3
1 Ni mu buu, mu ki toono Muyuudayo avulu baata bakimi? Kesili yili na ndutu?
2 Ndutu yili yinene, mu mandaa malaa! Tsiomi, kwaa Bayuudayo Nziaambi ahi mandaa ma nde.
3 Uli ngwanya ti babamosi nha kati a bo a banambita pe mu Nziaambi. A ka Nziaambi utuu koono unambita mu ndasini dia nde, mu ndaa ti bo a banambita pe mu nde?
4 Ngori! Bwa fwaana uyabina ti Nziaambi li wangwanya, na baata boosi bali bangaa pia, weti buli mu uleele Mabasonuu ma Ngira: «Paa we monuu walibweeye mu mandaa ma we li mu uleele, na paa we biingi so bafuundisi we✡we Mkg 116.11; Mkg 51.6.»
5 Ka so pelili a libweeye la bisi yili mu umweese libweeye la Nziaambi, ima bisi dituu uleele? Nziaambi a li na libweeye pe mundaa ti, nde li mu kolo kesi a nde nha yulu a bisi? — Me ndi mu utsuu mutsuyili ya imuutu.
6 Ngori! Ka so Nziaambi ali walibweeye pe, buni nde akaatuu ufuundusu tsi?
7 Ka mbii ti pia dia me dili mu umweese kwa na yalilaa ngwanya a Nziaambi, na dili mu usalila mu umweese buzitu ba nde. Mu ima butuu ubwafuundusu me weti ngaa masumu?
8 Mu yii, mu ima dihele uleele ti: « Diyiluwani mandaa mamabi, paa mu mo mandaa mamabwe mapala»? Mu ngwanya, baata babamosi, mu utsoro bisi, bali mu uleele ti maa ni mandaa ma bisi. Baata sa bafuundusu bo, na buu ni bwafwaana kwaa bo!
Muutu pe so mosi li walibweeye
9 Aka ima dituu uleele! Bisi Bayuudayo diavulu bifuumbu bikimi ndutu?
Ee, ka a mu bioosi pe! Bisi diamaakwamweese ti baata boosi, yaba Bayuudayo na baata babali a Bayuudayo pe, bali ku tsini a litumu la masumu. 10 Mabasonuu ma Ngira mali mu uleele:
« A uli na muutu wa libweeye pe, a so mosi pe.
11 A uli na muutu pe so mosi uli na mayele,
Muutu so mosi pe uli mu usaa Nziaambi.
12 Baata boosi bamaasiisi kulu yimbwe,
mu itwaari bo boosi bamaadiimbili.
A uli na muutu pe so mosi wuli uyiluu mamabwe.
A so mosi pe!
13 Miwuri mia bo mili weti mangili mabwaasi.
Ndimi dia bo isala pia ufutu.
Misa mia bataari mili mu ubaapala mu minywa mia bo.
14 Minywa mia bo mialuulu mu mandaa ma tsibili na makali.
15 Bo na malwangimina mu udusu baata.
16 Bo bali mu utsala na bali mu usiisi ngebe mu mambuu moosi ma bo bali mu uyoo.
17 Bo a bayaaba pe kuulu a iyeenge.
18 Bo a bali mu ubatila Nziaambi boomo pe.»
19 Bisi diayaaba ti mioosi mili mu uleele mikele, mili mu utsuu kwaa baata babali ku tsini a litumu la mikele. Paa ti, muutu so mosi anyaala udibili munywa nde mu ukala nyutu a nde, na paa ti tsi yoosi yadieengelele baata, basieembe yo nha kulu a Nziaambi. 20 A uli na muutu pe so mosi wukaamonuu walibweeye nha misi mia Nziaambi, mundaa ti nde li mu utumumu mikele. Mikele mili mu ubaasila baata mu uyaaba masumu.
Buni Nziaambi ubaavuusu baata
21 Ka mu taanga di, Nziaambi maamweese bisi, buni nde ali mu ukitisi bisi balibweeye nha kulu a nde. Na nde li mu uyiluu buu, kwahele usalila mikele. Mikaanda mia Mikele na mia Mibili mili mu usilili ndaa yii. 22 Nziaambi ubaakitisi baata baba balibweeye mu imiini, na bu bo banambata mu Yiisu Kristo. Nde li mu usa buu, kwaa boosi babali mu usa imiini mu Yiisu Kristo. Mundaa ti, a uli na lisoboso nha kati a bo pe. 23 Baata boosi basa masumu, bahelili buzitu ba Nziaambi. 24 Ka Nziaambi mu bweese ba nde, li mu ukitisi bo baba balibweeye kwahele a mufutu, mu Yiisu Kristo wuli mu ukuulu bo mu masumu. 25-26 Nziaambi aheeri Yiisu Kristo weti bungori mu ndaa nyalili a masumu. Ninha, mu likwa la nde, baata babasa imiini mu nde baholi nyaalili a masumu ma bo. Mu yii, Nziaambi amweesi ti nde li walibweeye taanga dioosi. Tsiomi nde ali buu, mu taanga di nde akami mutimi mu unyaala usieembe masumu ma baata. Na nde li buu ka mu taanga di. Mundaa ti, nde atoono uba walibweeye, na ukitisi boosi babali mu usa imiini mu Yiisu baba balibweeye.
27 Mu yii, uli na toono kimi yi dibwasa liwaa? Ngori, so moosi pe! Ka mu a ima bisi dili mu uleele mandaa maa? Mu utumumu mikele? Pia, ka mikele mili mu ubiti bisi mu usa imiini. 28 Mu ngwanya, bisi dili mu utsimi ti, muutu li mu umonuu walibweeye mu ndaa imiini. Ka a mu ndaa pe ti nde li mu utumumu mikele. 29 So a buu pe, Nziaambi ndila wa Bayuudayo ali? Nde a ali pe ka Nziaambi a bifuumbu bini?
Ee-e, nde li ka Nziaambi a bifuumbu bini bioosi. 30 Ka bu yili ti Nziaambi ndila mosi ali! Na Nziaambi sa akitisi Bayuudayo na babali a Bayuudayo pe baba balibweeye mu imiini.
31 Yii yatoono uleele ti, mu ndaa imiini bisi dili mu umaasa ndutu la mikele?
Pia ngwanya, ka bisi dili mu uha mio ndutu ya ngwanya!