25
Etu Chipfu ẹpha
1 Gụbe Chipfu;
ọ bụ ngu bụ Chileke mu.
Mu a-nọdu ekutse ngu;
eku ẹpha ngu gude aja
ngu ajaja.
Noo kẹle i mewaru iphe,
dụ biribiri.
Ịipfushije ike l'iphe,
ị chịru idzu iya e -shi
teke ndiche;
2 kẹle i mewaru mkpụkpu;
ọ bụru ikpọzu;
mbụ mee mkpụkpu,
a kpụ-pheru igbulọ
mgburugburu;
ọ bụru ọla-l'iswi.
Ẹka ndu ọhozo kpụru;
ọ ngụru angụru bẹ i mewaru;
ọ bụru ẹka mkpụkpu
adụedu;
ọphu a byadu emezibaa
ya jasụ l'ojejoje.
3 Noo g'o gude ọha ike dụ je
a-nọdu akwabẹ ngu
ùbvù.
Ndu mkpụkpu ono,
ndu bu iya nụ bụ ndu
ewebushi akụrepho ono
a-tụko wata ngu eyeru
nsọ.
4 Ọ kwa ngu shikpọo eshinu
bụru onye ndu adụdu
g'ọ dụ phẹ anọduje l'ẹka
ezeru ndzụ.
Mbụ l'ị bụ onye abụjeeru;
iphe -nọdu atsụ nemadzụ
l'ẹhu l'ọ gbaba ngu l'ime
je anọdu zeeru ndzụ.
Ọ bụru ngu bẹ aagbabajẹ
l'ime je anọnyabe mẹ
oke phẹrephere nọdu ezi;
mbụ l'ọo ngu bụ ìbvù
onye okpomọku ekpo;
kẹle mkpawere ndu
ewebushi akụrepho
dụ g'ẹka oke
phẹrephere eme g'o
nwutsua igbulọ;
5 bya adụkwapho
g'okpomọku, ekpo l'alị,
mini adụdu.
Ọ bụ ngu emeje gẹ ndu
ọhozo,
atụ kwokwokwo dobe
ọnu doo.
Ọo g'ìbvù, shi l'urwukpu
atuzetajẹ okpomọku-a
bụ g'ịibyanyije erwu
úbvù ndu ewebushi
akụrepho.
Nri ọbo-iphe, Chipfu e-shiru ndibe iya
6 Ọo l'eli úbvú-a bẹ Chipfu, bụ Ọkalibe-Kakọta-Ike a-nọdu kua ndiphe l'ophu oku iphe-eriri, tsụru ẹba; gaarụ phẹ mẹe ndiche; mbụ shiaru phẹ anụ, bụ anụ, ụmi jiru ejiji; yẹe mẹe, doru ẹrwu. 7 Ọzo bụ l'ọo l'eli úbvú-a bẹ ọo-nọdu mebyishia phulaphula ẹkwa ono, e gude phukputechaa ọhamoha ono; mbụ ukpo ono, e gude phụ-chia ọha l'ophu onoya. 8 L'o mebyia ọnwu lwụa ya ree jasụ l'ojejoje. Mbụ lẹ Nnajịuphu, bụ Chipfu l'e-hushi onyemonye ẹnya-mini l'ẹnya. Iphe-iphere ono, e shi eme ndibe iya ono bẹ oo-me g'ọ bvụkota l'eliphe mgburugburu; kẹle ọo iphe ono bẹ Chipfu pfuru.
9 O -rwua mbọku ono bẹ ẹphe a-sụ: “Lenu! Ọ kpọkwaa Chileke anyi baa. Anyi kpọru obu yeru iya; ọ dzọo anyi. Onye-a bụ Chipfu; anyi kpọru obu yeru iya. G'ẹhu tsọo anyi! G'anyi teje ẹswa l'ọ dzọru anyi!”
Aphụ, Chipfu a-nụ ndu Mówabu
10 Kẹle ẹka Chipfu a-dụkwa l'eli úbvú-a. Mbụ lẹ ndu Mówabu bẹ aa-zọ tọlitoli l'ibe phẹ ẹgube ono, aazọje ẹswa ekperema pyakapyaka l'ikpọzu ono. 11 Ẹphe a-chịru ẹka labọ tụkaa g'onye ebvu mini, tụkaru ẹka l'eli mini ebvu mini onoya. Tẹme l'ọ bya emee g'eku onwophẹ ono lwa phẹ alị; g'ẹphe amahabe ẹrengete iya. 12 Ọo-byazeta phengarangu igbulọ ono, unu kpụru; ọ ngụru angụru ono. Oo-me iya l'ọodukpoo mkpulalị ọkpobe adụdu; mbụ l'oo-wozetakpọ ya alị ọkpobe ewozeta; mbụ worwua ya alị gẹdegede kpọ.