55
Oku, eeku ndu mini agụ
1 Unu gebekwa-o! G'iphe,
bụkpoo onye mini agụ
byakwa angụta mini!
G'onye enwedu okpoga
byakwa azụa nri ria!
G'ọ byakwa agata mẹe;
zụta ẹra-eswi,
e gudedu okpoga azụ;
ọphu ọ dụdu aswa.
2 ?Dẹnu g'o gude unu nọdu
emebyishi okpoga l'iphe,
abụdu nri;
tẹme unu nọdu ese akanya
l'iphe, tee jidu ẹpho?
Unu ngabẹkwa;
unu ngabẹkpodaru mu
phọ nchị; g'unu eria iphe,
dụ ree; mbụ g'unu eria nri,
kachaa abụru ọkpobe nri.
3 “Unu ngabẹ nchị! Unu
kpịritaru mu nụ ntse!
Unu nụmakpodapho
iphe, mu epfu;
k'ọphu unu a-nọdu ndzụ.
Mu l'unu a-gbakwa ndzụ
ojejoje.
Ono bụru iphe-ọma, mu kweru
Dévidi ukwe lẹ mu
e-meru iya;
tẹme mu bụru onye
apfụshije ike l'iphe,
mu kweru ukwe iya.
4 Lewarọ; mu meakwaru iya
g'ọ bụru onye a-nọdu agba
ndiphe ekebe;
g'ọ bụru iya a-bụru ishi;
mẹ onye a-nọduje
atụru ndiphe iphe,
ẹphe e-me.
5 Lewarọ; ọha, ị madụ ndu
ẹphe bụ bẹ ii-kukwa oku;
ẹphe egude ọso byapfuta
ngu;
l'ọ bụkwaru ọha,
amadụ ndu unu bụ.
Ọ bụru onye a-kpa iya
nụ bụ Chipfu,
bụ Chileke ngu;
mbụ Onye Nsọ kẹ Ízurẹlu;
kẹle o doziwaru ngu;
ị dụ akpabiri.”
6 Chọnaa Chipfu teke ịi-hụma
iya!
Rakua ya teke ọ nọkwadu
ntse!
7 G'onye ẹjo-iphe haa ụzo ono,
ootso ono;
onye ọkpoma mgbashị
ahaa ẹjo ọriri iya.
G'onye ono lwapfuta Chipfu
hụma l'ọo-phụru iya
obu-imemini.
Mbụ-a; g'onye ọbu lwapfuta
Chileke anyi;
kẹle ọo-gụru iya nvụ
kẹ mmanụ.
8 “Ọriri mu ta abụkwa ọriri
ngu;
ọphu ọ bụdu g'iimeje bụ
gẹ mu emeje.”
Nokwa iphe, Chipfu eepfu.
9 Ọ kwa g'igwe dụ-be alị
ẹnya-a; bụ g'iphe,
mu emeje dụ-be ẹnya
l'iphe, iimeje.
Ọ bụru g'ọriri mu dụ-be
ọriri ngu ẹnya.
10 Ọ kwa gẹ mini;
yẹle aka-mini-sunoo eshije
l'igwe dzee;
ọ tọo laphuhẹedu iya azụ;
abụdu l'ọ gbaru mini
l'eliphe-a;
mee ya l'o gua egugu
fushiaha iphe l'alị;
k'ọphu ọo-mịtaru ndu
akọ iphe akpụru-iphe;
tẹme ndu eri eriri enweru
iphe, ẹphe e-ri;
11 nokwa g'opfu,
shi mu l'ọnu dụ bụ onoya.
Ọ tọo gbakwarụ ẹka
alwaphutaru mu azụ.
Ọ chịa iphe, oo-me bụ iphe,
bụ obu mu; mbụ mee iphe,
mu ziru iya g'o je emee.
12 “Unu e-gude ẹhu-ụtso lụfu;
l'eeduta unu dufu
l'ẹhu-guu.
Iphe, bụ úbvú úbvú
aswọkobe wata agụ
ebvu l'iphu unu.
Nokwaphọ g'iphe,
bụkpoo oshi,
nọkota l'ẹgu a-nọdu
akụkota ẹka.
13 O -beta g'ọgarambo fushia;
oshi payịnu efushichia.
Ọo lashịa ọphu ọbyambvu
e-fushi;
oshi mịturu efushichia.
Ono a-bụru iphe,
Chipfu e-gude zaa ẹpha;
kẹle ọo-bụru iphe-ọhubama,
a-dụ ojejoje;
ọphu a byadu emebyi
iya emebyi.”