7
Basiali ba Nziaambi bayaki iliimbi kia nde
1 Nha mbisi a nhaa, me namoni batumu ba Nziaambi bana, batemene mu bituungu bia tsi bio bina. Bo ali bakaanga mipepe mio mina mia tsi, paa so mosi mu mio anyaala uyoo nha yulu a toto, so a buu pe, nha yulu a manziali, so a buu pe, ku yulu a miti. 2 Me nabwimono tumu a Nziaambi mukimi mu uhaata ku peembi yi nyanga yibaapala. Nde ali akaanga iliimbi kia Nziaambi wa moonyi. Nde aloyi mu mifuri kwaa batumu ba Nziaambi bo bana babayaki lituu la utsala tsi na manziali: 3 «Dimanyaala utsala tsi, manziali, miti tswaamina bisi dikwasa iliimbi ki mu mambuunzi ma basiali ba Nziaambi a bisi✡Ezk 9.4-6; 2Ko 1.22; Efe 1.13.» 4 Tumake, ni baleeli me litaanga la baata babayaki iliimbi kia Nziaambi: litaanga la bo ali, kama maku-mana na mana ma mafuundu (144 000), mu bifuumbu bioosi bia Iseraeli. 5 Babayaki iliimbi kii ali,
mafuundu kuumi na moolo (12 000) mu ifuumbu kia Yuuda,
mafuundu kuumi na moolo (12 000) mu ifuumbu kia Lubeni,
mafuundu kuumi na moolo (12 000) mu ifuumbu kia Ngaade,
6 mafuundu kuumi na moolo (12 000) mu ifuumbu kia Aseri,
mafuundu kuumi na moolo (12 000) mu ifuumbu kia Nefitali,
mafuundu kuumi na moolo (12 000) mu ifuumbu kia Manase,
7 mafuundu kuumi na moolo (12 000) mu ifuumbu kia Simeoni,
mafuundu kuumi na moolo (12 000) mu ifuumbu kia Levi,
mafuundu kuumi na moolo (12 000) mu ifuumbu kia Isakaare,
8 mafuundu kuumi na moolo (12 000) mu ifuumbu kia Zabuloni,
mafuundu kuumi na moolo (12 000) mu ifuumbu kia Yoosefi,
mafuundu kuumi na moolo (12 000) mu ifuumbu kia Beyamini,
Bo boosi bayaki iliimbi kia Nziaambi.
Koongi a baata yinene nha kulu a mbata ipfumu
9 Nha mbisi a nhaa, me namoni koongi a baata yinene yili muutu so mosi utuu pe utaanga. Bo ali baata ba matsi moosi, ba makaanda moosi, ba bifuumbu bioosi na ba mandaa moosi. Bo ali batemene nha kulu a mbata a ipfumu, na nha kulu a Limeme. Bo ali balwaata bikutu biahembuu, na ali bakaanga matsioonyi mu mioo mia bo. 10 Bo bakiloo mu ndaa yinene, bakileele: «Liyobolo lili mu umata kwaa Nziaambi a bisi, wadiaala nha mbata a ipfumu, na kwaa Limeme!» 11 Batumu ba Nziaambi boosi ali badiengelele mbata a ipfumu, biyiluu bio bina bia moonyi na binuna-nunu. Bo babwi mambundu-mbwa nha kulu a mbata a ipfumu, na bakiinzi Nziaambi. 12 Bo bakileele:
«Ameni!
Ee-e, nyaala mbilili,
buzitu na buyeri,
mvutuli a matoondo na likiinzi,
lituu na mifuri, biba kwaa Nziaambi a bisi,
mu bilimi na bilimi!
Ameni!»
13 Mosi mu binuna-nunu afuuli me: «Baata babalwaata bikutu biahembuu ba, bana bali na kuni bo bamati?» 14 Me navutili kwaa nde: «Wayaaba ndaa yii, we pfumu a me.» Ni mu buu, nde aleeli kwaa me: «Bo ni baata babakwaamisa kwa mifuri. Bo baswaayi bikutu bia bo, na bahembisi bio mu makili ma Limeme. 15 Ni mu buu, bo bali mu utemene nha kulu a mbata a ipfumu kia Nziaambi. Bo sa bakuundu nde butsuu na nyanga mu nzo a nde. Wuli mu udiaala nha yulu a mbata ipfumu sa aswee bo. 16 Bo a bubwaba na nzala so nyooto pe. Nyanga na kiaangila kia mifuri a bituu unyeengese bo pe. 17 Mundaa ti Limeme lilili nha kati a kati a mbata a ipfumu, sa liba mukebi a bo, sa libiti bo ku bidia bia maamba ma moonyi. Na Nziaambi sa akoombolo matsanga moosi ma mu misi mia bo✡Mkg 23.1-2; Yes 25.8; 49.10; Ezk 34.23.»