44
Ízurẹlu bụ ndu Chileke họtaru
1 “Obenu lẹ-a; ngabẹ nchị
nta-a; gụbe Jiékọpu,
bụ onye-ozi mu;
mbụ gụbe Ízurẹlu ono,
mu gude ẹka mu họta ono.”
2 Wakwa iphe, Chipfu epfu
baa; mbụ onye ono,
meru ngu nụ ono;
onye bụ iya doziru
ngu teke ị nọ l'ẹpho.
Tẹme ọ bụru iya bụ
onye e-yeru ngu ẹka:
Ta atsụkwa ebvu;
gụbe Jiékọpu,
bụ onye-ozi mu;
mbụ gụbe Jieshurunu,
bụ onye mu gude ẹka
mu họta.
3 Mu a-gba mini l'alị,
ẹgu mini agụ.
Mbụ lẹ mu e-woru
ọ-sọ-gborogboro
mini wụa l'alị,
kpọhuru jegiri-jegiri.
Awa ngu bẹ mu a-wụ
Unme nkemu.
Mu abya awụa iphe-ọma,
shi mu l'ẹka l'ẹhu ndu
bụ oshilọkpa ngu.
4 Ẹphe awata amịshi g'ẹswa,
amịshi l'ẹka mini
adụje shii;
mbụ g'oshi wilo,
zeru l'agụga nggele,
asọ asọso.
5 O nweru onye asụ:
Mu bụkwa kẹ Chipfu.
Onye ọzo ekua onwiya
ẹpha laaru Jiékọpu.
Onye ọzo edee l'ẹka iya sụ:
Mu bụkwa kẹ Chipfu!
Ẹpha mu bụkwa Ízurẹlu!
6 Wakwa iphe,
Chipfu epfu baa;
mbụ onye ono,
bụ eze ndu Ízurẹlu
bya abụru onye
gbafụtaru phẹ nụ;
mbụ Chipfu,
bụ Ọkalibe-Kakọta-Ike:
Ọ kwa mbẹdua bụ onye ivuzọ;
bya abụru onye ikpazụ.
Ọ tọ dụekwa Chileke ọzo,
dụ nụ; gbahaa mbẹdua.
7 Ọo ya bụ lẹ-a;
?bụ onye bẹ unu
a-nọdu atụ eyeru mu?
G'onye ono pfunaa ya!
G'onye ono menaa
ya gẹ mu maru;
g'o doo ya ishi rii
l'iphu mu!
Mbụ iphe, mekọtakporu nụ;
eshinu mu meru ndibe
mu, shi l'ichee.
G'onye ono pfukwaphọ iphe,
e-mechaa mee nụ;
mbụ-a; g'ọ k'ọnaa iphe,
abya ememe.
8 G'ẹhu ba nmakwa unu
anmanma;
mbụ gẹ ndzụ ba agụkwa
unu!
?Mu te epfuhaadaru iya
unu eshi lẹ mbụ;
mbụ pfua ya raa ya
arara?
Mbụ-a; ọ kwa unu bụ ndu
ekebe mu.
?Ọ dụru Chileke ọzo, dụ nụ,
abụdu mbẹdua?
Waawakwa! Agbara mkpuma
ọzo ta adụhekwa.
Ọ tọ dụekwa onye ọzo,
mu maru.
Ndu eme kẹ ntẹkpe
9 Iphe, bụkpoo ndu eme kẹ ntẹkpe g'ẹphe ha ta adụkwa iphe, ẹphe bụ. Tẹme iphe ono, ẹphe sụru l'ọ bụ phẹ ọkpobe iphe ono bụru iphe, adụdu iphe, ọ bụ. Ndu agbaru phẹ ọdzori bụkwa ìshì bẹ ẹphe atsụ. Ọphu ẹphe amadụ iphe; k'ọphu iphere a-dụ phẹ. 10 ?Bụ onye jejeru je emeta agwa; mbụ kpụa ntẹkpe, adụdu iphe, ọo-barụ iya? 11 Lekwa; iphe, bụkpoo ndu ẹphe l'iya swị bẹ e-mechakwaa bụru ndu iphere e-me. Ndu ono, akpụje iya nụ ono bụnu nemadzụ mmanụ bẹ ẹphe bụ. G'ẹphe dzukọbenu bya apfụru hụma l'ee-ye phẹ oke ebvu meru iphere kpua phẹ g'ẹphe ha.
12 Ọo onye-ụ́zú ewotajẹ anma hụbe l'ọku icheku. L'ọ bya egude ọngu tsua ya gude meta ntẹkpe. Ọ bụru ike-ọkpu iya bẹ oogudeje mee ya. O -menyaa ya; ẹgu gụahaa ya; ike abvụ iya. Teke ọ ngụduru mini; a -nọnyaa; ẹgu mini atsụa ya nkwo mẹe.
13 Onye ekwo oshi bụ eri bẹ oogudeje atụ̀ nkiya. L'ọ bya egude iphe, aakajẹ iphe kaa gẹ ya e-me iya. L'ọ bya egude ayọ bya ebebashịa ya. Gude kọmupasu mee ya l'ọ dụ gẹ nwoke; mbụ dụkpoo akpabiri gẹ nwoke adụje; woru iya je ebvube l'ụlo-nshi. 14 Mbụ lẹ-a; o gbutsuru oshi sida; ọzoo oshi sipuresu; ọzokwanu achị, ọ harụ; yẹle oshi ọzo, dụ l'ọswa tụko vua. Ọzoo l'o woru oshi payịnu dzaa; igwe dzee mini mee ya; o vuta. 15 L'ọ bụwaruro nemadzụ iphe, oo-gude eshi ite. L'ọ harụ hata iya gude nyaa ọku. L'o gude iya phunwua ọku ghee buredi. Tẹmanu l'o gbutakwa iya phọ gude pyịta agwa wata abarụ ẹja. Mbụ pyịa ntẹkpe phozeaharu iya. 16 L'ọ bya ekee nkụ ọbu ẹbo chịta ye l'ọku; shia ya ite. L'ọ hụa ya anụ taa; ẹpho eji iya. L'o gudekwa iya phọ nyaa ọku; l'ọ sụ: “Hm! Nta-a bẹ ẹhu evuwa mu ọku. Mu hụmawaru ọku nyarụ.” 17 L'ọ bya achịta ọphu phọduru nụ gude mee agwa; mbụ mee ya ntẹkpe; phozeru iya wata iya abarụ ẹja. L'ọ bya epfuahaa nụahaa ya sụ iya: “Dzọtanu mu; ọ kwa ngu bụ Chileke nkemu.”
18 Sụ-a; ẹphe ta amakwa iphe; ọphu ọ dụdu iphe, edoje phẹ ẹnya; kẹle a phụchiru phẹ iphe l'ẹnya; k'ọphu ẹphe ta aphụdu ụzo. Tẹme e mechia phẹ egomunggo; g'ọ tọ dụ iphe, e-doje phẹ ẹnya. 19 Ọphu ọ dụdu onye ọphu asụje gẹ ya rịa ọriri. Mbụ ọphu ọ dụdu onye ọphu iphe edoje ẹnya kẹ g'ọ sụ: “Nta bụ iphe-a, mu hatarụ ye l'ọku-a; bya egude icheku iya ghee buredi-a; bya egude iya hụa anụ taa-a; bụ ọphu phọduru nụ bẹ mu e-gude mee ẹbyi ?Bụ kpukurukpu bẹ mu a-wata ephozeru?”
20 Ọ kwa ńtụ́ bẹ oorije. Ọ bụru obu iya, e dephuru edephu dephuru yẹbedua. Ọ tọ bụdu l'ọo-dụ ike adzọ onwiya. Ọphu ọosudu: “?Ọ kwa l'iphe-a, ya gude l'ẹkutara-a bụ iphe, abụdu ọkpobe iphe?”
Chipfu, bụ onye ndzọta
kẹ ndu Ízurẹlu
kẹ ndu Ízurẹlu
21 “Nyatakwa iphe-a;
gụbe Jiékọpu;
mbụ gụbe Ízurẹlu;
kẹle ọ kwa ngu bụ
onye-ozi mu.
Ọ kwa mu meru ngu dobe;
ị bụru onye-ozi mu.
Gụbe Ízurẹlu; mu ta abyakwa
azọha ngu azọha!
22 Mu rwufuwaru emeswe,
i mesweru mu.
Ọ gbakahụwa g'ẹka igwe
rwuchaaru erwurwu;
gbakaa ya.
Mu bya agbaka iphe-ẹji,
i meru mu; ọ tahụ g'iji,
kwarụ l'ụtsu atahụje-a.
Lwapfutanụ mu;
kẹle mu gbafụtawaru ngu.”
23 Gụbe imigwe;
gụnaa ebvu ẹhu-ụtso;
kẹle o kwa Chipfu mewaru
iphe-a!
Chia mkpu g'a nụma gụbe
eliphe, nọ igwe lẹ mkpula!
Unu watanụ agụ ebvu;
unubẹ úbvú úbvú;
mẹkpoo unubẹ
ọswa ọswa; yẹle iphe,
bụkpoo oshi,
nọ iya nụ!
Noo kẹle Chipfu gbafụtawaru
Jiékọpu!
O gudewaa Ízurẹlu goshi
ọdu-biribiri iya.
24 Wakwa iphe, Chipfu epfu baa;
mbụ onye ono,
gbafụtaru ngu nụ ono,
bụkwa iya phọ bụ onye
kpụru ngu teke ị
nọkwadu l'ẹpho ono.
Ọ sụru-a: “Ọ kwa mu bụ
Chipfu;
onye bụ iya meru
iphemiphe dobe.
Ọ bụru mu tọsaru eligwe
nwẹka mu;
ọ dabyiru swoo;
bya abụkwaru mu phọ
tọsaru eliphe l'onwomu.
25 Ọ kwa mu l'emebyije
iphe-ọhumalenya, ẹphe eme;
mbụ ndu ono, epfu iphe,
mu epfuduru ono.
Mu nọdu emejekwaphọ
ndu aphụ ọphulenya;
ẹphe abụru ndu
eme eswe.
Ọ bụ mu alọ-phuje ndu
maru iphe azụ
mee mmamiphe phẹ
l'ọoburu iphe,
adụdu iphe, ọ bụ.
26 Opfu, onye ejeru mu
ozi pfuru bẹ mu emeje
g'ọ dụ g'o pfuru iya.
Tẹme teke ndu epfuchiru mu
nụ pfukwarụpho iphe;
mu emee ya g'ẹphe
pfuru iya;
mbụ ndu pfuru opfu
ẹhu Jierúsalẹmu
sụ l'ee-mechakwaa buru
iya eburu ọzo;
bya epfukwaphọ opfu
ẹhu mkpụkpu lẹ mkpụkpu,
nọgbaa l'alị ndu Jiuda
sụ l'ee-mechakwaa
kpụkwachaa ya;
mbụ l'emebyishi ono,
e mebyishiru iya ono
bẹ ya e-mechakwaa
mekwata g'ọ dụ g'o shi dụ.
27 Ọo mu sụru ogbu-mini:
‘Ngwa; tahụ!
Mu e-mekwa gẹ mini,
nọgbaa
lẹ nggele ngu tashịhu.’
28 Ọo mu pfuru opfu ẹhu
Sayịrosu sụ l'ọ bụ onye
echeru mu atụru mu.
L'oo-mekọta iphe,
dụ mu l'obu g'o mee.
L'ọo-sụ g'a kpụ-phu
Jierúsalẹmu azụ.
L'ọ byakwapho asụ g'a tụa
ọkpa-ụlo
eze-ụlo Chileke.”