51
1 Wakwa iphe, Chipfu epfu baa:
“Unu lekwa; mu a-kpali
onye mmebyi
g'ọ bụru ọgu dụru ndu
Bábilọnu;
mbụ ndu bu l'alị, aza ‘obu
ndu wụ-lihuru etso
mu opfu’.
2 Mu e-zi ndu ọhozo g'ẹphe je
etsoo ndu Bábilọnu ọgu;
g'ẹphe je aphụchaa phẹ
aphụcha;
mee alị phẹ adabyiru
iphoro.
Ẹphe a-nọdu abya iya ọgu
ẹka ẹbo ẹbo mẹ
o -rwuẹpho mbọku ono,
ee-mebyishi phẹ ono.
3 G'onye agbajẹ apfụ te setakwa
ụta iya k'agbagba;
ọphu ọ kwakwa onwiya
ngwọgu.
Unu ta aphụkwaru
ụnwokorobya phẹ
obu-imemini.
Unu mee ndu ojọgu phẹ
g'ẹphe bvụeberu mu
rengurengu.
4 Aa-nọdu egbushi phẹ;
ẹphe ada gbiigbii l'alị
ndu Bábilọnu.
Mbụ l'aa-nọdu emeka
phẹ iphe ọkpobe
emeka l'agụga gbororo.
5 A makwarụ-a l'alị ndu
Ízurẹlu ẹphe lẹ ndu
Jiuda l'ophu bụ iphe,
jiru iya nụ bụ
ikpe-anmanma,
nmarụ phẹ l'iphu Onye Nsọ
kẹ Ízurẹlu.
Ọle Chileke phẹ, bụ Chipfu
bya abụru
Ọkalibe-Kakọta-Ike
teke agbadokwa phẹ.
6 Unu gbaa ọso shi l'alị ndu
Bábilọnu gbalaa!
G'onyenọnu dzọo onwiya
ndzụ!
G'e be mebyishikwa unu opfu
l'ẹphe meru iphe-ẹji;
noo kẹle o rwuakwaru
teke Chipfu e-melata;
mbụ teke ọo-pfụ phẹ ụgwo,
gbaru phẹ nụ.
7 Bábilọnu shi bụru okoro,
e meru lẹ mkpọla-ododo
l'ẹka Chipfu.
O gude iya mee mẹe tsụahaa
ndu mgboko l'ophu.
Ọhamoha ngụru mẹe,
shi l'okoro ono.
Ọo ya meru g'o gude ẹphe
meahaa ọbvu ọbvu
nta-a.
8 Bábilọnu dawarụ l'ọtulupfu
tsukpọshihu.
Unu rashịa ẹkwa iya ike!
Unu kpatakwaru iya
ọbvu-etete g'o mebe l'ẹka
iphe eme iya ẹhuka.
?A maru l'oo-shi nno bụru
iya ewekọrohu?
9 ‘Anyi gege emetakwa
Bábilọnu iphe,
eme iya nụ;
ọle o to nwehẹedu
ewekọrohu.
G'anyi parụ iya haa
g'onyenọnu lashịa
alị iya; kẹle ikpe,
nmarụ iya nụ rwuwaru
akpaminigwe;
mbụ l'ọ ha ephekerephe
g'ẹka urwukpu nọ.’
10 ‘Chipfu meakwaru;
anyi bụru ndu
pfụberekoto ọzo!
Unu bya g'anyi je l'úbvú
Zayọnu je akọo iphe,
Chipfu,
bụ Chileke anyi meru!’
11 Unu rwachaa ọnu apfụ unu
arwacha!
Unu achị-lia iphe,
unu egudeje egbobuta
onwunu!
Chipfu kpaliakwaru ndu eze
ndu Midiya;
noo kẹle iphe,
ọ tụberu bụ g'o mebyia
alị ndu Bábilọnu.
Chipfu a-gwata ụgwo iphe;
ụgwo iphe,
e meru eze-ụlo iya.
12 Unu palia ẹkwa-ọhubama
gude goshi l'ọgu dụru
igbulọ mkpụkpu Bábilọnu!
Unu cheshi nche ike!
Mbụ-a unu mee gẹ ndu nche
nọdu lẹ nche!
Unu eje l'ẹgbudu je edokaa
ndu mpya-ọgu;
kẹle Chipfu e-mekwa iphe,
ọ tụberu; mbụ iphe,
ọ chị-buhuhawaru lẹ ya
e-me ndu bu lẹ Bábilọnu.
13 Unubẹ ndu bu l'agụga
ẹnyimu;
tẹme unu nweru ẹku shii;
ndzụ unu bvuakwaru!
Mbụ l'ẹba-oghu ndzụ unu
gbabuhuakwaru!
14 Chipfu, bụ
Ọkalibe-Kakọta-Ike
gudeakwa onwiya
ria angụ sụ lẹ ya
a-chịru nemadzụ ye lẹ
mkpụkpu ono;
ẹphe eji iya kpimu;
sweta iya g'ẹka igube
swetaru.
Tẹme ẹphe atụa okoo
kpua unu.
15 Ọo ọkpehu iya bẹ o gude
mee mgboko.
Ọ bụru mmamiphe iya bẹ o
gude mee mgboko;
ọ ngụru angụru;
bya egude nkwamẹnya iya
phụshi akpaminigwe.
16 O -mee; igwe raa ọ́rà; mini,
nọ l'imigwe aphụa
gbudugbudu.
Ọ nọdu emeje g'urwukpu shi
l'ẹka igwe beru sọru
sọfuta.
Teke o meru; igwe nọdu edze
mini l'ọotukwapho
egbigwe.
Tẹme ọ nọdu eshije l'ụlo
ẹku iya kpofuta
phẹrephere.
17 Nemadzụ l'ophu te enwedu
egomunggo.
Tẹme ọphu ọ dụdu iphe,
ọ maru.
Iphere gudekọta iphe,
bụkpoo ndu akpụ ụzu;
ọ bụru ntẹkpe,
ẹphe kpụshiru meru
phẹ iya;
kẹle ntẹkpe phẹ ọbu
bụkota ụghoshi.
Ọ tọ dụdu ọphu atụ unme.
18 Ẹphe bụkota iphe-mmanụ;
iphe,
e gude agba mgbọnu.
O -rwuẹpho teke aa-nụ phẹ
aphụ; ẹphe alaa l'iyi.
19 Onye ono, bụ okiphe oshilọkpa
Jiékọpu ono ta adụkwa
gẹ ndu k'ono;
kẹle ọo ya bụ onye
meru iphemiphe;
mẹchakpoo ọkpa-ipfu ono,
bụ okiphe iya ono.
Onye ono bẹ ẹpha iya
bụ Chipfu,
bụ Ọkalibe-Kakọta-Ike.
20 Ọ kwa ngu bụ ogbunkụ,
mu gude alwụ ọgu.
Ọ bụ ngu bẹ mu egudeje
chịkaa ọha l'ophu.
Ọ bụru ngu bẹ mu egudeje
mebyia alị-eze l'ophu.
21 Ọ bụ ngu bẹ mu egudeje
chịkaa ịnya;
yẹe ndu nọ phẹ l'eli.
Mu nọdu egudeje ngu chịkaa
ụgbo-ịnya;
yẹe ndu agba iya nụ.
22 Ọ bụ ngu bẹ mu egudeje
chịkaa nwoke yẹe
nwanyị.
Ọ bụru ngu bẹ mu egudeje
chịkaa ndu bụ ọgerenya;
yẹe ndu bụ okorọbya.
Ọ bụru ngu bẹ mu egudeje
chịkaa nwoke ọgbaga;
yẹe nwanyị ọgbaga.
23 Ọ bụru ngu bẹ mu egudeje
chịkaa onye eche atụru;
yẹe atụru iya.
Ọ bụru ngu bẹ mu egudeje
chịkaa onye akọ opfu;
yẹe eswi, o gude akọ iya.
Ọ bụru ngu bẹ mu egudeje
chịkaa ndu achị ọha;
yẹe ndu-ishi.
24 “Tẹme; ọzo bụ lẹ mu a-nọduepho unu l'iphu pfụa Bábilọnu; yẹe iphe, bụkpoo ndu bukọta l'alị ndu Bábilọnu l'ophu ụgwo iphe, ẹphe meru l'úbvú Zayọnu.” Nokwa iphe, Chipfu eepfu bụ onoya.
25 Wakwa iphe, Chipfu epfu
baa:
“Lekwa; mu bụkwa ọgu dụru
ngu;
gụbe úbvú ono,
anọduje emebyishi
emebyishi ono;
mbụ unubẹ ndu ono,
mebyishikọtaru eliphe
l'ophu ono.
Mu a-machịru ngu ẹka
l'ọoburu ọgu dụru ngu.
Mu eshi lẹ mkpakpa-ọnu úbvú
phụa ngu phụzeta l'alị;
mee ngu l'ịiburu úbvú,
a kpọru ọku.
26 Ọphu ọ dụdu mkpuma
aa-kwata l'ẹhu ngu
k'eme mkpuma,
gude ụlo.
Ọphu ọ dụkwapho mkpuma,
shi iya nụ,
e gude atụ ọkpa-ụlo.
Noo kẹle ịi-dabyiru bụru
okorobo-ẹgu jasụ
l'ojejoje.
Nokwa iphe, Chipfu eepfu
bụ ono.
27 Unu palia ẹkwa-ọhubama
l'alị ono!
Unu gbua opu tsoru ọhamoha!
Unu dozia ọhamoha g'ẹphe
tsoo ya ọgu.
Unu eje ekua ndu alị-eze,
nọnu g'ẹphe tsoo ya ọgu;
ndu Araratu; waa ndu Mini;
waa ndu Ashikenazu!
Unu họta onye-ishi-ojọgu,
a-bụru iya ọgu!
Unu achịfuta ịnya ye g'o
zeru gbiigbiigbi
je g'ẹka igube etsu.
28 Unu dozia ọhamoha g'ẹphe
tsoo ya ọgu;
mbụ ndu eze ndu Midiya;
waa ndu achị ọha phẹ;
waa ndu-ishi phẹ;
mẹkpoo ndu alị ẹka
nọkota phẹ l'ẹka g'ẹphe
hakọta.
29 Alị anma jiijiijii bya echi
gburugburu; kẹle iphe,
Chipfu chịru k'eme
ndu Bábilọnu dụkwa
g'ọ dụ.
Mbụ l'oo-me alị Bábilọnu
l'ophu l'ọoburu ochobu;
k'ọphu bụ l'ọ tọ dụdu
onye byaru ebubaaru
iya eburu.
30 Ndu ojọgu ndu Bábilọnu bẹ
hakwaru alwụ ọgu
lachaa je anọdu l'ụlo phẹ,
a kpụshiru ike.
Ike bẹ bvụkotawaru phẹ nụ;
ẹphe dụwaa g'ụnwanyi.
Ẹka ẹphe bu ebubu bẹ a
tụwaru ọku.
Mgbọro-ígwè, o gude
gbaa ụpho iya bẹ a
nyajishiwaru.
31 Onye ọkpa-ẹgwa lanụ
anọduje agba etso
nwibe iya;
onye-ozi etso onye-ozi ọzo;
bụkpoerupho ndu eje ezi
eze ndu Bábilọnu
l'a nataakwaru iya
mkpụkpu iya l'ophu
l'ophu.
32 Ẹka mini asọkahu asọkahu
bẹ a kuchichaakwaru;
bya atụfu ọku l'ụda l'ụda,
dụgbaa l'ẹka ono.
Ndu ojọgu bẹ meji tọfuwaru.”
33 Wakwa iphe, oopfu; mbụ Chipfu, bụ Ọkalibe-Kakọta-Ike; mbụ Chileke kẹ ndu Ízurẹlu:
“Nwada Bábilọnu dụkwaa
g'alị ẹka aazọshi ẹswa
lẹ balị teke aazọ iya
tọlitoli.
Teke aa-kpa iya g'onye akpa
ji rwuakwaru.”
34 “Nebukadineza, bụ eze ndu
Bábilọnu ripyawaru
anyi.
O mewaru; ọphu anyi amaẹdu
iphe, anyi eme.
O mewaru anyi;
anyi bụru ite iphoro.
Ọo g'ẹjo agwọ elweje iphe-a
bụ g'o lweru anyi
bya egude ẹku anyi rijia
ẹpho;
bya agbẹ teke ono gbọfu
anyi.
35 G'iwashị, e weru l'anụ-ẹhu
anyi tukokwaru ndu
Bábilọnu l'ẹhu!”
Nokwa iphe, ndu bu l'úbvú
Zayọnu epfu.
“Gẹ mee anyi tukokwaru
l'ishi ndu bu l'alị ndu
Bábilọnu!”
Nokwa iphe, ndu bu lẹ
Jierúsalẹmu epfu.
36 Ọo ya bụ lẹ-a; wakwa iphe,
Chipfu epfu baa:
“Lekwa; mu a-gbaru unu
ọdzori; melata iphe,
e meru unu.
Ẹnyimu phẹ bẹ mu e-me
g'ọ tashịhu;
bya emee ọgba mini
phẹ g'ọ tashịhuchaa.
37 Bábilọnu e-mechaa bụru
ikpọzu;
ẹka nkụta-ọswa bugbaa;
waa iphe, a-nọdu anyị
ishi ẹdzu;
tẹme l'e gudekwa iya
phọ agba mgbọnu;
ẹka ọ tọ dụdu onye bya
eburu iya eburu ọzo.
38 Ndibe iya g'ẹphe ha asụgbaa
ekiri g'oduma.
Mbụ l'ẹphe asụgbaa kọroro
g'ụnwu oduma nshịi.
39 Obenu l'ọo teke ono,
oonwu phẹ
phuruphuru g'ọku ono
bẹ mu e-shiru phẹ nri
ọbo-iphe;
mee mẹe atsụahaa phẹ;
k'ọphu ẹphe a-chịepho
ọchi kpọkirihuchaa
akpọkirihu;
kuwarurọ mgbẹnya,
ẹphe tee tehubaẹdu etehu.
Nokwa iphe, Chipfu eepfu
bụ ono.
40 Mu a-kwata phẹ tụa l'alị g'ụnwu
atụru, a chị eje egbushi;
mbụ g'ikpoto ebili;
yẹe ikpoto eghu.
41 Lewarọ g'e gude gude ndu
Sheshaku;
g'e gude lwụta ndu ndiphe
l'ophu shi gude eku
onwophẹ.
Ọ bụakwaa iphe, anyị
ishi ẹdzu l'echilabọ
ọhamoha.
42 Ẹnyimu byaakwaru utso
ripyabẹ alị ndu
Bábilọnu.
Ọ bụru gborogboro, ọoso bẹ
o gude sọpyabe iya.
43 Mkpụkpu lẹ mkpụkpu,
nọ iya nụ bụkotaru
ochobu; kpọhu nkụ;
bụru alị evevee;
alị ẹka adụdu onye bu
iya nụ;
ọphu ọ dụdu onye eshi iya
eshishi.
44 Mu a-hụ̀ Balụ ahụ̀hù l'alị
ndu Bábilọnu.
Mu emee ya l'ọ gbọo iphe,
o lwehawaru elwelwe.
Ọhamoha taa wụedu
awụ-pfu iya.
Tẹme igbulọ mkpụkpu
Bábilọnu adakpọshihu.
45 Ndibe mu; unu shikwa
l'ime iya wụfuta!
Unu gbakwaa ọso ndzụ unu!
Unu gbalakwaaru oke
ẹhu-eghu Chipfu!
46 Gẹ meji ta tọfukwa unu;
ọphu unu atsụhukwa
ebvu;
teke unu a-wata anụ ude
ọgu l'alị ono;
a -tụkpoo ọwa-a apha-a;
apha ọzo l'aawata ọzo;
mbụ teke iwashị adụ
l'alị ono;
tẹme onye-ishi anọdu
etso onye-ishi ọgu.
47 Ọo ya bụ; o nweru teke
dụfutaje nụ,
bụ teke mu a-nụ nshi
ndu Bábilọnu aphụ.
Alị phẹ l'ophu bẹ ee-me
iphe-iphere.
Ndibe iya, e gburu egbugbu
adabyigbaaru adabyiru
l'ime iya.
48 Noo teke imigwe;
mẹ eliphe l'ophu;
yẹe iphe, bụkpoo iphe,
nọkota iya nụ
a-tụ ụzu l'ẹka ẹhu atsọ
phẹ ụtso l'opfu ẹhu
ndu Bábilọnu;
kẹle ndu mmebyi,
shi l'ụzo isheli abya phẹ
etso ọgu.”
Nokwa iphe, Chipfu eepfu
bụ ono.
49 “Ọ kwa gẹ ndu Bábilọnu
meru ndu mgboko l'ophu;
ẹphe daa pọopoo
bụ gẹ ndu Bábilọnu ono
a-da pọopoo
ẹphebedua.
Ọ bụru iphe, kparụ iya nụ bụ
g'ẹphe gude gbua ndu
Ízurẹlu.
50 Unubẹ ndu nahụru ogu-echi;
unu tụgbuekwapho!
Unu be jekpọkwa
anmarwụbe!
Unu nọdukpooro ụzenya
nyata Chipfu!
Unu anyatakwaphọ
Jierúsalẹmu!”
51 “E kpuakwarụ anyi iphu
lẹ ntụ;
kẹle a kọwaru anyi ọnu.
Tẹme iphere kpuchiwaa
anyi iphu;
noo kẹle ndu ọhozo
bahụru l'ẹka dụgbaa
nsọ l'ụlo kẹ Chipfu.”
52 Wakwa iphe, Chipfu epfu
baa:
“Mbọku abyanụ-a, bụ mbọku,
mu a-nụ nshi aphụ.
Ọ bụru iphe, a-nọdu ada l'alị
iya l'ophu
bụ atsụ ude, ndu e mekarụ
iphe atsụ.
53 Ọ tọ dụkwa m'obetaru
Bábilọnu jerwuchaa
akpaminigwe;
bya emee ụlo, a kpụshiru
ike nkiya, dụ ephekerephe;
mee ya;
ọphu aabahụdu iya abahụ;
bẹ mu e-yelẹ-a ndu e-je
emebyishia ya.
Nokwa iphe, Chipfu eepfu
bụ ono.
54 Ụzu-ẹkwa adakwa lẹ
Bábilọnu; ụzu,
egoshi l'e mebyishiwaru
iphe,
parụ ẹka l'alị ndu
Bábilọnu.
55 Chipfu abyawaa emebyishi
Bábilọnu;
byanyikọta oke ụzu ono,
aanọduje atụ l'ime
iya ono.
Ndu ọhogu atụ akpara
g'eze-ẹnyimu abya.
Ụzu, ẹphe a-nọdu atụ ala
ephekerephe.
56 Noo kẹle onye mmebyi
byawaru emebyishi
Bábilọnu.
Ndu ojọgu iya bẹ a
kpụtachawaru lẹ ndzụ.
Tẹme a gbajishiwa ụta
phẹ mkpurikpu
mkpurikpu;
kẹle Chipfu bụ Chileke,
apfụje nemadzụ
ụgwo g'iphe,
o meru gbaru.
O je l'apfụ iya ụgwo pfụ-dzua
ya ya apfụ-dzu.
57 Mu e-me gẹ ndu-ishi iya;
yẹe ndibe iya, maru iphe;
yẹe ndu-ishi ojọgu iya;
mẹ ndu-ishi
mkpụkpu phẹ;
mẹkpoo ndu ojọgu phẹ;
ngụa mẹe g'ọ tsụ
phẹ atsụtsu.
Mgbẹnya atụko tụshi phẹ;
ẹphe tee tetabaẹdu
eteta jasụ l'ojejoje.”
Nokwa iphe, oopfu;
mbụ onye eze ono,
bụ Chipfu; bya abụru
Ọkalibe-Kakọta-Ike ono.
58 Wakwa iphe, oopfu;
mbụ Chipfu bụ
Ọkalibe-Kakọta-Ike:
“Igbidigbi igbulọ Bábilọnu
ono bẹ ee-tsukpọshichaa
etsukpọshi.
L'a tụfu ọku l'ephekerephe
ọnu-abata iya ono.
Ndiphe eria aphụ see akanya
kẹ mmanụ.
Ọhamoha abụerupho ọku bẹ
ẹphe e-jeru ozi jasụ
ike abvụ phẹ.”
59 Wakwa ozi, onye mpfuchiru Chileke, bụ Jieremaya ziru Seraya, bụ nwa Neraya bya abụru nwanwa Maseya; teke ono, o jeru Bábilọnu ono; ọ bụru ẹphe lẹ Zedekaya swị; mbụ eze ndu Jiuda teke ọ bụwaru eze apha ẹno. Seraya ono bụ onye-ishi, bụ iya achọtaje ẹka ndu ije a-kwajẹ. 60 Jieremaya tụkoepho ẹjo-iphe, a-nwụru Bábilọnu dekọta l'ẹkwo; mbụ iphemiphe ono, e dekọtaru k'opfu ẹhu Bábilọnu ono. 61 Iphe, o pfuru Seraya bụ: “Teke i jerwuẹkwarupho Bábilọnu; gụkwaa iphemiphe-a g'a nụma-dzuru. 62 Iphe, ii-pfufua bụ: ‘Gụbe Chipfu; i pfuwaru sụ l'ii-mebyishi ẹka-a; k'ọphu bụ lẹ nemadzụ tee buẹdu iya ebubu; ọphu anụ a-nọedu iya; l'ọo-bụru ochobu ojejoje!’ 63 Teke ị gụchaerupho ẹkwo-a; l'iilibe iya mkpuma woru chie l'ime ẹnyimu Yufurétisu. 64 Iphe ọzo, ii-pfufua ye iya bụ: ‘Noo gẹ Bábilọnu a-tsụ ọtsuri bụ ono; ọphu oo-sebaẹdu ọzo. Ọ bụru iphe, a-kpa iya nụ bụ ẹjo-iphe, mu abya eme g'ọ dapfu iya; ọphu ike adụbaedu ndibe iya.’ ”
Noo ẹka opfu Jieremaya jeberu bụ onoya.