimi mamabi mayilii Erode. 20 Nha yulu a maa, Erode abwiyiluu ndaa kimi yavulu bubi, nde aloosi Yowani mu perese.

21 Baata boosi bu bamani uholo libootuu, Yiisu ka bamubootii. Bu akikuundu, yula ladibini, 22 na Muheebili wa Ngira akulini mu ifwa-fwani kia beembe nha yulu a nde. Mu mayula mwayuyini ndaa: «We ni mwaana a me wa litoono. Mu we me ndi na kinyi yalaa.»

23 Yiisu ali hele maku matata ma bilimi bu abaandii uyiisi. Baata batsimi ti nde ni mwaana a Yoosefi, wuli mwaana a Eliya, 24 wa Matati, wa Levi, wa Meleki, wa Yanayi, wa Yoosefi, 25 wa Matatiasi, wa Amosi, wa Nawumi, wa Eseli, wa Nangayi, 26 wa Maati, wa Matatiasi, wa Simeyi, wa Yoseki, wa Yoda, 27 wa Yowanani, wa Lesa, wa Zorobabeeli, wa Salatieeli, wa Neri 28 wa Maleki, wa Adi, wa Kosami, wa Elemedami, wa Eri, 29 wa Yiisu, wa Eliseri, wa Yorimi, wa Matati, wa Levi, 30 wa Simeoni, wa Yuuda, wa Yoosefi, wa Yonami, wa Eliyakimi, 31 wa Meleya, wa Mena, wa Matata, wa Natani, wa Daavidi, 32 wa Yese, wa Obedi, wa Booze, wa Sala, wa Naasoni, 33 wa Aminadabi, wa Adamini, wa Arani, wa Eseroni, wa Peresi, wa Yuuda, 34 wa Yaakobi, wa Isaki, wa Abraami, wa Tera, wa Nawori, 35 wa Saruki, wa Rangawu, wa Faleki, wa Eberi, wa Sala, 36 wa Kayinami, wa Arafakadi, wa Semi, wa Nowa, wa Lameki, 37 wa Matusala, wa Enoki, wa Yaredi, wa Malaleli, wa Kayinami, 38 wa Enosi, wa Seti, wa Aadami, mwaana a Nziaambi.