5
Ndila limeme lafwaana mu udibili mukaanda a moonyi
1 Me namoni mukaanda wubafutuu mu koo kia babaala kia wali wadiaala nha mbata ipfumu. Mukaanda me ali basonuu ku kati na ku mbari, na ali bakutu makolo tsaamba✡Ezk 2.9-10; Yes 29.11 2 Me namoni ka tumu wa lituu wa Nziaambi, wakiyaabisa mu ndaa ya mifuri: «Na afwaana mu unyangila makolo na udibili mukaanda?»
3 Ka a wamonii muutu pe so mosi, so mu mayula, so nha yulu a toto, so ku tsina toto, watuyi udibili mukaanda so utala nde ku kati. 4 Me nalili kwalaa, mundaa ti a kwamonii pe muutu wafwaana mu udibili mukaanda na utala nde ku kati. 5 Ni nha, mosi mu binuna-nunu aleele kwaa me: «Nyaala ulili. Mono, kosi a likaanda la Yuuda, wa likaanda la mutini Daavidi✡Mba 49.9; Yes 11.1,10, maabiingi. Nde ka utuu unyangila makolo mo tsaamba maa na udibili mukaanda.»
6 Na, me namoni limeme latemene nha kati-a-kati a mbata a ipfumu, biyiluu bio bina bia moonyi na binuna-nunu biali biadiengelele lo. Limeme lii ali weti libadusu mu uha mu bungori. Lo ali na matsieembi tsaamba na misi tsaamba, bili miheebili tsaamba mia Nziaambi mibatsinduu nha yulu a toto loosi lili baata. 7 Limeme laswesii na laholi mukaanda nha koo kia babaala kia wali wadiaala nha yulu a mbata a ipfumu. 8 Nha mbisi a uholo mukaanda, biyiluu bio bina bia moonyi na maku-moolo na binuna-nunu bina biayitsukunu nha kulu a limeme. Pasi nde mu bo ali na ngoombi na mambasa ma woolo maluulu mu malimbi mali mu upalisa luki la tsulu yimbwe, lili makuundu ma baata ba Nziaambi. 9 Bo bakiyimbi mukuungu wu munyatii✡Mkg 33.3; 98.1; Yes 42.10:
«We afwaana mu uholo mukaanda
na unyangila makolo.
Mundaa ti ali badusi we,
na mu makili ma we,
we akuuli, mundaa Nziaambi,
baata ba makaanda moosi, ba mandaa moosi,
ba bifuumbu bioosi na ba matsi moosi.
10 We asa ti bo baba kaanda la mitini
na la bangaanga ba Nziaambi,
mu Nziaambi a bisi.
Na bo sa baba mitini mu tsi yoosi.»
11 Bu me nali keni mu utala, me nayuyi muniingi a ndaa a koongi a batumu ba Nziaambi. Bo ali mafuundu na makuumi ma mafuundu✡Dan 7.10. Bo boosi na binuna-nunu na biyiluu bia moonyi bali baadiengelele mbata a ipfumu. 12 Bo bakiyimbi mu ndaa ya mifuri:
«Limeme libadusi,
lafwaana mu uholo lituu,
busini, buyeri, mifuri,
likiinzi, buzitu na mbilili!»
13 Na, me nayuyi biyiluu bioosi bia ku yula, bia nha yulu a toto, bia ku tsini toto na bia mu maamba —biyiluu bia tsi yoosi— biakiyimbi:
«Nyaala mbilili, likiinzi, buzitu na litumu
biba kwaa wuli mu udiaala
nha yulu a mbata a ipfumu
na kwaa limeme mu bilimi na bilimi!»
14 Biyiluu bio bina bia moonyi biavutili: «Ameni!» Na binuna-nunu biabwi mambundu-mbwa na babili nziaambi mu likuundu.