40
Adụ ndu kẹ Chileke obu
1 Unu dụnaa ndibe mu
obu! Unu dụnaa phẹ obu!
Nokwa iphe, Chileke unu
pfuru bụ onoya.
2 Unu pfunaa opfu bẹlebele
yeru Jierúsalẹmu.
Unu ranaa ya arara g'ọ maru
l'ozi-ike ono,
ooje ono bẹ bvụwaru nụ.
L'a pfụwaru ụgwo ẹjo-iphe,
o meshiru.
L'ewere, Chipfu meru iya
hawaa g'iphe-ẹji, o meru;
mbụ l'ọ hawaa g'ọo ya
ugbo labọ.
3 Ọ dụru onye ara iya arara sụ:
“Unu meziaru Chipfu ụzo
l'echiẹgu.
Unu mee eze gbororo iya g'ọ
dụgbaa nhamụnha lẹ
mgbẹgu alị-evevee.
4 Ẹka dụ nsụda bẹ ee-nwuchi
enwuchi.
Iphe, bụ úbvú úbvú bẹ
ee-gbuzekọta egbuze.
Ẹka dụ nkwagbo-nkwagbo bẹ
ee-mezi emezi.
Ẹka dụ
kpọkoro-kpọkoro-kpọkoro
l'a rwazee ya arwaze g'ọ
kwọo akwọkwo;
5 k'ọphu ee-kpuha ọdu-biribiri
kẹ Chipfu g'a hụma.
Iphe, bụkota nemadzụ l'ophu
ahụmakota iya;
kẹle Chipfu gudewaa ọnu
pfua ya.”
6 Ọ dụru olu-opfu, epfu sụ:
“Chia mkpu!”
Mu sụ: “?Bụ gụnu bẹ mu
e-chi lẹ mkpu?”
Ọ sụ: “Chia mkpu sụ lẹ
nemadzụ l'ophu
dụkota g'ẹswa.
Tẹme mma, ẹphe ama
dụkwapho g'okoko ẹswa,
dụ l'ẹgu.
7 Ọobujeru;
ẹswa -kpọhuwaa nkụ;
okoko iya erishihu dashịhu;
kẹle udzu-ọnu Chipfu
phụshiru phẹ.
Hoo haa; nemadzụ bụkwa
ẹswa.
8 Mbụ l'ọobujeru;
ẹswa -kpọhuwaa nkụ;
okoko iya erishihu dashịhu;
obenu l'opfu, Chileke anyi
pfuru;
a-pfụru pfụshia ike jasụ
l'ojejoje.”
9 Je apfụru l'eli úbvú, ha shii;
gụbe Zayọnu;
onye byaru ezi ozi-ọma.
Gụbe Jierúsalẹmu,
byaru ezi ozi-ọma;
wolinaa olu chia mkpu!
Wolia olu; gẹ ndzụ ba agụshi
ngu!
Sụ mkpụkpu,
dụgbaa l'alị ndu Jiuda-a:
“Wakwa Chileke unu baa!”
10 Lekwa! Nnajịuphu,
bụ Chipfu gudekwa
ike-ọkpu abya.
Ọ bụru ọkpehu iya bẹ
oo-gude bụru eze.
Lekwa! O gudekwa obunggo
eje abya;
bya egudekwaphọ ụgwo
ọo-pfụ.
11 Ndu ẹphe l'iya swị bẹ
ọonoduje eche g'onye
eche atụru.
Ọ nọdu achịkobeje ụnwu
atụru ono heru l'ẹka;
mbụ heru phẹ dobe onwiya
ntse k'ọphu ẹphe a-nọduje
iya l'obu.
Tẹme ọ nọdu atọje nwẹhu
erwu ndu ọphu he nwa.
12 ?Bụ onye dụjewaru ike
gbaa ẹka okorokoro
gude tụ̀a mini,
nọ lẹ mgboko l'ophu atụ̀tù;
ọzoo gude nkwo-ẹka
tụa akpaminigwe
l'ophu?
?Bụ onye dụjewaru ike
kpokọo urwuku,
dụ l'eliphe l'ophu kporu
ye lẹ nkata;
ọzoo wota iphe-atụ̀tù
gude tụ̀a ẹrwa úbvú,
nọkota nụ?
13 ?Bụ onye maru uche Chipfu?
tọo ?bụ onye a-sụ lẹ ya
zijeru iya iphe;
lẹ ya bụ onye akpọ-zijeru
Chileke ụzo?
14 ?Bụ onye bẹ Chipfu jeru
akpata ishi?
tọo ?bụ onye ziru iya
ụzo ọphu bụ ọkpobe
ụzo?
?Bụ onye bẹ ọ bụ;
mbụ onye ziru iya iphe,
ọ maru;
ọzoo onye goshiru iya ụzo,
oo-shi mee g'iphe doo
ya ẹnya?
15 Tororo opfu bụ l'ọhamoha
dụkwa gẹ mini,
daru kpọngu l'ime
bọketi.
Iphe, a gụberu phẹ bụ-a
nwurwuku, dụ l'iphe,
egudeje tụ̀a ẹrwa iphe.
Mbụ l'ọotùje ndu bukube
eze-ẹnyimu g'onye
kpokọberu urwuku,
dụ rwukuru rwukuru
atụ̀ l'iphe.
16 Mbụ l'ọswa, dụ l'úbvú úbvú
Lébanọnu ta asụkwa abụru
nkụ eye l'ọku.
Ọphu anụ, nọkota iya nụ
asụkwapho
g'eegbushi iya gude
gweeru Chipfu
ngwẹja-akpọ-ọku.
17 L'iphu iya bẹ ọhamoha l'ophu
ta adụkwa iphe, o bụ.
Ọ gụberu phẹ iphe,
adụdu iphe, ọ bụ;
mbụ l'iphe-iphoro ka
phẹ shii.
18 ?Bụ onye bẹ unu a-tụru
Chileke yeru?
?Bụ ntẹkpe gụnu bẹ unu a-sụ
lẹ yẹe ya bụ iphe lanụ?
19 L'a -bya l'iphe,
a kpụru akpụkpu;
ono bụ onye eme ọna
kpụru iya.
Ọ bụru onye-ụ́zú
mkpọla-ododo wụru
iya mkpọla-ododo;
bya emetaru iya
ẹgbirigba mkpọla-ọchaa.
20 Ọobujeru onye daru ụkpa
k'ọphu ọ tọo dụdu ike
anụ Chileke ẹgube
iphe ono;
l'ooje ahọta oshi,
kpọru akpaa;
bya eje achọo onye eme
ọna emegharu iya
ẹka kua
l'ọ bya apyịa ntẹkpe
doberu iya; mbụ ntẹkpe,
ta abyadụ aharịbejeru
ọkpa aharịberu.
21 ?Unu ta amahaada? Tọo
?unu teke anụma-swee?
?Te epfuduru iya unu e
-shikpọo lẹ mbụ?
?Toko dodu unu ẹnya g'e
gude tọo ọkpa
mgboko l'ophu?
22 L'ọ nọ l'aba-eze iya
l'ephekerephe;
nọghata eliphe,
gbaru mgburugburu.
Ndu nọ l'eliphe dụgbae ya
phọ ribariba g'ụnwu ogu.
Eligwe l'ophu bẹ ọ phụshiru
tọgbo g'onye phụshiru
ukpo;
bya eworu iya tọgbo
jakpata g'ụlo-ẹkwa,
aabya eburu eburu.
23 Ndu-ishi bẹ oomeje;
ọ tọ dụdu iphe,
ẹphe abụ.
L'ọ bya emee ndu-ishi
lẹ mgboko-a;
ẹphe abụru iphe-mmanụ.
24 Sụ-a; ọobujeru akụku,
aakụ phẹ l'alị;
adzadza, aadza phẹ;
ẹphe -jekwadu-a agbabẹ
ọgbarabvu l'alị;
l'ọophuwa phẹ ọnu;
ẹphe anwụlwashihu.
Oke phẹrephere abya
ezikọta phẹ g'ẹswa ereshi.
25 Onye nsọ ono jịru sụ-a:
“?Bụ onye bẹ unu a-tụru
mu yeru?
Mbụ-a; ?bụ onye bẹ unu epfu
lẹ mu l'iya ha ẹnya
nhamụnha?”
26 Palinaa ẹnya lee
l'akpaminigwe.
?Bụ onye meru iphemiphe
ono dobe?
Mbụ onye ono,
emeje kpokpode,
dụ igwerigwe l'ọofushi
nanụnanu;
tẹme ọ nọdu ekuje
phẹ ẹpha l'ẹhu l'ẹhu.
Ọ bụru l'ike parụ onye
ono ẹka;
tẹme ọkpehu dụ iya
meru g'o gude ọphu ọ
dụdu kpokpode ono
mẹ nanụ etuphahụje nụ.
27 Unubẹ ndibe Jiékọpu;
?dẹnu g'o gude unu
pfua ẹgube opfu-a?
Mbụ-a; unubẹ ndibe Ízurẹlu;
?dẹnu g'o gude unu
nọdu agụ aphụ?
Kẹle unu sụru lẹ Chipfu ta
amadụ iphe-ẹhuka,
unu eje;
mbụ lẹ Chileke unu ta
adụdu iphe,
ọ gụberu iphe,
rwuberu unu?
28 ?Unu ta mahaada?
Tọo ?unu teke anụma-swee
lẹ Chipfu bụ Chileke,
l'a-nọ jasụ lẹ tuutuutuu
lẹ mịimiimii?
Ọ bụru iya meru eliphe
l'ophu jasụ l'ẹka o
jeberu.
Ike ta abvụdu iya;
ọphu nkwo atsụdu
iya mẹe;
ọphu ọ dụdu onye
amakọtaru nkwamẹnya
nkiya.
29 Ọo ya emeje g'ike dụ
onye ike bvụru.
Tẹme ọ nọdu emeje g'onye
dụ nmẹlenmele rọkota
ike.
30 Mbụ lẹ-a; ụnwu ọgbo
lanụ emenyakwaa iphe;
ike abvụ phẹ;
ẹphe emehu nmẹlenmele.
Mbụ lẹ ndu bụkwadu
okorọbya abụjeru a -nọnya;
ẹphe evukota iphe daa iko.
31 Obenu lẹ ndu daru ngabẹru
Chipfu bẹ ike a-nọdu
aka adụdu.
Ẹphe e-gude ǹkù ephe
l'eli l'eli g'ugo.
Ẹphe agbaa ọso;
ike ta abvụdu phẹ.
Ẹphe ejee ije; nkwo ta atsụdu
phẹ mẹe.