48
Ízurẹlu ada ike
1 Unu ngabẹ nchị l'opfu-a;
unubẹ ọnu-ụlo Jiékọpu;
mbụ unubẹ ndu ono,
eekujeru laaru Ízurẹlu ono;
mbụ unubẹ eri Jiuda;
mbụ unubẹ ndu egudeje
ẹpha Chipfu eri nte;
tẹme unu nọdu akpọ-kuje
Chileke kẹ ndu Ízurẹlu;
ọphu ọ dụdu ọphu unu
eme ire-lanụ;
ọphu ọ dụdu ọphu unu
pfụberekoto eme;
2 mbụ unubẹ ndu ono,
kuru onwunu ndu shi lẹ
mkpụkpu, dụ nsọ ono;
tẹme ọ bụru Chileke kẹ
ndu Ízurẹlu bẹ unu kpọru
obu yeru;
Chipfu, bụ Ọkalibe-Kakọta-Ike;
nokwa ẹpha iya bụ ono.
3 Ọ bụro teke dụ ẹnya
ẹnya bẹ mu pfuru iphe,
mewaru nụ.
Mu gudekpọo ọnu mu pfua
ya; raa ya arara;
tẹme mu mekwaphọ g'a
madzuru iya.
A bya l'amarụ; mu mee ya;
ọ nwụa gẹ mu pfuru iya.
4 Kẹle mu mahawarụ g'ịidabe
ike;
mbụ l'akwara olu ngu bụ
mgbọrígwè;
tẹme atatiphu ngu bụru
onyirubvu.
5 Ọ bụru iphe ono meru g'o gude
mu pfuhawaru ngu
iphe-a teke dụ ẹnya;
mbụ tẹme ọ nwụaha bẹ
mu vuru ụzo raarụ ngu
iya arara;
k'ọphu ị tịi sụdu l'ọo nshi
ngu meru iphemiphe
ono; l'ọo ntẹkpe ono,
ị pyịru apyịpyi ono;
ọzoo ọphu ị kpụru
l'onyirubvu ono bẹ o shi
l'ẹka mee.
6 Ị nụmawaru iphemiphe-a.
Lewa iya rọ ẹnya! ?Tii
kwetadu iya?
Nta-a bẹ mu byaru awata
ngu egoshi iphe ọ̀phúú,
bụ iphe, e domiru edomi,
bụ iphe, ịimadu.
7 Iphe ono bụa nta-a bẹ e meru
iya;
e te mehaadaru
iya ụzenya.
Mbụ l'i tikị nụmaswee ya
abụdu ntanụ-a;
k'ọphu bụ l'ị tịi sụdu l'ị
machahawaru iya.
8 Sụ-a; i tikị nụmaswekwaa ya;
ọphu ị mahaakwaa ya;
eshinu i shi teke ndiche
data nkụchi.
Kẹle mu maru l'ị bụ
mebyikpọo onye
ẹregede; tẹme iphe,
i shikpọo l'ẹpho ne
ngu zata bụru Okwerike.
9 “Ọ kwa g'ee-shi g'ẹpha
mu apfụru meru g'o
gude mu sedekwadụ
ẹhu-eghu mu.
Ọ bụru g'ee-shi g'a jajẹ mu
ajaja meru g'o gude
ọphu mu teke
atụ-koshidu ngu iya;
k'ọphu mu te emedu
ngu g'ị chịhu.
10 Tii ledu; mu hụchaakwaru
ngu ahụcha;
l'ẹbe abụ l'ị bụ
mkpọla-ọchaa.
Mu byakwapho ahụa ngu
l'ọku-ụzu,
bụ iya bụ iphe-ẹhuka.
11 Ọ kwa onwomu bẹ mu emeru
iya.
Mbụ lẹ mu eme iya emedoru
iya onwomu.
Kẹle-a; ?dẹnu gẹ mu e-shi
haa g'e woru ẹpha mu
tụrwua?
Mu te ewokwaru ùbvù,
gbaru mu nụ aharu onye
ọzo.”
Enweru onwonye ndu Ízurẹlu
12 Ngabẹkpodaru mu phọ nchị
gụbe Jiékọpu;
mbụ gụbe Ízurẹlu,
mu kuru l'onwomu.
Ọ kwa mbẹdua bẹ ọ bụ.
Ọ kwa mu bụ onye mbụ bya
abụru onye ikpazụ.
13 Ọ kwa mbẹdua gude ẹka mu
tụa ọkpa mgboko-a
l'ophu.
Ọ bụru mbẹdua gude ẹkutara
mu tọsaa imigwe
imigwe l'ophu.
Mu -kua phẹ oku;
ẹphe atụkoepho zelihu
pfụru apfụru.
14 Unu tụko g'unu ha byakọta
bya angabẹ nchị.
Dẹnu nshi ọphu dụru ike
pfuaru unu iphe-a;
mbụ l'onye ono,
mụbe Chipfu họtaru ono
l'e-me iphe,
mu tụberu l'ẹhu ndu Bábilọnu;
mbụ l'oshi ẹka iya bẹ ọ
dabẹwaru l'ẹhu ndu Bábilọnu.
15 Ọ kwa mu; mbụ l'ọ kwa
mu pfuru opfu-a.
Ee! Ọ kwa mu kuru iya oku.
Ọ bụru mu e-duru iya bya;
l'o mee iphe,
ọ byaru ememe meghaa.
16 “Unu kpịritaru mu ntse
bya angabẹ nchị l'iphe-a.
E -shikpọ lẹ mbụlembu,
mu shi pfuta opfu bẹ
mu teke epfuswee opfu
lẹ mpya.
Teke o mekpọoru lẹ mbụ
bẹ mu nọepho l'ẹka
ono.”
Nta-a bẹ Nnajịuphu, bụ Chipfu;
yẹle Unme nkiya;
yewaru mu gẹ mu bya.
17 Wakwa iphe,
Chipfu epfu baa;
mbụ onye agbafụtaje ngu
nụ ono, bụ Onye Nsọ
kẹ ndu Ízurẹlu.
Ọ sụru: Ọ kwa mu bụ Chipfu,
bụ Chileke ngu;
onye bụ iya ezije ngu iphe,
a-karụ ngu lẹ ree;
bya abụru onye anọduje
atụru ngu ẹka l'ụzo,
ịi-nọdu eshi.
18 “Ọme ị ngabẹru nchị mee
iphe, mu sụru g'e mee;
ẹhu-guu gege anọduepho
asọru ngu gborogboro
gẹ mini asọ asọso.
Apfụbekoto ngu atụ kpereree
g'akpara-mini, atụ
l'eze-ẹnyimu.
19 Oshilọkpa ngu gege adụ
igwerigwe g'ẹja,
nọ l'alị.
Ụnwegirima ngu abụru agụta
agụta g'ụnwu akpụru
ereshi.
Ẹpha phẹ ta abyadụ achịhu
achịhu;
ọphu a byadu emebyishi
phẹ emebyishi
l'iphu mu.”
20 Unu shikwa lẹ Bábilọnu
kwafụ!
Unu gbakwaa ọso gbalaarụ
ndu Bábilọnu!
Unu tụa okoo gude pfua
ya g'a nụma-dzuru!
Unu zia nzi g'o rwua ẹka
igwe beru alị beru!
Iphe, unu e-pfu bụ lẹ Chipfu
gbatawaru ndu-ozi iya
ono,
bụ ndu Jiékọpu.
21 Ẹgu-mini ta agụkwaru phẹ
teke o duru phẹ ghaa echiẹgu;
mbụ l'o meru;
mini shi l'agbara-mkpuma
asọshiru phẹ.
Ọ gbajaru agbara-mkpuma;
mini wata asọshi.
22 “Ndu ẹjo-iphe bẹ ẹhu ta
adụjekwa guu.”
Nokwa iphe, Chipfu eepfu
bụ ono.